Read Manggarai ÉFÉSUS 3 Bible Online

ÉFÉSUS 3 - Manggarai bible

ÉFÉSUS 3

¹Aku hi Paulus, campitn tara oné buig landing hi Kristus Yésus latang té méu ata toé Yahudi.

²Poli dengén le méu, landing le widang de Mori Keraéng téing gori oné aku te ba Keréba Di’a oné méut toé Yahudi.

³Mori Keraéng poli si’ang nanéngN hitut pété ceha agu poli tombon Liha oné aku. Latang te nanéngN hitut pété ceha, polig tulisn laku oné méu bolon.

⁴Émé bacang le méu, idep dé le méu pété ceha di Krisutus cama ného idep daku.

⁵Danong, pété ceha hitu toé dé’it toiy oné manusia, maik te ho’on ga, poli si’angn le Mori Keraéng Nai Nggeluk oné sanggéd rasul agu sanggéd nabi.

⁶Ho’oy pété ceha hitu: lut Keréba Di’a hitu, ata toé Yahudi ngancéng tiba sanggéd berkak de Mori Keraéng hiot danong ambi latangt ata Yahudi kanang. Sanggéd ata toé Yahudi poli ciri nggota de weki hitut ca agu tiba apa ata poli reké de Mori Keraéng létang laing hi Kristus Yésus.

⁷Mori Keraéng tabing widang oné aku, ngong gori keturu kudut wéwa Keréba Di’a hitu. Tiba laku widang hitu lut kuasa de Mori Keraéng hitut gori oné weki daku.

⁸Aku ho’o dé ata céwé bocikn oné-mai sanggéd taung weki serani. Maik Mori Keraéng téing aku widang ho’o: gori kudut wéwa Keréba Di’a oné sanggéd ata toé Yahudi latang te bora di Kristus ata toé ngancéng taungd.

⁹Ca salangn kolé, kudut létang laing aku te baé taung lata co’oy Mori Keraéng hitut dédék tanan wa béangn éta pandé cai olos nanéngN ata pu’ung danong main cehas Liha latang te lino ho’o.

¹⁰Te ho’on ga, ngoéng de Mori Keraéng lut weki serani, kudut sanggéd ata cau kuasa éta awang, pecing do tarad nggalas de Mori Keraéng.

¹¹Pandé hitu de Mori Keraéng, lorong nanéngN hitut tédéng lén, ata pandé cai wan le létang di Kristus Yésus Mori dité.

¹²Ali imbi agu nai ca anggit oné hi Kristus, ité ndong te nia ngoéngd ngo oné Mori Keraéng déméng agu mésé imbid.

¹³Latang te hitu, tegi daku oné méu: néka soang laing kélo daku landing méu, ai sanggéd taung kélo daku situ kudut di’a sanggés méu.

¹⁴Aku io agu suju hi Ema éta Surga,

¹⁵ai oné-mai Hi Ema hitu, sanggéd kilo oné Surga agu oné lino tiba ngasang Diha.

¹⁶Ngaji daku, nahé Mori Keraéng hitut mésé kéta mengitN, patun te pandé mberes nai de méu le Nai NggelukN,

¹⁷wiga landing imbis hitu, Mori Yésus ka’éng oné nai de méu agu mosé de méu ligéng le kuasa agu le momang.

¹⁸Ngaji daku, nahé méu cama-cama agu weki serani ngancéng pecing, ného niay ngénggan agu léwén, langkas agu délemn momang di Kristus,

¹⁹ata toé ngancéng pecing le utek de manusia, wiga méu penong le nai di’a de Mori Keraéng hitut besik.

²⁰Le kuasa de Mori Keraéng hitut seber gorin oné weki dité, Hia ngancéng pandé céwé do kolé oné-mai apa ata tegi ko nuk dité.

²¹Bong koé ngasang de Mori Keraéng oné weki serani dengkir agu anak wan, létang laing hi Kristus Yésus. Naring ga Mori Keraéng dengkir tédéng lén. Amén.