Read Manggarai TÉSALONIKA 5 Bible Online

TÉSALONIKA 5 - Manggarai bible

TÉSALONIKA 5

¹Asé-ka’én, latang te cekengn agu leson, toé maléng tulisn kudut te méu.

²Ai weki rus méu pecing tu’ung-tu’ung te leso cai de Morin cama ného mai data tako le wiéy.

³Émé nggo’o taé data: Sanggén taung hambor agu meler — itu kali isé rodo hena le ampus, cama ného ca iné-wai hiot ata beti kudut loas — toé te toés isé, toé manga mba’éd.

⁴Maik méu asé-ka’én, toé mosé oné nendepm, wiga leso de Morin hitu rodo mai kaut oné méu ného ata takoy.

⁵Sanggés taung méu anak de gérakm, agu anak de lesom. Ité toé ata wiét ko ata nendept.

⁶Landing hitu céwé di’an ité néka toko ného ata banat, maik jerék agu doing koét.

⁷Ai isé situt toko, tokos le wié. Isét langu, langus le wié.

⁸Maik ité ho’ot mosé oné gérak, céwé di’an, doing koé agu papé baju rampas imbi agu momang, agu bengkes te selamakt ciri nggiling laing.

⁹Mori Keraéng toé manga wérét itén kudut hena le cempeng, maik latang te tiba selamak lut hi Yésus Kristus, Mori dité.

¹⁰Mori Yésus poli matan latang te ité, kudut du leso mai kolé Diha tai, ité jerék ko tokot, ité mosé cama-cama agu Hiat.

¹¹Landing hitu toing agu kéngko koé cama taus cama ného hitut poli pandén le méu.

¹²Asé-ka’én, tegi lami, kudut méu hiang isét mping kéta gorid oné bahi-réha méu, ata karong agu titong méu nggere-oné Morin.

¹³Kudut méu tu’ung-tu’ung hiang isé oné momang ali gori disé. Mosém ga oné hambor cama taus.

¹⁴Ami kolé toing méu, asé-ka’én; wéwa koé agu isé siot pandé sara-naid, téing lémbu koé isét mbalo naid, kambé koé isét les, lembak koém agu sanggén ata.

¹⁵Lélo di’a-di’a, boto manga ata léko da’at ali pandé da’at, maik wuli koé wekis kudut néténg-néténg méu agu sanggén ata, pandé kanang ata di’ad kaut.

¹⁶Naka taungm ga.

¹⁷Kong ngajis méu.

¹⁸Wali di’a oné sanggén cao-ca ai hitu ata ngoéng de Mori Keraéng, oné hi Kristus Yésus latang te méu.

¹⁹Néka pangga le méu Nai Nggeluk,

²⁰agu néka émo-among kaut le méu sanggéd nubuat.

²¹Sanggén cao-ca paka olong kapangs, poli hitu caus ata di’ad.

²²Tadang koé oné-mai weki de méu sanggéd ata da’atd.

²³Nahé Mori Keraéng, widang hambor-libur, pandé nggeluk sanggés taung méu agu nahé lami di’a-di’a weki agu wakars, wiga toé manga celas du leso mai di Yésus Kristus, Mori dité.

²⁴Hiat bénta méu hitu, ata jungguy, agu Hia kolé pandé rapakd sanggéd rekéN.

²⁵Asé-ka’én, ngaji koém latang te ami.

²⁶Tombo koé le méu tabé agu momang mésé dami latang te sanggéd asé-ka’é ca imbi.

²⁷Le ngasang de Morin, tegi tu’ung kéta laku agu méu, kudut surak ho’o paka bacang le sanggéd asé-ka’é ca imbi.

²⁸Nahé Mori dité, hi Yésus Kristus, berkak koé sanggés méu!