Read Manggarai ROMA 12 Bible Online

ROMA 12 - Manggarai bible

ROMA 12

¹Landing hitu asé-ka’én, le gawas de Mori Keraéng, aku toing méu, kudut méu takung wekis ného takung mosé, nggeluk agu patun oné nai de Mori Keraéng: Hituy ngaji de méu ata naun.

²Méu néka lorong wintuk de lino ho’om, maik caling koé ali pandé weru wintuks, wiga méu ngancéng baé ngoéng de Mori Keraéng: Apa ata di’an, ata henan agu ata besikn oné Hia.

³Landing ali tabing ata téi oné aku, aku taé néténg méu: Néka mésé nai po apa ata cetu’ungn, maik damang maring wekis, lorong mésén imbi de méu hitut widang de Mori Keraéng.

⁴Cama ného weki manga do taran, maik toé sanggéd tara situ camas disd.

⁵Nenggitu kolé ité koném po ata dot, ciri ca wekit kali ai mosé cama agu hi Kristus, maik sanggéd ité woé-joé ného tara de ca weki.

⁶Nenggitut dé ité manga woléngd widang, lorong agu tabing hitut téi oné ité: Émé tabing hitu latang te pedé, pandé ga pedé hitu lorong agu imbi dité.

⁷Émé tabing latang te keturu, pandé ga keturu hitu; émé tabing latang te toing, toing ga;

⁸émé tabing latang té titong, titong ga. Céing ata pati cao-ca, pati agu ngalis nai; céing ata ciri adak laing, seber koé liha gorin; céing ata toto momangn, momang ga ali nisang nai.

⁹Momang hitu paka wa-mai nain! Tadang koés da’at agu pandé ata di’ad.

¹⁰Poro méu kali momang agu hiang taus cama ného asé-ka’é.

¹¹Néka ngondé holés, kong raka nais te keturu Mori Keraéng.

¹²Nakam ga landing le bengkes, lembak koém du kélo agu seber koém oné ngaji!

¹³Campé koé asé-ka’é serani ata géong, agu tiba asé-ka’é ata toko-rontong!

¹⁴Tegi le méu berkak latang te céi kaut ata wahéng méu, agu néka tegi te mawangs!

¹⁵Nakam ga agu ata naka, rétangm ga agu isét rétang!

¹⁶Nahé méu kali nai ca anggit, tuka ca léléng, néka manga mésé-nai, maik réncéng koém kali agu ase-ka’e ata lénggé. Néka mésé nai po apa ata cetu’ungn!

¹⁷Néka léko da’at ali pandé da’at, pandé kaut ata di’an latang te sanggén ata!

¹⁸Sanggés méu poro mosé hambor agu sanggén ata!

¹⁹Asé-ka’én ata momang laku, méu néka soléng kéta te tegi léko, kong Mori Keraéng ata lékon. Ai manga ata poli tulis: “Léko hitu hak Daku. Aku kali ata soléng léko,” curup de Mori Keraéng.

²⁰Maik, “Émé daremy ata balim, téi hia hang; émé masa waéy, téi hia inung! Ali pandé nenggitu, méu pandé ritak hiam, cama ného ongko wara api éta sa’in.”

²¹Méu néka koda le da’at, maik pandé koda da’at hitu le pandé di’a!