Read Manggarai TOMBO PÉTÉ GORI DE RASUL-RASUL 22 Bible Online

TOMBO PÉTÉ GORI DE RASUL-RASUL 22 - Manggarai bible

TOMBO PÉTÉ GORI DE RASUL-RASUL 22

¹“Asé ka’én, agu ema-ema, séngét koé curup daku agu méu te kambé weki rug.”

²Du dengén lata do situ hia curup Ibraniy, tambang kétas likd. Mai taé diha,

³“Aku ho’o ata Yahudik, loas oné Tarsus tana Kilikia, maik uwa oné béndar ho’ok. Toing di’a-di’ak li Gamaliél oné wintuk de empo dité, wiga aku ciri cengata ata seber gori latang te Mori Keraéng, cama ného sanggés méu te ho’on ga.

⁴Aku poli pandé kosé ata lorong Salang de Mori Keraéng dengkir agu isé matas. Ata rona agu iné waid dekos laku agu téis laku oné bui.

⁵Latang te hitu koném Imam Mésé ko Sanggéd Ata Tu’a laing ciri saka-si. Oné mai isé aku poli ba surak latang te asé-ka’é oné Damsyik agu aku poli ngo nitug kudut deko isét lut Salang de Mori Keraéng ata manga nitud, agu dadé isé nggere-oné Yérusalém kudut buis.

⁶Maik lari lako ngo nitu, du aku cai ruis Damsyik, aram lesak leso, rodo cain néra hili-helap éta mai awang léok aku.

⁷Itu kali doalg aku nggere-wa tana agu aku dengé reweng ata curup agu aku: Saulus, Saulus, co’o tara mbelé Akum hau?

⁸Mai walé daku: Céing néng Ité Mori? Mai taén: Aku hi Yésus, ata Nasarét, hitut mbelé de hau.

⁹Sanggéd isét lut aku, ita tu’ung lisé néra hitu, maik reweng Diha hitut curup agu aku toé dengé lisé.

¹⁰Mai taé daku: Mori apa ata paka pandé laku? Mai taé de Mori agu aku: To’o ga, agu ngo ga oné Damsyik. Lé itu po toi agu hau sanggéd cao-ca ata paka pandé le hau.

¹¹Ai toé ngancéng itak aku ali néra hiot hili-helap mata daku, itu kali haé lako daku cau limég agu todang aku nggere-oné Damsyik.

¹²Nitu manga cengata, ngasangn hi Ananias cengata ata nggeluk lorong wintuk Taurat agu mbou kéta ngasangn ali di’an oné mai sanggéd ata Yahudi ata manga nitud.

¹³Hia mai hesé ruis aku agu mai taén, Saulus asé-ka’é daku, nahé ngancéng ita koléh! Du hitu muing aku ita kolék agu lélo hia.

¹⁴Itu kali mai taen: Mori Keraéng empo dité poli wérét hau kudut pecing ngoéng Diha, kudut lélo Ata Molor agu kudut séngét reweng ata pé’ang oné mai mu’u Diha.

¹⁵Ai hau paka ciri saka-si Diha latang te sanggén ata, latang te apa ata ita de hau agu apa ata dengé de hau.

¹⁶Ho’o ga, co’o tara sésénga’i kim hau? To’o ga, agu sendo wekim te cebong le waé serani agu sanggéd ndékokm pandé nggeluk ali caro ngasang de Mori Keraéng.

¹⁷Du kolég aku nggere-oné Yérusalém agu du aku lari ngajig oné Mbaru de Mori Keraéng wakar daku penong le kuasa nggeluk.

¹⁸Aku ita Hia hiot curup agu aku: Gélangkoé, gelangkoé legong Yérusalém, ai isé toé tiba saka-si de hau latang te Aku.

¹⁹Mai walé daku: Mori, baé lisé te aku ata ngo oné mbaru ngaji ca agu oné mbaru ngaji bana agu na’a oné buis isét imbi Ités agu ongga isé.

²⁰Du bowo dara di Stéfanus, saka-si Dité hitu, aku manga nituk, agu lorong laku pandé disé situ agu aku lami ceca disét mbelé hia.

²¹Maik mai taé de Mori Yésus agu aku: Ngoh ga, ai Aku jera hau ngo tadang oné wa’u-wa’u bana.”

²²Sanggéd taung lawa do situ dengé tombo di Paulus dengkir agu curup hitu: itu kali pu’ung ciékd: “Pandé mora ata ho’o oné mai lino ho’on! Toé kopn te moséy!”

²³Isé ruda kétas ciékd canggu agu peké jubad agu wécak kebok nggere-éta.

²⁴Landing hitu kepala tentera perénta kudut dadé hi Paulus nggere-oné mbaru de tentera agu jera peresa agu ongga hia, kudut ngancéng baé, co’o tara lawa do situ ciék nenggitud kamping hia.

²⁵Maik du pandé toko télan lisé hi Paualus, kudut onggay, mai taé diha ngong tentera situt lari dis: “Ngancéng méu ongga ata Roma, céwén kolé toé olong agily?”

²⁶Dengé curup hitus tentera hitu baro oné kepala tentera, mai taén: “Apa ata kudut pandé lité? Ata hitu ata Roma.”

²⁷Itu kali main kepala tentera hitu oné hi Paulus agu mai taén: “Tombo damang agu aku, tu’ung ko toé hau ata Roma?” Mai walé di Paulus: “Tu’ung.”

²⁸Mai kolé taé de kepala tentera hitu: “Kewarganegaraan hitu wegit kéta laku welin.” Mai walé di Paulus: “Maik aku manga hak hitu ali loas daku.”

²⁹Itu kali isé siot kudut ongga hia, hidi-hada hedongd; agu kepala tentera hitu kolé rantangy du pecing liha te hi Paulus hitut jera pongo liha cengata ata Roma.

³⁰Maik kepala tentera hitu nanang te pecing tu’ung apa kéta betuan toso data Yahudi situ agu hi Paulus. Landing hitu ného diangn hia jera dadé hi Paulus oné mai buin agu perénta kudut imam-imam kepala agu sanggéd Adak Agama nempungs. Itu kali dadé hi Paulus oné mai mbaru de tentera kudut cumang agu isé.