Read Manggarai 1 KORINTUS 4 Bible Online

1 KORINTUS 4 - Manggarai bible

1 KORINTUS 4

¹Nahé ata lélo ami: Cama ného mendi di Kristus, hiot imbi le Mori Keraéng te caun pété ceha adak Surga.

²Cemoln, isét keturu paka ciri mendi di Kristus kudut isé ngancéng imbi le Mori Keraéng.

³Latang te aku toé manga co’o laingn, koném po aku beté-bicar le méu ko beté-bicar le manusia. Aku kolé toé gorig te beté-bicar weki rug.

⁴Ai baé laku, aku toé manga salag, landing toé le hitu aku ciri molork, maik Mori Keraéng ata beté-bicar akuy.

⁵Landing hitu néka beté-bicar émé toé di hitu redun, ngong émé toé di mai Mori Keraéng. Hia te pandé gérak apa situt ceha oné nendép, agu Hia kudut totos apa situt nanéng oné nai. Du leson tai, néténg ata kudut tiba naring de Mori Keraéng.

⁶Ase ka’én, sanggéd curup situ bebolod te hena kolé oné weki rug aku agu hi Apolos, landing te di’a méu. Kudut oné-mai tuming dami, pecing le méu apa betuan go’ét ho’o: “Néka lagé ata poli tulis.” Kudut néka manga oné-mai méu ata mésé nai ali méséng kéta hiat cengata oné-mai ata bana.

⁷Ai céing ata bilang hau ciri ata mengit? Apa néng ata manga oné hau ata toé tiba oné-mai Mori Keraéng? Émé tu’ung tibas le hau, co’o weli tara pandé angos weki rum, néhot paéng de rum?

⁸Méu poli becurs, poli ciri boras, poli ciri rajas, maik ami toé. Oé, céwé di’an émé tu’ung méu poli ciri rajas, wiga ami kolé lut méu ciri rajakm.

⁹Ai lorong nuk daku, Mori Keraéng poli téing oné ami sanggéd rasul osang ata taki-wan, cama ného ata siot poli beté-bicar kudut matas. Ai ami poli ciri ata te porong laing latang te lino ho’o, latang te malékat-malékat agu latang te manusia.

¹⁰Ami ciri bodok ali imbi oné Kristus, maik méu ciri nggalas ali imbi oné hi Kristus. Ami les, maik méu mberes. Méu mengitm, maik ami ciri ata bocik.

¹¹Dengkir ho’og ami darem, masa waé, lacokm, ongga latakm, agu mosé lé-lau kaut,

¹²agu pandés lami sanggéd gori ata mendod. Émé tidakm lata, ami berkak isé situ, émé onggakm lata, ta’ong kaut lami,

¹³émé loérkm lata, walé joél isé lami, ami cama ného wéang de lino, cama ného saki oné-mai sanggéd cao-ca dengkir te ho’on.

¹⁴Sanggéd taung so’o tulis taungs laku, toé kudut pandé ritak méu, maik kudut wahéng méu sanggéd anak ata momang daku.

¹⁵Ai koném capa kauts dod guru ata toing méu te lorong hi Kristus, toé dod ema de méu. Aku dé ema de méu ata lorong Kristus Yésus, ai aku ata wéro Keréba Di’a hitu oné méu.

¹⁶Landing hitu aku toing méu: Lorong koé le méu toming daku!

¹⁷Landing le hitu tara wuatn laku hi Timotéus. Hia anak momang daku, ata junggu oné Mori Keraéng. Hia kudut pandé nuk taungs le méu, co’o mosé daku ali lorong hi Kristus Yésus, cama ného ata toing daku oné nia-nia kaut wan ata serani.

¹⁸Maik manga pisa taus oné-mai méu ata ciri mésé nais, ai bet disé aku toé mai kolék.

¹⁹Maik aku kudut gélang ngo oné méuk, émé ngoéngn Mori Keraéng, agu aku kudut baé toé latang te curup data situt mésé nai, maik ngong mberes disé.

²⁰Ai adak de Mori Keraéng toé oné-mai tombo, maik oné-mai kuasa.

²¹Apa weli ngoéng de méu ga? Aku paka ngo oné méu agu lecék méu, ko ali momang agu lembés?