Read Manggarai TOMBO PÉTÉ GORI DE RASUL-RASUL 4 Bible Online

TOMBO PÉTÉ GORI DE RASUL-RASUL 4 - Manggarai bible

TOMBO PÉTÉ GORI DE RASUL-RASUL 4

¹Du hi Pétrus agu hi Yohanés rémé tombod agu ata do, sanggéd imam agu hiat tu’a lamin Mbaru de Mori Keraéng agu ata Saduki mai cumang isés.

²Ata situ rabo kétas ai isé toing ata do agu keréba te oné Mori Yésus manga mosé kolé oné mai ata mata.

³Isé deko latas agu na’a oné buis, dengkir ného diang gulad, ai wiég tana.

⁴Maik oné mai isét dengéd toing situ, dod ata imbi wiga nekid isé aram lima sebus ata ronad.

⁵Ného diangn, sanggéd tu’a disét Yahudi agu isét ata pecing Taurat, lonto léoks oné Yérusalém

⁶agu Imam Mésé hi Hanas agu hi Kayafas, hi Yohanés agu hi Aléksandér agu sanggéd ata bana, isét waé de Imam Mésé.

⁷Itug kali hi Pétrus agu hi Yohanés, dadé nggere-oné ranga de tu’a situt lonto léok agu wangkag réin lisé, nenggo’oy, réid: “Ali kuasa diong ko le ngasang diong pandén le méu tanda lenget hitu?”

⁸Hi Pétrus ata penong le Nai Nggeluk walé isé situ: “Oé sanggés méut ata tu’a de ro’éng agu adak laing,

⁹émé ami ho’o réi ali ca pandé di’a latang te cengata ata beti agu paka tombo ali kuasa diong pandé inan ata hitu,

¹⁰kudut pecing di’a-di’a le méu agu le sanggén ro’éng Israél, te oné ngasang de Mori Yésus Krisrtus ata Nasarét hiot poli panggoln le méu, maik poli pandé mosé kolén le Mori Keraéng oné mai ata mata — landing ali Mori Yésus hitu tara ata ho’o hesé agu weki di’an wa ranga de méu te ho’on.

¹¹Mori Yésus hitu ného watu ata oké le tukang pandé mbaru — ngong weki rus méu — maik Hia poli ciri watu landukn.

¹²Toé manga selamak oné mai céi-céing kaut, hanang oné Hia, ai oné lino ho’o, toé manga ngasang cebana ata téi oné manusia, kudut le ngasang hitu ité haéng selamak.

¹³Du lonto léok hitu ita lisé toé kéta manga sesenga’id hi Pétrus agu hi Yohanés agu pecing te isét-sua situ ro’éng toé sekolas, lengets isé, agu pecing lisé isét-sua situ ata lorong Mori Yésus.

¹⁴Ai ali ita lisé ata hitut poli inan hesé baling racap de rasul situt sua, isé toé ngancéng léwang kolés.

¹⁵Du poli jera koléd lisé sanggéd rasul situ, bantang kolés isé,

¹⁶agu mai taéd: “Co’os lité pandéd ata so’o gé?” Ai poli pecing taung le weki Yérusalém te isé poli pandé tanda lengét ata dio-dolokn kéta, agu ité toé ngancéng pali koléy.

¹⁷Maik kudut apa hitu néka pecing taung le lawa-do, co’om ngereks lité agu ré’ing isé néka tombo kolé agu céing-céing kaut le ngasang hitu.”

¹⁸Du ngo oné kolés isét-sua, jeras lisé, kudut néka manga kolé tombo ko toing ata le ngasang de Mori Yésus.

¹⁹Maik walé di Pétrus agu hi Yohanés agu isé: “Wajo damang beté le rus kaut, nia ata molorn oné ranga de Mori Keraéng: lorong méu ko lorong Mori Keraéng.

²⁰Ai toé ngancéng hema kaut kami latangt apa ata poli ita agu dengé dami.”

²¹Tambang kéta cirangn ngerek disé kamping rasul-rasul situ, maik cemoln ga, lego kolés isé, ai lonto léok hitu toé manga ita salangn te wahéng isé, ai lawa-do naring Mori Keraéng lut tanda lenget hitut pandé di Pétrus.

²²Ai ata hitut poli inan le tanda lenget hitu, réci oné mai patmpulu ntaung mosén.

²³Woko poli legod, ngo hi Pétrus agu hi Yohanés oné weki serani tombo lisé sanggéd cao-ca situt curup le sanggéd imam kepala agu ata tu’a laingn oné isé.

²⁴Du dengé le weki-serani tombo situ, og kali ngaji camas nggere-oné Mori Keraéng: “Yo Mori, Ité ata dédék awang éta agu tanan wa, tacik agu sanggéd icin.

²⁵Le Nai Nggeluk loléng mendi-Rum hi Daud, ema dami, Ité manga rewengd: Co’o tara rabod sanggéd ata toé pecing Mori Keraéng, co’o tara sanggéd uku bantang ata toé manga betuan?

²⁶Sanggéd raja de lino mengkeks agu sanggéd ata tu’a laing, nempung te léwang Mori Keraéng agu Ata Palas Diha.

²⁷Ai cetu’ungn poli nempung oné béndar ho’o hi Hérodés agu hi Ponsius Pilatus agu sanggéd uku agu néténg panga Israél, dungkang Mori Yésus, Mendim hitut nggeluk agu Ata Palas le Rum

²⁸kudut pandé sanggéd cao-ca situt poli letid du pu’ung le kuasa agu ngoéng Rum.

²⁹Te ho’on yo Mori, lélo koé Lité ngerek disé, agu téi koé mberes oné sanggéd mendiM, kudut ba keréba reweng Dité.

³⁰Los koé limé Dité te pandé ina sanggén ata, agu pandé koé sanggéd tanda agu tanda lenget le ngasang de Mori Yésus, Mendi-Rum hitut nggeluk.

³¹Agu du rémé ngajid isé, gégoy osang baté lipur disé agu sanggéd taung isé penong le Nai Nggeluks, og kali keréba lisé sanggéd reweng de Mori Keraéng agu mberes kétas.

³²Sanggéd isét poli imbi situ, ca nai-ca tukas, agu toé manga cengatan te curup paéng diha hanang bora run, maik sanggéd cao-ca ciri paéng cama laings.

³³Agu ali kuasa mésé, sanggéd rasul téing saka-si latang te mosé kolé de Mori Yésus agu sanggéd taung isé mosé oné widang do de Mori Keraéngs.

³⁴Toé kéta manga ata géongn oné mai isé, ai sanggéd ata situt manga tana agu mbarud, pikas borad situ, agu cird oné mai pika situ ba taungs

³⁵agu na’a olo mai wa’i de sanggéd rasul, poli hitu pati-péars oné sanggén ata lorong agu sékékd.

³⁶Nenggitu kolé hi Yosép hitut le rasul-rasul caron hi Barnabas, ngong anak lémbu, cengata ata Lewi, ata loas oné Siprus.

³⁷Hia pika uma decuk run, og ba séngn situ agu na’a olo mai ranga de sanggéd rasul.