Read Manggarai TOMBO PÉTÉ GORI DE RASUL-RASUL 5 Bible Online

TOMBO PÉTÉ GORI DE RASUL-RASUL 5 - Manggarai bible

TOMBO PÉTÉ GORI DE RASUL-RASUL 5

¹Manga cengata ata rona ngasangn hi Ananias. Hia agu winan hi Safira pika ca uma decuk rud.

²Pecing kolé le winan te ronan po’és iwod séng oné mai pika uma hitu, agu iwod kolé ga ba agu téing oné rasul-rasul.

³Maik taé li Pétrus: “Ananias, co’o tara kuasa le jing da’atn nai de hau, wiga hau nggopét agu Nai Nggeluk agu po’é iwod oné mai pika tanam hitu?

⁴Émé toé pika le hau tana hitu, toé néng decuk de rum kin ko, agu woko polig pikan, toé weli kong ciri kuasa de rum? Co’o tara seduk kaut oné naim pandé hitu? Hau toé nggopét agu manusiah, maik nggopét agu Mori Keraéng.”

⁵Du dengén curup hitu, cembar hi Ananias agu roway. Sanggéd ata situt dengén tombo hitu, rantang kétas.

⁶Itug kali maid pisa taus ata reba, rokot le wuwus lisé rapu hitu, rakang nggere-pé’ang agu ngo boaky.

⁷Aik telu jam poli hitu, ngo onén wina di Ananias, maik toé pecing liha te polig rowan ronan.

⁸Mai taé di Pétrus ngong hia: “Tombo di’a-di’a agu aku, pisa kéta séngn tana hitut pika de méu?” Mai walé de iné-wai hitu: “Tu’ung cenggituy.”

⁹Mai taé di Pétrus: “Co’o tara cenai kétam méut sua te damang Nai de Mori Keraéng? Léloh ga, ata siot poli boak ronam, hesé bolon para agu isé kolé kudut rakang hau nggere-pé’ang.”

¹⁰Itu kali cembar kolé doaln iné-wai hitu olo mai wa’i di Pétrus agu rowan. Du ngo onéd ata reba situ, itag lisé, polig rowan, og kali rakang nggere-pé’angn, agu boak cimping boa de ronan.

¹¹Sanggéd weki serani agu sanggéd ata dengé tombo hitu, ciri rantang kétas.

¹²Dod gantang agu tanda lenget ata pandé le rasul-rasul oné bahi-réha ata do. Sanggéd ata situt imbi dondé neki-cas oné Kecaka Salomo agu cenai kétas.

¹³Sanggéd ata bana toé cukungd te lut neki-ca agu isé. Maik hiang kétas isé le ata do.

¹⁴Tambang cuku tambangs dod ata situt imbi Mori Keraéng, ata rona agu iné-waid.

¹⁵Dod kolé lawa dadé ata beti nggere-pé’ang salang mésé agu pandé halas lisé lobo wongka agu oné locé, kudut émé lako hi Pétrus, cala hena koé cengata-cengatan oné mai isé le nénu diha.

¹⁶Nenggitu kolé ata do oné mai baling béndar Yérusalém londang kéta maid agu dadé ata betis agu ata siot hena le damang de jing da’ats. Agu sanggéd taung isé situ pandé inas.

¹⁷Itug kali wangkag Imam Mésé agu sanggéd ata lutn, isét ata Saduki, toto kuasad, ai isé guér kétas.

¹⁸Rasul-rasul situ dekos lisé agu dadé isé nggere-oné bui.

¹⁹Maik le wié, cengata malékat de Mori Keraéng wuka taungs para bui hitu agu dadé isé nggere-pé’ang agu mai taén:

²⁰“Ngom ga, hesém oné Mbaru de Mori Keraéng, agu keréba taungs sanggéd reweng mosé situ oné sanggén ata.”

²¹Du poli dengé pedé hitu, du gérak tana, ngos isé oné Mbaru de Mori Keraéng, itus kali toing atad nitu. Du hitu kolé Imam Mésé agu sanggéd ata lutn jera nempung taungs sanggéd Adak Agama, sanggéd ata tu’an wa’u Israél, agu jera lisé, dadés rasul-rasul situ oné mai buid.

