Read Manggarai 1 KORINTUS 6 Bible Online

1 KORINTUS 6 - Manggarai bible

1 KORINTUS 6

¹Asa néng, manga weli cengatan oné-mai méu émé manga léwang tau agu ata banay, ngancéng mboték oné ata toé imbi, maik toé oné ata imbi?

²Toé baé le méu ko, te ité kudut beté-bicar lino ho’o? Émé beté-bicar lino ho’o manga oné limé de méuy, ma’ut toé ngancéng le méu te wintuk caca mbolot situt toé manga betua laingd?

³Toé baé le méu ko, te ité kudut beté-bicar malékat-malékat? Jari, apan kolé latang te caca mbolot oné mosé dité lété leso.

⁴Koném po nenggitu, émé méu paka wintuk caca mbolot so’ot laséngd, méu néka téi wintuk hitu oné isét ata toé weki serani.

⁵Curup daku ho’o kudut pandé ritak méu. Toé kéta manga cengatan oné-mai méu paéng nggalas, ata ngancéng wintuk caca mbolot oné-mai asé-ka’é ca imbis?

⁶Asa weli ga, asé-ka’é hitut ca imbi ngancéng mboték oné asé-ka’é bana, agu nonong kéta oné ata siot toé imbis?

⁷Émé manga kaut mbolot oné bahi-réha méu, manga ata léwang tau, cama ného ca koda latang te méu. Co’o tara toé ngoéngs méu te tiba susa ali toé agil? Co’o tara toé ngoéngs méu tiba woréng?

⁸Maik weki rus méu pandé toé agil agu pandé woréng ata ali sabi nggopét, agu ngot toé agil hitu pandé le méu kamping asé-ka’é ca imbis.

⁹Toé baé le méu ko, te ata situt toé agil, toé manga osangd oné adak de Mori Keraéng? Néka wéléng! Loma ata, io pina-naéng, ngoéng ata, ata rona ngoéng taud cama ata ronad,

¹⁰ata tako, ata gopa, ata langu, loér ata, agu ata nggopét, toé kéta manga osangd oné adak de Mori Keraéng.

¹¹Pisa taus oné-mai méu bo tu’ung pandé nenggitus olo. Maik méu poli téi wekis kudut pandé nggélok, méu poli nggeluks, méu poli pandé molors oné ngasang de Mori Yésus Kristus agu oné Nai Nggeluk.

¹²Taé data, “Sanggéd cao-ca naud kéta taung,” maik latang te aku toé sanggéd taung manga betuad. Sanggéd cao-ca naud taung latang te aku, maik aku toé ondang wekig te mendi de sanggéd cao’ca situ.

¹³Manga kolé ata taé nenggo’o, “Hang latang te tuka agu tuka latang te hang,” maik hang ko tuka te pandé ampus tai le Mori Keraéng. Ai weki toé latang te pandé loma, landing latang te keturu Mori Keraéngy, agu Mori Keraéng latang te tinu weki.

¹⁴Mori Keraéng ata pandé to’o kolén Mori Yésus, nenggitu kolé ité te pandé mosé kolé ali kuasa Diha.

¹⁵Nuk dé, te sanggés méu ného nggota weki di Kristus. Jari, ngancéng weli laku emi nggota di Kristus hitu te ciri nggota weki data mbérong? Toé!

¹⁶Toé baé le méu ko, te céi kaut ata neki agu iné-wai mbérong ciri ca wekis agu hia? Ai nggo’o taé de Surak Nggeluk: “Isét sua ciri ca wekis.”

¹⁷Maik céi ata ulu-pukul agu Mori Yésus ciri ca nai agu Hia.

¹⁸Jari, néka loma ata! Néténg ndékok bana ata pandé le manusia, toé hena dungka wekin. Maik ata pandé loma tau, te copel wekin.

¹⁹Toé baé le méu ko, te sanggéd weki de méu ciri osang baté ka’éng de Nai Nggeluk ata poli tiba le méu oné-mai Mori Keraéng? Méu toé paéng de rus.

²⁰Ai méu poli welis agu poli bajar taungs le Mori Keraéng: Landing hitu bong koé Mori Keraéng le weki de méu!