Read Manggarai 2 KORINTUS 6 Bible Online

2 KORINTUS 6 - Manggarai bible

2 KORINTUS 6

¹Ité haé-rebat oné gori latang te Mori Keraéng, ami toing méu, kudut méu néka pandé oké-bod kaut widang de Mori Keraéng situt poli tiba de méu.

²Ai nggo’o curup de Mori Keraéng, “Du Aku patun latang te méu, Aku séngét méuk, agu du leso Aku pandé selamak, Aku campé méuk.” Ata tu’ungn, cekeng ho’o ga cekeng ata patun hitu; ho’og leson, leso selamak hitu.

³Oné gori apa kaut ami toé manga pandé timpok atagm wiga toé manga cengatan ata celan oné gori keturu dami.

⁴Ngot oné sanggéd cao-ca toto lami te ami ho’o ata gori keturu de Mori Keraéng, nenggo’oy: Oné cekeng ta’ong susa, pa’it réa agu pola mendo,

⁵oné cekeng ta’ong ongga, oné bui, agu néngo-nangong, oné kamer, oné jerék agu du ta’ong darem.

⁶Ami gori ali nai ngalis-tuka ngéngga agu gawas, lorong Nai Nggeluk agu momang oné-mai molor nai.

⁷Ami ba keréba molor agu kuasa de Mori Keraéng, ali papé harat de agil latang te rani ko te kambé.

⁸Manga ata hiang ami, manga kolé ata lengga ami; manga ata pocu ami, manga kolé ata naring ami; koném po molorg ami, maik mangkong nggopét kigm lata.

⁹Ami ného ata toé pecing lata, kali po pecing kéta taung lata do. Taé data ami ného ata poli mata, kali po mosé kigm. Koném po lucakm lata, maik toé matakm.

¹⁰Koném po wéong kéta naigm, maik naka kigm. Koném po lénggég ami, maik ngancéng kin pandé bora ata do. Koném po ami toé manga hapegm, maik ami manga paéng do.

¹¹Oé ata Korintus! Ami poli tombo si’ang kéta agu méu, ici nai dami poli taung céngka latang te méu.

¹²Ami toé manga tadu naigm latang te méu, maik méu kali ata tadu nais latang te ami.

¹³Landing hitu te ho’on ga, kudut sina-cé’éd —aku curup ného latang te sanggéd anak daku — Céngka ngéngga koé nais.

¹⁴Méu néka ca naim agu ata toé manga imbid. Ai toé ngancéng neki ca di’a agu da’at. Asa néng, ngancéng gérak neki ca agu nendep ko?

¹⁵Apa ata camad hi Kristus agu hi Jing da’at? Apa ata camad ata imbi agu ata toé imbi?

¹⁶Apa néng woé-joé mbaru de Mori Keraéng agu io pina-naéng? Ai ité ho’o mbaru de Mori Keraéng hitut mosé, ného curup ho’o de Mori Keraéng, “Aku kudut ka’éng cama agu isé, mosé oné bahi-réha isé, agu Aku kudut ciri Mori Keraéng disék, isé kudut ciri ro’éng Dakus.

¹⁷Landing hitu: Pé’ang méu oné mai bahi-réha isé agu hedongm oné mai isé curup de Mori Keraéng, agu néka cégot apa siot rinek kali Aku te tiba méu.

¹⁸Aku kudut ciri Ema de méu, méu kudut ciri anak Daku, ata rona agu iné-wai, nenggitu dé reweng de Mori Keraéng pu’un kuasa.”