Read Manggarai ROMA 2 Bible Online

ROMA 2 - Manggarai bible

ROMA 2

¹Landing hitu, oé manusia, céing kéta hau, tara beté-bicar ata bana. Hau toé manga tanjéng te kambé weki rum. Ai ali beté-bicar ata, hau te beté-bicar weki rum. Ai hau hitut beté-bicar ata bana, pandé apa ata camas.

²Maik baé lité te wahéng de Mori Keraéng pandé ali agil tu’ung latang te isét pandé nenggitu.

³Agu hau, oé manusia, haut beté-bicar isét pandé nenggitu, kali po weki rum hau kolé pandé nenggitu. Co’o nuk de hau, te cépé oné mai wahéng de Mori Keraéng?

⁴Asa nuk émong kaut le hau gawas Diha, lembak Diha, agu ngéngga nai Diha? Toé baé le hau ko, te gawas de Mori Keraéng te titong hau kudut teserh?

⁵Maik ali cirang de naim hitut toé ngoéng te teser, hau pandé tambang lésu latang te weki rum du leso te toto agil agu wahéng de Mori Keraéng.

⁶Hia te léko néténg ata, lorong agu pandén.

⁷Mosé tédéng lén latang te isét seber pandé di’a, kawé naring, hiang agu toé ampus.

⁸Maik rabo agu cumpeng da’at oné isét kawé sékék de rud, ata toé lorong Hia, maik ata lorong gauk da’at.

⁹Kélo agu singsara te cai oné néténg ata situt pandé da’at, laring cain kéta oné ata Yahudi agu oné ata Yunani.

¹⁰Maik naring, hiang agu hambor-meler te tiba le sanggén ata situt pandé di’a, laring cain kéta oné ata Yahudi agu ata Yunani.

¹¹Ai Mori Keraéng toé manga lélo taran ata.

¹²Ai sanggéd ata ndékok ali toé pecing wintuk Taurat, te wahéng taungs toé le lut wintuk Taurat. Agu sanggéd ata ndékok situt lorong wintuk Taurat te beté-bicars lut wintuk Taurat.

¹³Ai toé ata séngét wintuk Taurat ata molor oné ranga de Mori Keraéng, maik ata pandé wintuk Taurat, hitus kali ata molord.

¹⁴Ai émé uku bana situt toé pecing wintuk Taurat, ali nuk de weki-rud, pandé apa situt jera oné wintuk Taurat, isé situ ciri wintuk Taurat latang te weki-rud, koném po isé toé paéng wintuk Taurat.

¹⁵Ali hitu isé toi te icin wintuk Taurat, manga tulis oné nai disé. Ici nai disé te toto sala agu molor le nuk de weki rud.

¹⁶Nenggitu dé tai du leso de Mori Keraéng lut hi Kristus Yésus, te beté-bicar sanggéd cao-ca situt pété ceha oné nai de manusia lorong agu Keréba Di’a ho’ot wéro daku.

¹⁷Hau caro weki rum ata Yahudi. Hau deming oné wintuk Taurat, angos oné Mori Keraéng,

¹⁸agu baé ngoéng Diha, agu ali toing oné wintuk Taurat ngancéng pecing nia ata di’an agu nia ata toén.

¹⁹Tu’ung kéta hau te karong ata buta agu ba néra latang te isét oné nendep.

²⁰Hau ata toing isét bodok, agu guru latang te isét toéd bisas, ai oné wintuk Taurat, hau paéng toming nggalas-nai agu molor.

²¹Ba’ang néng ga, hau ata toing ata bana, toé toing kolé weki rum? Hau ata toing, “Néka tako,” co’o tara weki rum hau tako?

²²Hau ata taé, “Néka ngoéng ata,” co’o tara weki rum hau ngoéng atah? Hau ata ning sanggéd io pina-naéng, co’o tara weki rum hau anggé-rep mbaru latang te ba takung?

²³Hau angos ali wintuk Taurat, co’o tara weki rum hau loér Mori Keraéng ali lagé wintuk Taurat hitu?

²⁴Cama ného manga tulis: “Ai landing méu kaut tara loér ngasang de Mori Keraéng oné bahi-réha uku bana.”

²⁵Bo tu’ung sunat manga betuan, émé hau lorong wintuk Taurat, maik émé lagé le hau wintuk Taurat, sunat hitu de hau oké-bon.

²⁶Jari, émé ata toé sunat lorong taungs jera oné mai wintuk Taurat, toé weli hia cama ného ata hiot poli sunatn?

²⁷Agu ata siot lorong wekid toé sunats, maik pandéd lorong wintuk Taurat, te beté-bicar méu ata lagé wintuk Taurat, koném méu poli sunat agu manga wintuk ata poli tulisd.

²⁸Ai ata Yahudi tu’ung, toé ata siot caro wekid ata Yahudi; agu ata sunat tu’ung toé ata siot sunat kaut lorong wekid.

²⁹Maik ata Yahudi tu’ung, ngong ata siot toé ita dungka kéta Yahudin; agu ata sunat tu’ung, ngong ata sunat oné nain, toé sunat kaut oné wekin. Naring latang te ata nenggitu, toé oné mai manusian, maik oné mai Mori Keraéng.