Read Manggarai 2 TIMOTIUS 3 Bible Online

2 TIMOTIUS 3 - Manggarai bible

2 TIMOTIUS 3

¹Nuk di’a ho’o: Du leso turung cemol, te caiy cekeng mendo.

²Manusia te momang weki run agu ciri mendi de séng, tombo joak agu mésé nai. Isé ngoéng kétas te loér ata, lawang ata tu’as, agu toé pecing te wali di’a, mbéis agamas.

³Isé toé pecing momang tau, toé ngoéng te hambor, ngoéngd kali pandé wau ngasang data, toé ngancéng nipu weki ru, gutek, toé ngoéng siot di’ad.

⁴Isé ngoéng kéta te pandé bécang, toé léwé nuk, néhot ata pecing do, céwé lorong belek da’at itu po lorong Mori Keraéng.

⁵Bo tu’ung wekid isé ngajis, maik doét lisé icin toing de agama. Tadang koé oné-mai isé situ.

⁶Ai oné-mai isé situ mangas ata junuk kaut ngo oné mbaru data bana agu serénté iné-wai ata les ata penong le ndékok agu kuasa le do tarad belek da’at.

⁷Iné-wai koném po ngoéng te toings, maik toé dé’it ngancéng pecing molors.

⁸Cama ného hi Yanés agu hi Yambrés, lawang hi Musa, nenggitu kolé isé lawang molor. Anor disé da’at taungd agu imbi disé toé ta’ong damangs.

⁹Maik toé te toé, isé toé ngancéng céwé di’a moséd, ai ného hi Yanés agu hi Yambrés, bodok disé baé taung le sanggén ata.

¹⁰Hau poli lorong toing dakuh, co’oy mosé, ba weki, imbi, lembak, momang, agu seber daku.

¹¹Hau poli lorong susa agu wahéng cama ného hitut ta’ong daku oné Antiokhia agu oné Ikonium agu oné Listra. Sanggéd taung wahéng situ tibas laku. Maik Mori poli pandé selamak aku oné-mai sanggéd situ.

¹²Bo tu’ung, néténg ata siot ngoéng mosé lorong ngajis oné hi Kristus Yésus te hena le wahéngs.

¹³Nakat ata da’at agu ata nggopét te tambang da’ats, isé te wéléngs agu pandé wéléngs lata.

¹⁴Maik hau poro kong kim cau molorm, ata poli imbi le hau ali nuk mtaung ata siot poli toing haud.

¹⁵Nuk koé kolé, pu’ung du koém hau poli pecing Surak Nggeluk ata ngancéng téing nggalas agu hau, agu titong hau nggere-oné selamak lorong imbim oné hi Kristus Yésus.

¹⁶Sanggéd taung Surak Nggeluk pandé gérak le Mori Keraéng agu papé latang te toing, kudut pandé si’ang ata salad, kudut pandé di’a ba weki agu kudut toing ata oné molor.

¹⁷Ali hitu nété-néténg manusia paéng de Morin, pandé jemut latang te sanggéd pandé di’a.