Read Manggarai ROMA 11 Bible Online

ROMA 11 - Manggarai bible

ROMA 11

¹Landing hitu aku réi méu: Ngancéng Mori Keraéng te oké ro’éng Run? Toé ngancéng! Ai weki rug aku kolé ata Israél, oné mai waé di Abraham panga di Benyamin.

²Mori Keraéng toé ngancéng oké ro’éngn situt poli pilé Diha médé main. Ko toé pecing le méu ko, apa ata curup le Surak Nggeluk latang te hi Élia du hia baro isét Israél oné ranga de Mori Keraéng,

³“Mori, sanggéd nabi Dité poli taungs lisé mbeléd, sanggéd compang Dité poli taungs lisé pandé rencod, hanang koég aku kali ata ngai mosén, agu isé nanang te pandé mata akus.”

⁴Co’o curup de Mori Keraéng agu hia? “Ngai manga kid retang pitu sebu ata latang te Aku, ata toé dé’it manga io dewa Baald.”

⁵Nenggitu kolé té ho’on, manga kid retangd, ata poli piléd le Mori Keraéng lut tabingN.

⁶Émé pilé hitu jari ali tabing, ngong toé le pandé disé. Ai émé toé nenggituy, toé ngasang tabing koléy.

⁷Jari, co’o weli ga? Ata Israél toé manga haéng apa ata dolong disé, maik sanggéd ata situt poli piléd le Mori Keraéng haéng gi lisé. Agu sanggéd ata bana poli pandé teger naid,

⁸ného manga tulis, “Mori Keraéng pandé lémot isé, manga mata landing toé ita, manga tilu landing toé séngét, dengkir te ho’on.”

⁹Céwén kolé taé di Daud, “Kong demeng ramé disé, ciri serénté agu nggepit, watu timpok agu wahéng latang te isé.

¹⁰Agu kong kéta mata disé ciri nendep wiga toé itas, agu wekur disé kong wokusd.”

¹¹Landing hitu aku réi méu: Asa isét Israél, timpoks wiga ampus taungs? Toé nggituy! Maik ali lagé disé, selamak hitu cai oné wa’u banay, kudut pandé jogot isét Israél.

¹²Ai émé lagé disé, ciri bora latang té lino, agu genggel disé ciri bora latang te wa’u bana, céwén kolé besik disé.

¹³Aku taé agu méu, oé sanggés méut toé wa’u Yahudi. Méséng kaut aku rasul latang te sanggéd wa’u toé Yahudi, nisang kéta nai daku oné keturug.

¹⁴Bengkes daku ngancéng pandé jogot nai de wa’u daku Israél wiga ngancéng pandé selamak pisa atan oné mai isé.

¹⁵Landing le toé tiba isé le Mori Keraéng wiga mangan hambor Hia agu lino. Apan kolé émé tibas isé le Mori Keraéng, toé weli cama ného to’o kolé ata mata?

¹⁶Émé nggelukn kabo roti laring cain, sanggén kabo hitu kolé nggelukd; émé nggeluk wakéd haju, nggeluk kolé dangkad.

¹⁷Landing hitu émé pisad dangka haju zaitun, ngong ata Yahudi poli ndapud, agu méut ata toé Yahudi, cama ného cing siot tangkep oné dangka situt poli ndapud. Wiga méu kolé ného dangka ata tiba lahén onémai nunu de haju zaitun.

¹⁸Néka mésé-nai laing latang te sanggéd dangka situt poli ndapud! Émé mésé-nai méu, nuk dé, toé méu ata téi hang latang te waké hitu, maik waké hitu ata téi hang latang te méu.

¹⁹Aik méu te curup, mangas dangka ata ndapud, kudut aku te tangkep oné haju hituk.

²⁰Di’ab ga! Isé ndapus ali toé imbi, maik méu cedek kis ali imbi. Néka mésé-nai, maik rantang koém!

²¹Ai émé Mori Keraéng toé momang sanggéd dangka situt laring cain, Hia kolé toé momang méuy.

²²Landing hitu pélét di’a-di’a, Mori Keraéng hitu gawas agu wegerN. WegerN hitu latang te sanggéd ata situt poli pa’ud, maik gawasN latang té méu, tama kong kis méu manga oné gawas Diha. Émé toé, méu kolé te ndapum Liha.

²³Maik isé te tangkep kolés, émé isé teser onémai ndékokd, ai Mori Keraéng manga kuasan latang te tiba kolé isé.

²⁴Méu ného dangka haju zaitun hiot todo pina-naéng. Émé méu koném po dangka ata todo pina-naéng poli tangkep oné haju zaitun pu’u, céwén kolé isé so’o ata dangka pu’u, isé té tangkep oné haju zaitun de weki rud.

²⁵Asé-ka’én, kudut méu néka rékéng pintar weki rus, ngoéng daku kudut méu pecing pété ceha ho’o: Ata iwod oné mai isét Israél ciri teger naid dengkir sanggéd wa’u bana imbi oné Mori Keraéng.

²⁶Landing le hitu sanggéd ata Israél te selamak taungs, ného manga tulis: “Oné mai Sion kudut mai Ata Sambé, Hia kudut ledék sanggéd siot da’atd oné mai waé di Yakob,

²⁷Aku te pongo reké ho’o agu isé du Aku ampong sanggéd ndékok disé.”

²⁸Ali toé tiba Keréba Di’a, isé situ ata bali de Mori Keraéng te ontong latang te méu. Maik lorong pilé de Mori Keraéng, isé situ ata momang Diha landing kaut le empod.

²⁹Ai Mori Keraéng toé ngancéng emi kolés widang agu bénta Diha.

³⁰Danong méu toé imbi Mori Keraéng, maik te ho’on méu tiba momang Diha landing le toé lorong disét Yahudi.

³¹Te ho’on ga, isé toé imbi Mori Keraéng wiga ali momang hitut poli tiban le méu, isé kolé te tiba momang Diha.

³²Ai Mori Keraéng poli ondang sanggén ata te toé imbi, kudut Hia ngancéng toto momangN latang té sanggéd isé.

³³Olé, leng kéta monggu-roud bora momang, leng keta mésén anor agu pecing de Mori Keraéng! Tu’ung kéta, toé ngancéng pélétd lité sanggéd nggepuk Diha. Tu’ung kéta, toé ngancéng pecings lité salang Diha.

³⁴Ai céing ata pecing nuk de Mori Keraéng? Ko céing ata poli ciri ata toing Hia?

³⁵Ko céing ata poli téi cao-ca oné Hia wiga Hia paka lesings?

³⁶Ai sanggéd cao-ca oné mai Hiad, ali Hia, agu latang te Hia. Naring ga Hia dengkir tain! Amén.