Read Manggarai ÉFÉSUS 2 Bible Online

ÉFÉSUS 2 - Manggarai bible

ÉFÉSUS 2

¹Danong méu poli matas landing le lagéng agu ndékoks.

²Du hitu méu mosé lut ruku de lino ho’o, te junggu oné ata cau kuasa de awang ngong nai hitut weger kéta oné bahi-réha ata toé junggu oné Mori Keraéng.

³Bo danong sanggéd taung ité cama kolé ného isé. Du hitu mosé dité lut kaut belek da’at de weki agu nai dité. Ce-tu’ungn ité du hitu hena le rabo de Mori Keraéng cama ného ata bana situ.

⁴Maik nenggitu mésén lembak de Mori Keraéng, Hia momang tu’ung ité

⁵wiga du ité rémé mata naid landing le sanggéd lagéng dité, pandé mosé kolé ité Liha cama-cama agu hi Kristus. Jari, tara selamaks méu, landing le nai di’a de Mori Keraéng.

⁶Woko ité poli nai ca anggit agu hi Kristus Yésus, Mori Keraéng pandé mosé kolét ité cama-cama agu hi Kristus kudut perenta cama oné Surga.

⁷Mori Keraéng pandé hitu kudut nggere-olon tai, manusia ngancéng noing co’oy mésén momang de Mori Keraéng. Momang mésé hitu de Mori Keraéng toto oné ité létang laing hi Kristus Yésus.

⁸Woko méu imbi oné hi Yésus Kristus, itu tara momang agu pandé selamaks méu le Mori Keraéng.

⁹Hitu toé cir landing le rébok de méu, maik ali widang de Mori Keraéng, wiga néka manga ata mésé nai landing le hitu.

¹⁰Ité ho’o ata dédék de Mori Keraéng oné hi Kristus Yésus kudut pandé sanggéd gori di’a, ata bolon polig ambin le Mori Keraéng. Ngoéng Diha kudut ité selamak moséd.

¹¹Asé-ka’én ata toé Yahudi! Damang nuk, co’oy mosé de méu danong: ata Yahudi situt poli sunatd caro méu “ata toé sunatm”, ngong ata poli wetik wekid le limé de manusia.

¹²Du hitu méu toé nai ca anggit agu hi Kristus. Méu ata long agu toé rékéng ného ro’éng ata pilé le Mori Keraéng, agu toé manga tiba maki oné wérét hitut poli rekén, toé manga bengkes agu toé manga Mori Keraéng oné lino ho’o.

¹³Maik te ho’on ga, méu poli nai ca anggit agu hi Kristus Yésus hiot danong “tadang”, poli cirik “ruis” landing le mata Diha oné haju panggol.

¹⁴Ai weki Run hi Yésus Kristus ciri ata hambor ité. Hia pandé nai ca anggit sanggéd ata Yahudi agu ata toé Yahudi te ciri ca wa’u. Turéng rahit isé ngong maca tau disé, polig rencon li Kristus oné condo weki Run.

¹⁵Adak Taurat data agama Yahudi agu sanggéd perentan polig koarn li Yésus Kristus wiga sua wa’u situ ciri ca wa’u manusia weru ata nai ca anggit agu Hia. Le hitu dé, hi Kristus pandé hambor.

¹⁶Le mata di Kristus oné haju panggol, Hia poli pandé neki ca sua wa’u situ, wiga ampusd maca tau disé.

¹⁷Mai Diha te ba keréba hambor-libur oné méu ata toé Yahudi ata “tadang” oné-mai Mori Keraéng, agu hambor-libur oné ata Yahudi atat “ruis” agu Mori Keraéng.

¹⁸Lut hi Yésus Kristus sanggéd ité ata Yahudi ko ata toé Yahudi, le Mori Keraéng Nai Nggeluk pandé ruis agu Mori Keraéng Ema.

¹⁹Nenggitu dé, méu toég kolé rékéng ného ata long ko ata mai pé’ang-mai, maik cama-cama ciri ro’éng de Mori Keraéng.

²⁰Méu poli hesé bétan ligéng ata tena le sanggéd rasul agu le sanggéd nabi, agu hi Kristus Yésus dé ciri watu menggin.

²¹Hia dé ata pandé heséd sanggéd mbaru situ, ciri mbaru ngaji latangt Mori Keraéng.

²²Oné hi Kristus, méu kolé pandé hesé ciri osang ka’éng de Mori Keraéng agu Nai NggelukN.