Read Manggarai ROMA 16 Bible Online

ROMA 16 - Manggarai bible

ROMA 16

¹Tegi laku lélo de méu latang te hi Fébé, asé-ka’é ca imbi dité, hiat keturu latang te weki serani oné Kéngkréa

²kudut méu tiba hia le ngasang de Mori Keraéng, cama ného latang té ata nggeluk, agu téi campé latang te hia émé sékékn liha. Ai weki run hia poli téi campé latang té ata do, nenggitu kolé latang té aku.

³Téi koé tabé daku latang te hi Priskila agu hi Akwila, haé-réba gori daku oné Mori Yésus Kristus.

⁴Isé poli oké-moséd latang te mosé daku. Latang te isé, toé hanang aku te wali di’a, maik sanggéd weki serani siot toé ata Yahudi.

⁵Tabé kolé latang te weki serani oné mbaru disé. Tabé latang te hi Épénitus, asé-ka’é ca imbi ata momang laku, hia wua laring cain oné mai tana Asia latang te hi Kristus.

⁶Tabé latang te hi Maria ata poli gori nai-koén latang te méu.

⁷Tabé latang te hi Andronikus agu hi Yunias, asé-ka’é ca wa’u daku, isét poli dé’it bui cama laing agu akus. Isé ata hiang latas oné mai rasul-rasul agu poli mosé oné hi Kristus bolo-mai aku.

⁸Tabé latang te hi Ampliatus ata momang laku Oné Mori Keraéng.

⁹Tabé latang te hi Urbanus, haé-reba gori dami oné hi Kristus, agu tabé latang te hi Stakhis, ata momang laku.

¹⁰Tabé latang te hi Apélés, ata poli ta’ong susa oné hi Kristus. Tabé oné isét ka’éng oné mbaru di Aristobulus.

¹¹Tabé latang te hi Hérodion, haé-reba ca wa’u daku. Tabé latang té isét oné mbaru di Narkisus ata manga oné Mori Keraéng.

¹²Tabé latang te hi Triféna agu hi Trifosa ata gori nai-koén oné keturu latang te Mori Keraéng. Tabé latang te hi Pérsis ata momang laku, ata poli gori nai-koén oné keturu latang te Mori Keraéng

¹³Tabé latang te hi Rufus ata poli pilin oné Mori Keraéng agu tabé latang té enden, agu latang te aku kolé endé laingy.

¹⁴Tabé latang te hi Asinkritus, hi Flégon, hi Hérmés, hi Patrobas, hi Hérmas agu sanggéd asé-ka’é ca imbi ata cama laing agu isé.

¹⁵Tabé latang te hi Filologus agu hi Yulia, hi Néréus agu wetan agu hi Olimpas, agu latang te sanggéd ata nggeluk situt cama-cama agu isé.

¹⁶Tabé koé-kis cama taus ali omo nggeluk. Tabé latang te méu oné mai sanggéd weki serani di Kristus.

¹⁷Maik aku toing méu asé-ka’én, kudut méu néka témo agu isé siot pandé biké agu watu do’ong ata toé cumang taud agu toing situt poli tiba de méu. Tadang koé agu isé!

¹⁸Ai sanggéd ata nenggitu toé keturu latang te hi Kristus, Mori dité, maik keturu kaut tuka rud. Ali curup ata di’an agu ali curup ata mecikn isé nggopét atas siot lulus naid.

¹⁹Tombo latang te lorong de méu poli taung dengén le sanggén ata. Landing hitu naka kétak aku latang te méu. Maik ngoéng daku kudut méu nggalas oné apa ata di’an agu nggélok latang té ata da’at.

²⁰Mori Keraéng pu’un hambor-meler te gélang pandé ampus jing da’at be-wa mai wa’i de méu. Tabing de Mori Yésus, Mori dité, loréng méu!

²¹Tabé latang te sanggés méu oné mai hi Timotéus, haé-reba oné gori daku, agu oné mai hi Lukius, hi Yason agu hi Sosipatér, haé-reba daku ca wa’ukm.

²²Tabé oné Mori Keraéng latang te sanggés méu, oné mai hi Tértius, aku ata tulis surak ho’o.

²³Tabé latang te méu oné mai hi Gayus ata téi mbaru agu aku agu latang te sanggéd weki serani. Tabé latang te méu oné mai hi Érastus, bendahara (ata cau séng) disét ngara tana agu oné mai hi Kwartus, asé-ka’é ca imbi dité. [

²⁴Tabing de Yésus Kristus Mori dité, loréng sanggés méu! Amén.] [

²⁵Latang te Hia ata manga kuasan pandé mberés méu — lorong Keréba Di’a hitut mésé ngasangn agu keréba latang te Mori Yésus Kristus, lorong agu céngkan pété ceha hitut ceha médé main,

²⁶maik te ho’on poli toton agu lorong perénta oné mai Mori Keraéng hitut tédéng lén, poli keréban le surak de nabi-nabi latang te sanggéd wa’u kudut titong isé nggere-oné lorong imbi —

²⁷oné Hia, hanang Hia kali Mori Keraéng ata penong le mbeko lut hi Yésus Kristus: Sanggéd mengit latang te tédéng lén! Amén.]