Read Manggarai 2 TÉSALONIKA 1 Bible Online

2 TÉSALONIKA 1 - Manggarai bible

2 TÉSALONIKA 1

¹Oné-mai hi Paulus, Silwanus agu hi Timotéus. Latang te weki serani oné Tésalonika, ata manga oné Mori Keraéng Ema agu oné Mori Yésus Kristus.

²Tabing agu hambor-libur oné-mai Mori Keraéng Ema dité agu oné-mai Mori Yésus Kristus loréng méuy.

³Asé-ka’én, ami paka wali di’a oné Mori Keraéng landing méu, agu naun muing nenggitu, ai imbi de méu tambang mésé. Nenggitu kolé momang de méu cama taus tambang kéta mberesn.

⁴Hitu comongn, tara tombo mtaung méu lami du ngo la’at asé-kaé ca imbi oné béndar bana. Cang agu mombong rakg ami tombo méu, co’o méu metek kis imbis oné Mori Yésus koném po hena le wahéng ko ta’ong susa.

⁵Hitu tandan latang te agil beté-bicar de Mori Keraéng, ata pandé si’ang kudut naun te ciri ro’éng Adak Surga, méu ho’ot ta’ong susa landing Adak Surga hitu.

⁶Ai tu’ung agiln latang te Mori Keraéng, émé lékos Liha renet oné isét pandé renet méu.

⁷Agu latang te méu ata rémé ta’ong susa — nenggitu kolé latang te ami - Mori Keraéng te téing cembes oné méu du leso wa’un Mori Yésus éta-mai Surga agu toto wekin, cama laing agu sanggéd malékat situt manga kuasa méséd oné api hitut dila haok.

⁸Mori Yésus téing susa oné isét toé imbi Mori Keraéngs, agu toé lorong Keréba Di’a.

⁹Isé so’o te hena le wahéngs, ampus tédéng lén, pandé tadang oné-mai ranga de Morin agu oné-mai kuasa méséN.

¹⁰Sanggéd taung so’o jaris, émé Hia mai du leso cemoln te toto mengitN oné bahi-réha sanggéd ata nggeluk, agu latang te pandé lenget sanggéd ata imbi, ai saka-si ata ba dami oné méu polig le méu imbin.

¹¹Ai méu te téing hiang Mori Keraéng, landing hitu ami toé ké’ét ngaji latang te méu. Icin ngaji dami, kudut Mori Keraéng bénta méu te mosé lorong ngoéng Diha. Mori Yésus te pandé besik sanggéd gori lut ngoéng de méu.

¹²Ali hitu, ngasang di Yésus Mori dité ciri mengit oné méuy, agu méu oné Hiam, lorong tabing de Mori Keraéng dité agu Mori Yésus Kristus.