Read Manggarai ROMA 14 Bible Online

ROMA 14 - Manggarai bible

ROMA 14

¹Tiba koés ata siot toé mberes imbid, agu néka tombos sanggéd ba wekin.

²Manga ata imbi tu’ung te ngancéng hang sanggéd apa kaut ngoéngn, maik ata situt toé mberes imbi hang uté kanangs.

³Céi ata hang apa kaut néka mbéis ata siot woni, agu céi ata woni néka mbéis ata situt hang apa kaut, ai Mori Keraéng poli tiba ata hitun.

⁴Céing kéta hau, wiga hau mbéis mendi data bana? Koném hesé ko pa’u hia, hitu wintuk de mori run. Agu tu’ung hia té hesé kin, ai le kuasa de Mori Keraéng te hia ngancéng hesé kin.

⁵Manga ata rékéng leso ca céwé mésén oné mai leso bana, maik ata bana rékéng sanggéd leso cama kauts. Kong kaut néténg ata nuk oné nai run.

⁶Céing ata hitut petot kéta ca leso céwé mésén, pandé hitu diha latang te hiang Mori Keraéng. Céing ata hang apa kaut, pandé hitu liha te hiang agu te wali di’a oné Mori Keraéng. Céing ata woni, pandé hitu liha te hiang agu te wali di’a oné Mori Keraéng.

⁷Ai toé manga cengatan oné mai ité ata mosé latang te weki rud, agu toé manga cengatan ata mata latang te weki run.

⁸Ai mosé dité, mosé latang te Mori Keraéng, agu mata dité, mata latang te Mori Keraéng. Jari, mosé ko mata, ité ho’o paéng de Mori Keraéng.

⁹Ai latang te hitu muing hi Kristus poli matan agu mosé koléy, kudut ciri Mori data mata agu data mosé.

¹⁰Landing hau, co’o tara mbéis agu lenggad asé-ka’ém situt ca imbi? Ai sanggéd taung ité te kamping kudut tiba beté-bicar de Mori Keraéng.

¹¹Ai manga tulis: “Ata tu’ungn kéta, nenggituy curup de Mori Keraéng, sanggén taung ata te tikul bolo mai ranga Daku, agu bong Aku bolo-mai ranga de lawa do, ai Aku Mori Keraéng.”

¹²Nenggitu dé néténg ité, papong le weki rud sanggéd pandé dité oné ranga de Mori Keraéng.

¹³Landing hitu, ité néka manga kolé mbéis cama tau! Ata di’an ité cau kaut curup ho’o: Néka manga pandé pa’u ko pandé timpok ase-ka’e ca imbi!

¹⁴Ali neki ca agu Mori Yésus wiga pecing agu imbi tu’ung laku, toé manga ata rinekd oné cao-ca. Maik ciri rinek latang te ata hiot rékéng cao-ca hitu rinek’y.

¹⁵Ai émé hau pandé beti nai de asé-ka’ém situt ca imbi landing kaut cao-ca situt hang de hau, hau toé mosé lorong soléng de momang. Néka pandé copél asé-ka’é ca imbi ali hang de hau, ai hi Kristus poli mata latang te hian.

¹⁶Landing hitu néka ondang situt di’a latang te méu, ciri toé di’an latang te ata do.

¹⁷Ai adak de Mori Keraéng toé tombo hang agu inung, maik lorong ngoéng de Mori Keraéng, hambor-meler agu cembes oné Nai Nggeluk.

¹⁸Ai céi kaut te keturu hi Kristus ali pandé ho’o, hia hitu henan oné ranga de Mori Keraéng agu hiang le cama manusia.

¹⁹Landing hitu mait ga, léor hambor-meler agu pandé apa ata betua-laing kudut tambang mberés imbi cama tau.

²⁰Néka landing le hang, méu pandé da’at gori de Mori Keraéng! Sanggéd hang situ patun, maik calang ata hiot landing le hang diha, timpok laing latang te ata bana!

²¹Céwé di’an hau néka hang nuru ko inung anggor, ko pandé cao-ca wiga timpok laing latang te asé-ka’é ca imbi.

²²Apa kaut ata imbi de hau latang te hang agu inung, hitu nipu de weki rum agu Mori Keraéng. Mosé di’a hiat pandé lorong téti-nai run, ai hia toé wahéng weki run.

²³Maik céi kaut ata gégo-nai émé hang’y, hia wahéng weki run, ai toé pandé lorong imbin. Sanggéd cao-ca ata toé lorong imbi, hitu ngasangn ndékok.