Read Manggarai TOMBO PÉTÉ GORI DE RASUL-RASUL 6 Bible Online

TOMBO PÉTÉ GORI DE RASUL-RASUL 6 - Manggarai bible

TOMBO PÉTÉ GORI DE RASUL-RASUL 6

¹Du cekeng hitu, woko tambang cuku tambangs nekid ata nungku, manga kolé jugut oné mai isét Yahudi situt curup Yunanis kamping isét Ibrani, ai pati sékék lété leso, latang te ata luang disé toé bilang calas oné gori disé.

²Rasul situt campulusua bénta sanggéd ata nungku situ te nempung agu mai taéd: “Toé di’an émé ami hémong te keréba Reweng de Mori Keraéng méséng kaut te wintuk lompong de méu.

³Landing hitu asé-ka’én, pilé pitu taun oné mai méu, ata pecing taung lata te isé ata di’a, agu penong le Nai Nggeluk agu léwé nuk, kudut ami téti isé oné gori situ,

⁴agu kudut weki rug ami ngancéng nuk kanang ngaji agu ba keréba reweng de Morin.”

⁵Gejék hitu tiba di’a le weki serani, itug kali pilén hi Stéfanus, cengata ata imbi mésé agu penong le Nai Nggeluk, agu hi Pelipus, Prokhorus, Nikanor, Timon, Parménas agu hi Nikolaus, cengata ata lut agama Yahudi oné mai Antiokhia.

⁶Isé ngo oné ranga de rasul-rasul, og kali rasul-rasul situ ngajis agu témba liméd éta sa’i disé téing berkak.

⁷Reweng de Mori Keraéng tambang bekan, agu tambang kéta dod ata nungku oné Yérusalém, agu manga kolé imam situt condo wekid agu imbis.

⁸Hi Stéfanus hitut penong le widang agu kuasa, pandé tanda lenget agu gantang oné bahi-réha ata do.

⁹Maik tua kolé pisa taus ata oné mai ro’éng Yahudi ata carod Libertini (ata ledo oné mai mendid) — isé oné mai Kiréné agu Aléksandria — cama laing agu pisa taus ata Yahudi oné mai Kilikia, agu oné mai Asia. Isé léwang taud agu hi Stéfanus,

¹⁰maik isé toé ngancéng dungkang nai ngalis ata téing le Nai Nggeluk hitut susung hia te curup.

¹¹Itu kali isé pandé karu-kak pisa taus ata kudut taé: “Ami poli dengé hia loér hi Musa agu Mori Keraéng.”

¹²Ali hitu isé sosok ata dos agu tu’a-tu’a agu ata pecing Taurat, isé deko hi Stéfanus, sorok hia agu dadé hia oné ranga de Adak Agama.

¹³Itus kali toso ata saka-si adong, taéd: “Ata ho’o toé kéta hema bon tombo léwang osang nggeluk ho’o agu Wintuk Taurat,

¹⁴ai ami poli dengé hia tombo te Mori Yésus ata Nasarét hitu, te pandé renco osang ho’o agu caling adak dité, ho’ot mbaté di Musa oné ité.”

¹⁵Sanggéd ata situt lonto oné sidang Adak Agama hitu, lélo hi Stéfanus itu kali ita lisé ranga di Stéfanus cama ného ranga de cengata malékat.