Read Manggarai ROMA 15 Bible Online

ROMA 15 - Manggarai bible

ROMA 15

¹Ité ho’ot mberés paka tanggong les data toé mberés, agu ité néka kawé kaut di’a de rud.

²Néténg ata oné mai ité paka kawé di’a de cama haé atad, kudut tambang di’an latang te pandé maju.

³Ai hi Kristus kolé toé kawé latang te di’a kaut weki Run, maik ného manga ata poli tulis: “Curup renti disé, hitut renti Ité, poli hena akun.”

⁴Ai sanggéd cao-ca situt tulis danong, poli tulis kudut toing latang te ité, kudut ité mberés cau oné bengkes ali seber agu lémbu oné mai Surak Nggeluk.

⁵Nahé Mori Keraéng, pu’un seber agu lémbu, téi oné méu mosé ca nai-ca nuk, lorong agu ngoéng di Kristus Yésus,

⁶wiga ali ca nai agu ca reweng méu naring Mori Keraéng agu Ema Mori dité Yésus Kristus.

⁷Landing hitu, tiba ga cama taus cama ného hi Kristus kolé poli tiba itén, latang te naring Mori Keraéng.

⁸Betuan daku nggo’oy: Latang te molor de Mori Keraéng hi Kristus poli ciri ata keturu laing latang té ata sunat kudut te pandé mberés reké ata poli téi Diha latang te empo dité,

⁹agu latang te ngancéng sanggéd wa’u naring Mori Keraéngs landing le nabit Diha, ného manga tulis: “Landing hitu aku kudut naring Ité oné sanggéd wa’u agu déré mazmur latang te ngasang Dité.”

¹⁰Rudan ga: “Nakam ga, oé sanggéd wa’u agu sanggéd ro’éng Diha.”

¹¹Agu iwon ga: “Naring ga Mori Keraéng, oé sanggéd wa’u, agu kong kid sanggéd panga naring Hias.”

¹²Ruda olon ga mai taé di Yésaya, “Cocok oné mai pu’u di Isai te pary, agu Hia kudut to’oy latang te perénta sanggéd wa’u, agu oné Hias, sanggéd wa’u té pedeng bengkesd.”

¹³Nahé Mori Keraéng pu’un bengkes, penong oné méu ali naka agu hambor-meler oné imbi de méu, kudut ali mberes de Nai Nggeluk méu penong oné bengkes.

¹⁴Asé-ka’én, ata momang laku, weki rug aku imbi tu’ung latang te méu, te méu kolé penong le di’as agu ali sanggéd nggepuk agu ngancéng te toing cama taus.

¹⁵Maik ali tabing hitut poli téi de Mori Keraéng oné aku, aku le-lau rani koé cekoén poli tulis oné méu kudut nuk le méu,

¹⁶ngong te aku ciri ata keturu di Kristus Yésus latang te wa’u bana, ciri imam oné tombo Keréba Di’a de Mori Keraéng, kudut sanggéd wa’u bana ngancéng tibas le Mori Keraéng, cama ného takung ata henan oné ranga Diha, ata pandé nggeluks le Nai Nggeluk.

¹⁷Jari, oné hi Kristus aku ngancéng angos latang te keturu daku oné Mori Keraéng.

¹⁸Ai aku toé ngancéng rani te tombo latang te apa bana, hanang latang te apa ata poli pandé di Kristus lut aku, ngong kudut titong sanggéd wa’u bana nggere-oné lorong ali curup agu pandé,

¹⁹ali kuasa tanda dio-dolokn agu tanda lenget agu ali kuasa de Nai de Mori Keraéng. Nenggituy dé oné lako léok oné mai Yérusalém haéng oné Ilirikum, aku poli keréba taung Keréba Di’a di Kristus.

²⁰Oné keréba hitu rékéng laku ného hiang latang te aku, te aku toé pandé oné osang nia ngasang di Kristus poli pecing latan, kudut aku néka hesé oné salang ata poli na’an lata bana,

²¹maik lorong apa ata poli tulis: “Isét ata toé dé’it tiba keréba latang te Hia te ita Hias, agu isét ata toé dé’it dengé Hia te tingos.”

²²Itu tara mangam taung do’ong aku kudut la’at méu.

²³Maik te ho’on ai aku toé manga osang kudut té gori oné tana ho’o, agu ai aku poli pisa ntaung béhéngn nanang te la’at méu,

²⁴bengkes daku lari lako daku nggere-oné Spanyol, aku ngancéng cénggo oné osang de méu agu cumang agu méu, wiga méu ngancéng podo aku nggere-oné itu du poli cumang cekoén agu méu.

²⁵Maik te ho’on aku lari lakog nggere-oné Yérusalém kudut ba campé latang te sanggéd ata nggeluk.

²⁶Ai isét Makédonia agu ata Akhaya poli wérét kudut téi campé apa kaut latang te ata lénggé oné bahi-réha ata nggeluk oné Yérusalém.

²⁷Wérét hitu disé ali nai ngalis, agu hitu muing ata paka pandé disé. Ai émé sanggéd wa’u bana poli tiba paéng de wakar data Yahudi, itu tara paka isé kolé campé ata Yahudi ali paéng de lino ho’o disé.

²⁸Landing hitu, émé polis laku pandéd agu téi sanggéd campé de sanggéd wa’u bana situ agu isé, aku te ngo oné Spanyol lut béndar de méu.

²⁹Agu baé laku émé maik aku la’at méu, aku te pandé di’a-di’a ali penong berkak di Kristus.

³⁰Maik landing hi Kristus, Mori dité agu landing momang oné mai Nai Nggeluk, aku soka méu asé-ka’é, kudut tengger-molék agu aku oné ngaji kamping Mori Keraéng latang te aku,

³¹kudut aku cépé oné mai sanggéd ata toé lorong oné Yudéa agu kudut keturu daku latang te weki oné Yérusalém tiba di’a le sanggéd ata nggeluk nitu,

³²kudut aku ali nisang nai mai oné méu lorong ngoéng de Mori Keraéng agu géal-weki cama-cama agu méu.

³³Mori Keraéng pu’un hambor-meler, loréng agu méu! Amén.