Read Manggarai TOMBO PÉTÉ GORI DE RASUL-RASUL 27 Bible Online

TOMBO PÉTÉ GORI DE RASUL-RASUL 27 - Manggarai bible

TOMBO PÉTÉ GORI DE RASUL-RASUL 27

¹Du poli betén te ami lajar nggere-oné Italia, itu kali hi Paulus agu pisa taus ata bui bana téi oné cengata tentera, ngasangn hi Yulius oné mai tentera de Kaisér.

²Ami léti ca kepal oné mai Adramitium ata kudut ngo oné osang baté asi de kepal oné lupi nanga Asia, itu kali lako’gm. Hi Aristarkhus cengata ata Makédonia, oné mai Tésalonika cama laing agu ami.

³Ného diangn ami cénggo oné Sidon. Hi Yulius pandé di’a kéta agu hi Paulus, agu sendo te léjong oné haé-reban, kudut isé ngancéng campé sékék diha.

⁴Landing ali buru olo mai ami lajar nitu maigm lut lupi nanga Siprus.

⁵Du poli lagé tacik olo mai Kilikia agu Pamfilia, caik ami oné Mira, oné tana Likia.

⁶Nitu tentera hitu cumang ca kepal oné mai Aléksandria ata kudut lajar ngo oné Italia. Hia hésing ami nggere-oné kepal hitu.

⁷Tédéng pisa leso ami lajar, géréng toé ngancéng nggere-olog ami, agu nai-koégm cai oné Knidus. Ali buru caka ami te nggere-olokm, ami lajar lupi nanga Kréta lagé jok Salmoné.

⁸Du poli nai-koégm lagé jok hitu, caik ami oné ca osang, ngasangn Pelabuhan Indah, ruis béndar Laséa.

⁹Lari nggitun dod leso ata oké bod. Leso Puasa lagé gi agu ngancéng calang laing émé ruda olo lajar. Ali hitu hi Paulus langga isé, mai taén:

¹⁰“Asé-ka’én, pecing laku lajar dité ho’o ngancéng cumang agu susa mésé agu woréng mésé, toé hanang latang te mendo de kepal, maik latang te mosé dité kolé.”

¹¹Maik tentera hitu céwé imbi hiat juru mudi agu nakoda itu po curup di Paulus.

¹²Ai osang baté asi de kepal hitu toé kop kudut asi kepal lawang cekeng cés, do oné mai isé éng kaut kudut lajar kid agu damang kudut cai oné béndar Feniks, kudut ka’éng nitus lawang cekéng cés. Béndar Féniks ca osang asi kepal oné nuca Kréta, ata lénga nggere-salé.

¹³Du hitu buru sesol sili mai. Bet disé te apa ata nuk lisé toét-toé haéngy. Isé rongkas jangkar itu kali lajar ruis kéta lupi nanga Kréta.

¹⁴Maik toé béhéng poli hitu, cain oné mai nuca hitu buru warat, ata caron buru “Timur Laut.”

¹⁵Kepal hitu henay agu toé ta’ong dungkang buru olo mai. Landing hitu Kodak ami agu kongn kaut kepal dami lingu-langu.

¹⁶Poli hitu ami wa’a dengkir cai oné lupi nanga ca nuca koé ngasangn Kanda, agu nitu nai-koégm ami ngancéng haéng sekoci de kepal hitu.

¹⁷Du poli téti nggere-éta kepaln sekoci hitu, isé na’a ceca te campé ali pongo kepal hitu le wasé. Landing ali rantang te mena wa laing Sirtis, isé pandé wa’u layar agu kong kaut kepal hitu lénténgn.

¹⁸Landing mésé bail ami lingu-langu le buru warat, ali hitu ného diangn pu’ung isé oké mendo de kepal nggere-wa tacik.

¹⁹Oné leso te telun isé oké ceca de kepal ali limé de weki rud.

²⁰Du pisa lesog toé ita mata leso agu ntala éta awang agu buru warat nukung kéta nggeka amin, cemoln ga mora taungs bengkes dami kudut pandé selamak mosé dami.

