Read Manggarai 2 TÉSALONIKA 3 Bible Online

2 TÉSALONIKA 3 - Manggarai bible

2 TÉSALONIKA 3

¹Asé-ka’én, nggere-olon ga, ngaji koém latang te ami, kudut curup de Morin tambang nondon agu angosn, cama ného situt poli jarid oné bahi-réha méu.

²Tadang koé oné-mai ami pandé data cibul agu sanggéd ata pandé da’at, ai toé sanggén taung ata imbi Keréba Di’a.

³Maik Mori hitu, junggu. Hia te pandé mberes nai de méu agu sémbéng méu oné-mai manusia da’at.

⁴Ami kolé imbi oné Morin, te apa ata pedé dami oné méu, paka pandés le méu.

⁵Nahé Morin titong kin nai de méu nggere-oné momang de Mori Keraéng agu nggere-oné alus nai di Kristus.

⁶Asé-ka’én, oné ngasang de Mori Yésus Kristus ami pedé agu méu, kudut méu tadang koém oné-mai néténg asé-ka’é ca imbi situt ngondé agu toé lorong toing situt poli tiba oné-mai ami.

⁷Ai pecing le weki rus méu, co’o méu paka lut toming dami, ai ami toé manga ngondé’gm te gori oné bahi-réha méu.

⁸Toé hang bod kaut lami hang data, maik le rébokm agu le nai-koé’gm gori wié leso. Ali hitu, ami toé pandé mendo latang te céing-céing kaut oné bahi-réha méu.

⁹Toé landing toé manga hak’gm ami latang te hitu, maik pandé dami ca toming latang te méu, kudut lorong le méu.

¹⁰Ai nenggitu kolé ami du oné bahi-réha méu, tombo lami langga ho’o oné méu: Émé hiat cengata toé ngoéng te gori, hia hitu néka hangy.

¹¹Ami curup nenggo’o, ai dengé lami, manga ata oné bahi-réha méu ata toé kitep mosén agu ogon te gori, maik hidut agu apa ata toé manga betuan.

¹²Sanggén ata langga kolés lami, agu toing le ngasang de Mori Yésus Kristus, kudut isé kong merep kid oné sanggéd gorid, ai le hitu isé hang oné-mai rébok de rud.

¹³Méu kali asé-ka’én, néka asi pandé di’a.

¹⁴Émé manga ata toé ngoéng te séngét apa ata curup dami oné surak ho’o, jerék koé agu ata hitu, néka haé-reba agu ata hitu kudut ritakn.

¹⁵Néka rékéng hia ného ata baliy, maik wahéng kaut cama ného asé-ka’é ca imbi.

¹⁶Nahé Morin ata pu’un hambor-libur, tabing Liha hambor–libur hitu latang te méu oné sanggén cao-ca. Morin loréng sanggés taung méu.

¹⁷Tabé oné-mai aku hi Paulus. Tabé ho’o tulis laku ali limé de rug. Ho’oy tandan néténg-néténg surak daku: Nenggo’oy laku tulisn.

¹⁸Tabing di Yésus Kristus, Mori dité, loréng sanggés taung méu!