Read Manggarai ÉFÉSUS 6 Bible Online

ÉFÉSUS 6 - Manggarai bible

ÉFÉSUS 6

¹Oé méut ngasang anak! Lorong koé ata tu’as ného toing di Kristus, ai hituy pandé ata patun agu molorn.

²Hiang ga endé agu emam. Ho’oy perénta ata mésén oné-mai Mori Keraéng, ného hitut si’ang oné-mai reké ho’o:

³Kudut méu cébo agu léwé mosés oné lino.

⁴Agu méut ngasang ema, néka kéngko rabo de anaks, maik titong isé oné sanggéd toing de Mori Keraéng.

⁵Oé méut mendi laing! Lorong koé perénta de sengajis ata manga oné lino ho’o. Pandé le méu hitu landing le hiang ko sundur mai wa-mai nain, cama ného pandé latang te hi Kristus.

⁶Pandé de méu hitu néka hanang bolo-mai ranga disé kanang, kudut te nisang nai agu te tiba naring de sengajis oné lino ho’o. Maik poro gori de méu hitu ného mendi di Kristus ata nggalas nai pandé sanggéd ngoéng de Mori Keraéng.

⁷Pandé ga cang agu nisang nais ného keturu weki run Mori Keraéng, toe keturu sengajis.

⁸Nuk di’a-di’a, te néténg ata, mendi ko toé mendi, manga tiba lahén oné-mai Mori Keraéng latang te sanggéd pandé di’a situ.

⁹Latang te méut sengaji laing weli ga: poro nenggitu kolé gauks kamping sanggéd mendis. Néka manga mtaung ngerek mendi. Nuk dé, méu agu sanggéd mendi situ cay kali sengajis, ngong Mori Keraéng ata manga éta Surga. Hia toé manga lélo taran ata.

¹⁰Méu weli ga, poro mberes koém oné kuasa de Mori Keraéng.

¹¹Papé taungs harat de Mori Keraéng, kudut méu ngancéng dungkang nggopét de jing da’at.

¹²Tili-mpoét dité, toé te dungkang manusia, maik te dungkang sanggéd mberes de jing da’at ata cau kuasa te ho’on.

¹³Landing hitu papé taungs sanggéd harat de Mori Keraéng, kudut méu ngancéng dungkang oné leso da’at hitu, wiga ngancéng ta’ang sanggéd purak data bali.

¹⁴Jari hesé cedek kis, papé kendik molor agu baju rampas agilm.

¹⁵Poro sundur koé te wéwa Keréba Di’a, ata ngancéng ba hambor-meler milung sepatus:

¹⁶Oné néténg sokor, papé ga nggiling imbis, ai ali nggiling hitu méu ngancéng te pandé pesas sanggéd pana api oné-mai jing da’at.

¹⁷Tiba ga songkok waja selamak agu keléwang de Nai Nggeluk, ngong reweng de Mori Keraéng.

¹⁸Pandé taung situ le méu cang agu ngaji, te tegi campé oné-mai Mori Keraéng. Ngaji ga lété leso tegi titong de Nai Nggeluk, jerék koé oné ngajis agu néka beténg ngaji hitu latang te weki serani.

¹⁹Ngaji kolém latang te aku, kudut émé curupk aku, Mori Keraéng widang oné aku curup ata molorn. Ali hitu, aku harat naig te tombos sanggéd pété ceha latang te Keréba Di’a hitu.

²⁰Landing le Keréba Di’a hitu dé, aku ciri cengata ata wuat laing le Mori Keraéng agu ho’o ga rémé oné bui kig. Ngaji koém, kudut aku toé rantang te ba wéwa Keréba Di’a hitu.

²¹Kudut méu kolé pecing keréba latang te aku, itu tara hi Tikhikus, asé-ka’é ca imbi dité ata momang kétay agu ata juggu oné keturu latang te Mori Keraéng, te toi taungs oné méu.

²²Latang te hitu dé, tara jeran hia laku te ngo oné méu, kudut méu pecing keréba latang te ami agu kudut hia lémbu nai de méu.

²³Asé-ka’én, nahé Mori Keraéng Ema agu Mori dité hi Yésus Kristus téing nai ca anggit agu momang tau oné weki serani, wiga meku kin imbis oné hi Kristus.

²⁴Berkak de Mori Keraéng loréng méut momang Mori dité hi Yésus Kristus, ali momang ata toé ngancéng moran.