Read Manggarai ROMA 3 Bible Online

ROMA 3 - Manggarai bible

ROMA 3

¹Émé nggitu gi, apa nahéng data Yahudi agu apa betuan sunat?

²Do kéta nahéng agu do kéta betuan. Laring cain kéta: Ai oné isé kéta imbin curup de Mori Keraéng.

³Jari, co’o gi, émé oné mai isé manga ata toé junggu, ngancéng toé junggu disé hitu pandé toé junggu kolé Mori Keraéng?

⁴Toé ngancéng! Ngot: Mori Keraéng hitu molor, maik sanggén manusia ata nggopét, ného manga tulis: “Kudut Ité tu’ung-tu’ung molord oné sanggéd curup Dité, agu ontong émé Ité hena le beté-bicar.”

⁵Maik émé ali toé molor dité toi molor de Mori Keraéng, apa ata kudut ngancéng curupn lité? Asa toé agiln Mori Keraéng émé Hia toto rabon? — (curup daku ai aku manusiak).

⁶Toé ngancéng! Émé nggitu gi, co’oy Mori Keraéng ngancéng beté-bicar lino ho’o?

⁷Maik, ali nggopét daku molor de Mori Keraéng tambang lanar latang te bong Diha, co’o tara aku beté-bicar kig cama ného ata ndékok?

⁸Co’o tara toé nggo’on taé dité, “Mait ga ité pandé da’at kudut tua ata di’ad?” Bo tu’ung manga loér data ata curup te ité taé nenggitu. Ata nenggitu patun te tiba wahéng.

⁹Jari, co’o gi? Tu’ung kétat ité ho’o manga labid oné mai ata bana? Toé kéta manga. Ai béta hio bao, poli mangkong ata Yahudi ko ata Yunani té sanggéd taung isé wa-mai kuasa de ndékok,

¹⁰ného manga tulis: “Toé manga ata molor, cengatan koé toé.

¹¹Toé manga cengatan koé ata manga utekn toé manga cengatan koé ata kawé Mori Keraéng.

¹²Sanggén ata poli wanta, sanggéd taung isé toé manga betuad toé manga ata pandé di’a, cengatan koé toé.

¹³Ngarek disé cama ného boa hiot lénga kin lema disé sawal mtaung wiwir disé penong le upas.

¹⁴Mu’u disé penong ali sumpa te mawang

¹⁵wa’i disé gélang latang te bowo dara.

¹⁶Renco agu ampus wécak lisé oné salang’d

¹⁷agu salang hambor toé baé lisé

¹⁸Hiang Mori Keraéng toé manga oné isé.”

¹⁹Maik baé lité te sanggéd cao-ca ata poli tulis oné Surak Taurat, latang te ata siot mosé lorong wintuk Taurat, kudut tadu néténg mu’u, wiga temu tana lino be-wa mai beté-bicar de Mori Keraéng.

²⁰Ai toé manga cengatan ata molorn oné ranga de Mori Keraéng le pandé wintuk Taurat, ai landing wintuk Taurat pecing ndékok lata.

²¹Maik té ho’on koném toé ali wintuk Taurat, Mori Keraéng tiba manusia, ai poli toton cama ného saka-si oné Surak Taurat agu sanggéd Kitab oné mai sanggéd nabi.

²²Ngong Mori Keraéng tiba sangged manusia le imbi oné Yésus Kristus, toé manga woléngd.

²³Ai sanggéd ata poli pandé ndékok agu pandé mora mengit de Mori Keraéng,

²⁴agu ali tabing Diha poli tibad kaut Liha lut sambé oné hi Kristus Yésus.

²⁵Hi Kristus Yésus poli petokn le Mori Keraéng lut singsara Diha, kudut ciri salang hambor latang te sanggéd ata imbi oné Hia. Ho’o pandé le Mori Keraéng kudut toto agil’N, ai Hia poli ampong kaut ndékok situt poli jarid médé du lari ngénggan nai Diha.

²⁶Betuan Diha, nggo’o; kudut toto agil Diha oné uwa ho’o, te Hia agil agu tiba sanggéd ata imbi oné Mori Yésus.

²⁷Émé nggitu gi, apa kéta pu’un latang te angos? Toé manga! Pu’ung ali raja apa kéta? Ali raja pandé ko? Toé, maik ali raja imbi!

²⁸Ai pecing lami te manusia tiba le Morin ali imbi, toé ali pandé wintuk Taurat.

²⁹Ko asa néng, Mori Keraéng hitu hanang Mori Keraéng data Yahudi kanang? Toé néng Hia kolé Mori Keraéng data uku bana? Io, tu’ung. Hia kolé Mori Keraéng data uku bana!

³⁰Émé tu’ung ca-y kali Mori Keraéng hitu, Hia te tiba sanggéd taung ata imbi, ata sunat ko ata toé sunat.

³¹Émé nenggitu, ngancengk weli ami te koar wintuk Taurat méséng imbi? Toé kolé nggitu! Ngot ami pandé ndeng wintuk Taurat.