Read Manggarai TOMBO PÉTÉ GORI DE RASUL-RASUL 26 Bible Online

TOMBO PÉTÉ GORI DE RASUL-RASUL 26 - Manggarai bible

TOMBO PÉTÉ GORI DE RASUL-RASUL 26

¹Mai taé de raja Agripa ngong hi Paulus: “Hau ngancéng kambé weki rum.” Hi Paulus pépas limén, itu kali tombo kambé weki run, nggo’oy:

²“Io Raja Agripa, ontong kéta laku noingn, ai leso ho’o aku ngancéng kambé weki rug oné ranga dité, latang te sanggéd baro disét Yahudi kamping aku,

³céwén kolé ai ité pecing tu’u-tu’ung adak agu sanggéd mbolot data Yahudi. Landing hitu aku tegi agu ité, kudut séngét koé aku lité ali lembak.

⁴Sanggéd ata Yahudi pecing salang mosé daku pu’ung du rebag, ai du pu’ung mosé daku oné bahi-réha wa’u de rug oné Yérusalém.

⁵Béhéng kéta ga, isé pecing aku, agu émé ngoéngd isé, isé ngancéng téi saka-si, te aku poli mosé ného cengata ata Parisi lorong aliran ata céwé kerasn oné agama dité.

⁶Te ho’on aku paka beté-bicar landing kaut aku bengkes reké ata poli téi le Mori Keraéng latang te empo dité.

⁷Kudut cai reké situ siot géréng de campulusua panga dité, lari nggitun isé wié-lesod seber te ngaji. Ali bengkes hitu keraéng raja Agripa, aku baro lata Yahudi.

⁸Co’o tara toé ngancéng le nuk de méu, te Mori Keraéng pandé to’o kolé ata mata?

⁹Weki rug kaut aku manga bet kudut aku paka pandé ata mésén kudut léwang ngasang de Mori Yésus oné mai Nasarét.

¹⁰Apa hitu pandé kolé laku oné Yérusalém. Aku toé hanang na’a oné buis do kéta ata nggeluk, du aku poli tiba kuasa oné mai imam-imam kepala, maik lorong kolé laku, émé isé situ pandé matas.

¹¹Oné mbaru-mbaru ngaji, aku dondé wahéng isé agu denet isé kudut pali imbid agu ali cumpeng mésé aku dolong isé, ngot haéng oné béndar data.”

¹²“Lari nggitun du aku rémé cau kuasa mésé agu jera de imam-imam kepala du ngo oné Damsyik,

¹³ného-wetér kaut, yo Raja Agripa, aram du lésak-leso ita laku oné bahi-réha salang hitu, néra ata céwé gérak oné mai néra de mata leso, wa’u éta mai awang, oné weki daku agu sanggéd haé lako daku.

¹⁴Sanggég ami doal nggere-wa tana agu aku dengé reweng ata curup agu aku oné curup Ibrani: Saulus, Saulus, co’o tara mbelé Akum hau? Menan dé latang te hau koléng Hiat manga kuasan oné hau.

¹⁵Maik walé laku: Céi néng Ité Mori? Mai walé de Mori: Aku Mori Yésus hitut mbelé de hau.

¹⁶Maik ho’o ga, to’oh ga agu heséh ga. Aku toto wekig oné hau, kudut pilé hau ciri ata keturu laing agu saka-si latang te sanggéd cao-ca ata poli itad le hau oné mai Aku, agu latang te apa ata toto Laku cepisa oné hau.

¹⁷Aku te pandé selamak hau oné mai wa’u ho’o agu oné mai wa’u bana. Aku te wuat hau ngo oné isé,

¹⁸kudut cengka mata disé, kudut isé holés oné mai nendep nggere-oné néra agu oné mai kuasa de jing da’at nggere-oné Mori Keraéng, kudut isé ali imbid oné Aku, tiba ampong ndékoks agu tiba reco oné mai apa ata poli wérét latang te sanggéd ata nggeluk.

¹⁹Landing hitu yo Raja Agripa latang te ita hitut éta mai Surga, paka lorong tu’ungs laku.

²⁰Maik laring cain kéta aku keréba oné sanggén ata oné Damsyik, oné Yérusalém, agu oné temu tana Yudéa, agu oné wa’u bana, te isé paka tesers agu holés nggere-oné Mori Keraéng agu pandé sanggéd cao-ca lorong agu teserd hitu.

²¹Landing hitu tara dekog aku lata Yahudi oné Mbaru de Mori Keraéng agu damang te mbelé akus.

²²Maik ali campé de Mori Keraéng, aku ngancéng mosé kig dengkir te ho’on agu téi saka-si oné ata koé agu oné ranga data mésé. Apa situt keréba daku toé manga cebanan kolé oné mai apa ata poli tombo olod le nabi-nabi agu li Musa,

²³te Mesias paka ta’ong susay, agu te Hia ata laring cain ata to’o kolé oné mai ata matan agu te Hia ata keréba néra latang te wa’u ho’o agu latang te wa’u bana.”

²⁴Lari kéta tombo taung situ li Paulus kudut kambé weki run, mai taé di Féstus agu reweng mésén: “Wédol hau ko Paulus! Pecing dom situ pandé wédol hau.”

²⁵Maik mai walé di Paulus: “Keraéng Féstus ata hiang laku, aku toé manga wédolg! Aku kali curup ata molord agu ali nuk ata di’ad.

²⁶Keraéng Raja kolé pecing taung apa so’o, itu tara si’ang kéta laku tombod wa ranga diha. Pecing laku, toé manga can oné mai sanggéd so’o, ata toéd pecings liha, ai apa so’o toé jiri oné cikos.

²⁷Imbi lité ko Raja Agripa kamping nabi-nabi? Pecing laku ité kolé imbi oné isé.”

²⁸Mai walé di Agripa: “Téké cekoén kaut le hau pandé ciri ata Kristén aku!”

²⁹Mai walé di Paulus: “Aku kudut ngaji kamping Mori Keraéng, kudut gélang ko toé, toé hanang ité, maik sanggéd weki so’ot manga rangad, ata dengé tombo daku, ciri cama ného aku, landing toé mendo ho’o.”

³⁰Itu kali heséd raja agu gubernur nenggitu kolé hi Berniké agu sanggéd ata situt lonto cama-cama agu isé.

³¹Lari lako nggere-pé’angd, mai tombo cama taud: “Ata hitu toé manga pandé da’at ata naun te mbeléy ko buiy.”

³²Mai taé di Agripa agu hi Féstus: “Ata hitu ngancéng ledo gi, émé toé mboték hia oné ranga de Kaisér.”