Read Manggarai 1 KORINTUS 2 Bible Online

1 KORINTUS 2 - Manggarai bible

1 KORINTUS 2

¹Asé-ka’én, nenggitu kolé du aku mai oné méu, aku toé mai ba keréba hitu le go’ét ko ata penong le widang de lino kudut keréba pété céha de Mori Keraéng oné méu.

²Ai aku poli wérét kudut toé ba keréba bana oné beréha méu, hanang keréba Mori Yésus Kristus hitut poli panggoln.

³Du ka’éng oné beréha méu, aku déméng les’g, rantang agu jejer’k.

⁴Sanggéd curup daku, ko keréba daku toé tombos laku ali penong le widang de lino, maik ali imbi oné kuasa de Nai Nggeluk.

⁵Kudut imbi de méu néka wéo oné nggalas de manusia, maik wéo oné kuasa de Mori Keraéng.

⁶Koném po nggitu ami ba keréba nggalas oné isét poli mentengd, ngong nggalas ata toé mai oné-mai lino ho’on, agu toé oné-mai isét cau kuasa de lino. Ai ata cau kuasa situ kudut pandé mora’s.

⁷Maik situt keréba dami, nggalas de Mori Keraéng. Nggalas hitu toé ita le matas agu pété cehas latang te lino ho’o, maik poli mengkekd le Mori Keraéng latang te angos dité du toé di dédékn lino ho’o.

⁸Toé manga oné-mai ata cau kuasa de lino ata pecing nggalas de Mori Keraéng, ai émé pecing lisé, toé panggol lisé Mori Yésus hitut mengit.

⁹Ného ata poli tulis: “Apa kaut ata toé dé’it ita le mata, toé dé’it dengé le tilu, toé dé’it tua oné nai de manusia: Sanggéd taung situ poli mengkekd le Mori Keraéng latang te isét momang Hia.”

¹⁰Ai latangt ité Mori Keraéng poli si’angn le Nai Nggeluk, ai Nai Nggeluk hitu ata kawé polok sanggéd cao’ca, ngot apa ata cehad oné weki de Mori Keraéng.

¹¹Céing oné-mai itét manusia ata pecing ici nai siot manga oné weki de manusia? Hanang nai de run manusia hitu. Nenggitu kolé néng, toé manga cengatan manusia ata pecing ici nai de Mori Keraéng, hanang Nai de run Mori Keraéng.

¹²Ité toé tiba nai de lino, maik nai de Mori Keraéng, kudut pecing lité apa ata widang Diha latang te ité.

¹³Émé téntang lami sanggéd cao’ca latangt Mori Keraéng oné isét tiba Nai Nggeluk, ami te curup sanggéd widang de Mori Keraéng ata toing le Nai Nggeluk, toé le nggalas de manusia.

¹⁴Maik manusia siot paéng de lino ho’o toé tiba apa ata mai oné-mai Nai Nggeluk, ai le nuk nai disé, widang hitu néhot pandé bodok laing, agu isé toé ngancéng pecing, ai nggalas hitu ngancéng wolo’n hanang le widang de Nai Nggeluk.

¹⁵Manusia ata tiba widang nggeluk ngancéng wolod sanggéd cao-ca, maik latang te weki run hia toé ngancéng wolo lata bana’y.

¹⁶Ai manga tulis: “Céing ata pecing nuk de Mori Keraéng, wiga ngancéng toing Mori Keraéng?” Maik ami paéng nuk di Kristus.