²¹Ai béhéng isé toé hang, hesé hi Paulus oné bahi-réha isé agu mai taén: “Asé-ka’én, émé lorong le méu toing daku kudut ité néka lajar oné mai Kréta, ité toét-toé tadang oné mai pa’it agu woréng ho’o!

²²Maik te ho’on, oné pa’it ho’o, aku toing méu, kudut méu kong kin wingker kis, ai toé manga cengatan oné mai méu te ampus, hanang kepal ho’o.

²³Ai oné wié cengata malékat de Mori Keraéng ata io daku, paéng de Run, hesé oné racap daku,

²⁴agu mai taé diha: Néka rantang Paulus! Hau paka cumang agu Kaisér. Ata tu’ungn ali berkak de Mori Keraéng oné hau, sanggéd taung ata situt manga cama-cama agu haus oné kepal ho’o te selamaks.

²⁵Landing hitu asé ka’én, kong kin séméngaks! Ai aku imbi oné Mori Keraéng te sanggéd taung situ te jaris cama ného situt tombo agu aku.

²⁶Maik ité paka pandé mena kepal ho’o oné ca nuca.”

²⁷Wié te campulu patn cai gi, agu ami ngai lingu-langu oné tacik Adria. Maik aram le wié seréhang tana, isét anak de kepal noing lisé te isé néhot ruis tana masa.

²⁸Itu kali isé oké watu te damang agu tu’ung waé nitu aik patmpulu métér delémn. Du ngo nggere-olo kolés cekoén, wolo kolé lisé, aik telumpulu métér.

²⁹Ali rantang boto menak ami oné watu dampér, isé oké pat jangkar oné buritan agu mésé kéta bengkes dami kudut gélang koé gérakn tana.

³⁰Maik isét anak de kepal mengkek kudut losis oné mai kepal. Isé na'a sekoci agu pandé néhot isé kudut oké jangkar olo haluan.

³¹Landing hitu hi Paulus curup agu tu'a de tentera agu sanggéd tenteran: “Émé toé ka’éng oné kepals, isé toé ngancéng selamaks.”

³²Itu kali tentera-tentera situ pandé beté wasé sekoci agu kong kaut wa’ad.

³³Du tiong gérak tana hi Paulus bénta sanggéd ata kudut hang, mai taén: “Polig campulu pat leso, méu géréng kaut, ta’ong darém agu toé hangm.

³⁴Landing hitu aku toing méu, kudut méu olong hangm di. Apa hitu latang te selamak de méu. Toé manga cengatan oné mai méu ata mora ca lawar wuk oné mai sa’in.”

³⁵Du poli tombo nenggitun, hia emi roti, wali di’a kamping Mori Keraéng wa ranga de sanggéd isé, pati-patis liha, itu kali pu’ung hangd.

³⁶Sanggéd taung ata situ wingker kolés agu isé hang kolés.

³⁷Nekig ami oné kepal hitu sua ratus pitumpulu enem ata.

³⁸Du poli becurd, pandé géal lisé kepal hitu ali oké mendo gandum nggere-wa tacik.

³⁹Du kudut gérak tana isé ita ca jok tacik agu nanga ata béa kétay. Koném po toé baé lisé tana masa hitu, isé cenais kudut pandé mena kepal hitu nitu.

⁴⁰Isé lego wasé jangkar, situ wa tacik boné. Lari nggitun isé los wasé-wasé kemudi, téti layar todang kudut kepal hitu dur le buru nggere-pé’ang nanga.

⁴¹Maik isé hena wa laings, wiga mena kepal hitu. Olo main pacék nggere-way agu toé ngancéng hulin, agu musi main rewut ongga le bombang mésé.

⁴²Du hitu tentera-tentera nuk kudut mbelé ata bui, kudut néka manga ata losi ali anging.

⁴³Maik tentera situ nanang te selamak hi Paulus. Landing hitu hia ré’ing néka ruda olo nuk disé agu perénta, kudut sanggéd ata pecing anging olo isé nggere-wa tacik agu ngo nggere-lé tana masa,

⁴⁴agu kudut ata iwod lut musi maid ali paké banggang ko rewut de kepal. Nenggitu sanggéd taung isé selamak cai le tana masas.