Read Manggarai 2 KORINTUS 11 Bible Online

2 KORINTUS 11 - Manggarai bible

2 KORINTUS 11

¹Céwé di’an émé lembaks méu latang te bodok daku hitut koé kauty. Bo tu’ung lembaks méu latang te aku!

²Ai aku kembung méuk neho kembung de Mori Keraéng. Ai aku poli pandé naca méu agu cengata ata rona, kudut dadé méu ného ata molas nggeluk oné hi Kristus.

³Maik aku simpung kolék, émé nuk de méu wéléng kolé te toé junggu oné hi Kristus, cama ného hi Hawa danong hena le nggopét de ular hitut jondér.

⁴Ai hema kaut méu, du manga ata mai keréba Mori Yésus cebana, hiot dion agu Mori Yésus hitut poli keréba dami, ko téing oné méu nai bana ata dion oné mai Nai Nggeluk hitut poli tiba de méu, ko keréba bana oné mai Keréba Di’a hitut poli tiba de méu.

⁵Maik lorong ita daku, koném cekoén kaut aku toé manga woléng agu sanggéd rasul situt cung kétas.

⁶Émé aku toé danga molor oné cekeng tombo, toé nggitu oné nggepuk, ai ami poli tombod taung oné méu, oné sanggéd sokor agu oné sanggéd cao-ca.

⁷Asa neng, salag weli aku ko, émé aku hinggop kudut pandé langkas méu ai aku wéro Keréba Di’a de Mori Keraéng oné méu toé manga tiba lékog?

⁸Ata weki serani bana nehot poli kubird laku ali tiba léko oné mai isé kudut aku ngancéng keturu latang te méu.

⁹Agu du aku manga géong’g oné bahi-réha méu aku toé manga pandé susa cengatan koé, ai apa ata toé mangan oné aku, tambang le asé-ka’é ca imbi oné mai tana Makédonia. Oné sanggén cao-ca aku jerék weki-rug, kudut néka pandé mendo oné méu. Kong’g aku pandé nenggitu kig.

¹⁰Landing toing molor di Kristus oné weki daku si’ang muing laku, te bombong rak daku hitu toé manga ata cakan le céing kaut oné tana Akhaya.

¹¹Co’o tara toén? Cala landing aku toé momang méuk? Pecingn le Mori Keraéng te aku momang méuk.

¹²Maik apa ata pandé laku te ho’on, te pandé kid laku latang te pangga rasul cebana situt bombong rak agu tombo te gori disé cama ného gori damis.

¹³Ai sanggéd ata nenggitu cama ného sanggéd rasul adong. Isé situ ata keturu adong ata tangké sanggéd rasul di Kristus.

¹⁴Néka lenget laing émé nenggitu pandé disé, ai jing da’at kolé tangké ného malékat de Gérak.

¹⁵Jari, toé meletn, émé ata keturu de jing da’at situ tangké ného ata keturu de Mori Keraéng. Cemold isé situ, tiba wahéng lorong agu pandé disé.

¹⁶Cengkalin kolé taé laku: Néka manga ata rékéng te aku ata bodok. Émé méu kolé rékéng aku nenggitum, tiba ga aku ného ata bodok, kudut aku kolé ngancéng bombong rak cekoén.

¹⁷Apa ata curup laku ho’o, toé ného cengata ata hiot lorong curup de Mori Keraéng, maik ného cengata ata bodok, ata le nukn te hia ngancéng bombong raky.

¹⁸Ai dod ata bombong rak landing ngoéng de lino ho’o, aku kolé ngoéng te bombong rak.

¹⁹Méu lembak kétam agu ata bodok, ai rékéng de weki rus méu ata nggalas!

²⁰Méu lembaks, émé manga ata te pandé mendi méu, te kawé ontong oné-mai méu, kuasa méu, mésé nai agu méu, agu émé manga ata pak méu.

²¹Aku ritak kétak kudut tombo agu méu, te ami les bail te pandé nenggitu. Maik émé ata bana ngancéng mésé-nai laing, nenggitu kolé nengk aku, -- curup daku ho’o ného ata bodok!

²²Asa leng isé, ata Ibranis ko? Aku kolé ata Ibranik! Asa leng isé ata Israéls? Aku kolé ata Israélk. Asa leng isé, waé di Abrahams? Aku kolé waé di Abrahamk!

²³Asa isé, ata gori keturu di Kristus? Aku taé ného ata wédolk — aku kolé labi oné-mai isé! Aku céwé do kamerg; céwé dondé oné bui; tiba ongga da’at, dondé kolé oné copél mésé.

²⁴Lima ngkali téréng ongga lata Yahudi, néténg telumpuluciok ngkali ongga.

²⁵Telungkalig aku kélo ali ongga lata Roma, cangkalig aku umbar le watuk lata. Telu ngkalin kudut delep agu kepal waé, ca leso-ca wié aku lingu-langu oné bahi-réha tacik.

²⁶Du lari lakog aku, dondé kéta ngetek le waé-wa’a agu copél oné-mai rampok lata, copél oné-mai ata Yahudi agu oné-mai ata toé Yahudi, copél oné béndar, copél oné satar-mambak, copél oné bahi-réha tacik agu copél oné mai asé-ka’é so’ot tangké.

²⁷Aku kamer do, agu gori mendo, dondé kéta aku toé tokok, aku darem agu masa waék, dondé kolé ta’ong darem, hena le ces agu toé manga wéngko wekig.

²⁸Toé caros laku situt cebana kolé, mendo daku lété leso, ngong soang daku latang te sanggéd weki serani.

²⁹Émé manga ata noing les kétay, toé weli aku kolé lorong les nenggitu? Émé manga ata pa’u oné ndékok, toé weli kendut bon nai daku ali susa?

³⁰Émé aku paka bombong rak, aku te bombong rak oné les daku.

³¹Mori Keraéng, Ema de Mori Yésus, Mori dité, ata naring tédéng lén, pecing te aku ho’o toé manga nggopétg.

³²Oné Damsyik, gubernur hitut téti le Raja Arétas, jera sanggén ata lami béndar Damsyik kudut deko akus.

³³Maik oné ca roto aku ulur nggere-wak lisé oné mai paratongang pé’ang-mai siding béndar agu ali hitu aku cépé oné mai limé de gubernur hitu.