²²Maik du ata situt jera disé cai oné buis, toé manga cumang agu rasul-rasul situ. Og kali koléd agu tombo,

²³mai taéd: “Ami dumpu bui hitu ngai tadud paran, agu sanggéd isét lamin, ngai manga kid, hesé bolo mai para, maik du poli wukan lami, toé manga dumpu cengatan lami atan boné.”

²⁴Du Tu’a hitut lamin Mbaru de Mori Keraéng agu imam-imam kepala dengé baro hitu, bulés isé, latang te rasul-rasul situ agu réi apa péng ata jari laingn.

²⁵Maik rodo tuan cengata cumang agu isé agu mai baron: “Lélo, ata siot na’a oné bui le méu, manga oné Mbaru de Mori Keraéngs agu isé lari toing atad.”

²⁶Poli hitu, ngog tu’an agu sanggéd isét lami oné Mbaru de Mori Keraéng, og dadéd lisé rasul-rasul situ, maik toé onggas, ai rantangs isé, émé ata do situ peké isé le watu.

²⁷Isé dadé sanggéd rasul situ bolo mai ranga de Adak Agama. Itug kali Imam Mésé wangkag réi isén,

²⁸taén: “Ré’ing da’at kétap méu lami te toing oné Ngasang hitu. Kali po méu poli labokn Yérusalém ali toings, agu méu kolé kudut tanggong dara Data hitu oné ami.”

²⁹Maik walé di Pétrus agu rasul-rasul situ: “Ami paka céwé lorong Mori Keraéng itu po lorong manusia.

³⁰Mori Keraéng empo dité, poli pandé mosé kolé Mori Yésus hitut mbelé de méu, ali wéo Hia oné haju panggol.

³¹Hiap hitut poli téti nggere-étan le Mori Keraéng ali limé wanangN, ciri Karong Salang agu Ata Selamak, kudut tesers ata Israél agu tiba ampong ndékok.

³²Ami ho’o ata saka-sin sanggéd taung situ, ami agu Nai Nggeluk, ata widang le Mori Keraéng latang te sanggén ata situt lorong Hia.”

³³Déngé curup hitus, beti tu’ung naid haéd ata jelok atid, agu isé get kudut mbélé rasul-rasul situ.

³⁴Maik cengata ata Parisi oné Adak Agama hitu, ngasangn hi Gamaliél, cengata guru Wintuk Taurat, ata hiang kéta lata do, heséy, agu tegi, kudut sanggéd rasul situ jera nggere-pé’angs di cekoén.

³⁵Poli hitu hia tombo oné sidang hitu: “Oé ata Israél, nuk di’a-di’a, apa ata kudut pandé le méu, latang te ata so’o.

³⁶Ai danong poli tuan hi Téudas, ata caro weki run cengata ata pinto agu hia manga ata lutn aram pat ratus atas, maik hia mbeléy agu mbihi-mbehars ata situt lut agu morad.

³⁷Poli hia, du bilang kolé weki, tuan hi Yudas ata Galiléa. Hia karong lawa do oné rahan, maik hia kolé matay agu mbihi-mbehars sanggéd ata lutn.

³⁸Landing hitu aku taé agu méu: Néka pandé co’o-co’od ata so’o. Sondang kauts isé, ai émé get agu pandé disé mai oné mai manusia, toét-toé moras,

³⁹maik émé oné mai Mori Keraéng, méu toé ngancéng pandé mora sanggéd ata so’o, ngot méu kolé te dungkang agu Mori Keraéngm.” Tibay lisé toing hitu.

⁴⁰Isé bénta rasul-rasul situ, itus kali lucad lisé agu ré’ing isé néka toing le ngasang de Mori Yésus. Poli hitu legos lisé.

⁴¹Rasul-rasul situ pé’ang oné mai sidang de Adak Agama ali nisang naid, ai isé poli naun te ta’ong susa landing le ngasang de Mori Yésus.

⁴²Lété leso isé toing atas oné Mbaru de Mori Keraéng agu oné néténg-néténg mbaru agu wéro Keréba Di’a latang te Mori Yésus te Hia Raja Selamak hitut poli rekén.