Read Manggarai 2 KORINTUS 9 Bible Online

2 KORINTUS 9 - Manggarai bible

2 KORINTUS 9

¹Gori keturu latang te ata serani oné tana Yudéa, toé maléng tulis kolé laku agu méu.

²Aku poli pecing te méu laséng campé atas. Hitu ata pandé bombong rak daku oné ata Makédonia. Tombo laku agu isé, te méu ata Akhaya ho’o pu’ung ntaung olo ga poli mengkek raom séng. Agu gori de méu pandé kéngko ata do.

³Aku wuat hi Titus agu sua taus asé-ka’é ca imbi, kudut bombong rak dami latang te méu oné gori ho’o, toé tombo bod. Jari, méu paka mengkek di’a-di’a tu’ung ného hitut poli tombon laku.

⁴Kudut émé ata Makédonia mai cama laing agu akus, repéng laku te méu poli mengkeks, wiga ami toé ritak ali bombong rak dami hitu.

⁵Hitu tara jerad laku hi Titus agu sua asé-ka’é ca imbi situ kudut ngo pado olos, kudut wintuk réco situt poli reké de méu olo. Ali hitu ita si’angn cepisa te réco de méu hitu téing le gawas nai toé ali dedek molé.

⁶Idep di’a-di’a go’ét ho’o: Ata weri cekoé, ako cekoé koléy, ata weri do, ako do koléy.

⁷Poro néténg-néténg méu téing lorong téti nai rus, néka ali mendo nai ko ali denet data, ai Mori Keraéng momang ata siot téing ali nisang naid.

⁸Mori Keraéng ngancéng téing sanggéd widang latang te méu, kudut méu toé géong oné sanggéd cao-ca, ngot manga labid latang te pandé di’a agu campé tau.

⁹Ného manga tulis: “Hia pati agu téing oné ata lénggé, di’a Diha manga dengkir tédéng lén.”

¹⁰Hia ata ambi wini latang te isét weri agu roti latang te hang. Hia kolé ambi wini latang te méu kudut pandé bekas agu pandé todos wua di’a de méu.

¹¹Méu te ciri boram oné sanggéd cao-ca, wiga méu téing mtaung ali gawas nai. Ami ata létangn téing de méu hitu te pandé wali di’a oné Mori Keraéng.

¹²Ai gori keturu ali momang ho’ot pandé de méu, toé hanang pandé rapak sékék data serani, maik téing wali di’a oné Mori Keraéng.

¹³Ai méu poli ta’ong damang oné gori keturu hitu, isé bong ngasang de Mori Keraéng ali ita junggu de méu oné imbi Keréba Di’a di Kristus. Isé kolé bong ngasang de Mori Keraéng ali gawas de méu le pati sanggéd cao-ca oné isé agu sanggéd ata.

¹⁴Itu tara oné ngaji disé, nuk mtaung méu ali do kétas widang de Mori Keraéng latang te méu.

¹⁵Wali di’a oné Mori Keraéng landing widang Diha hitut toé kéta ngancéng carod!