Read Manggarai TITUS 1 Bible Online

TITUS 1 - Manggarai bible

TITUS 1

¹Oné-mai aku hi Paulus, mendi de Mori Keraéng agu rasul di Yésus Kristus latang te tinu imbi de weki serani agu pecing do latang te molor, ného hitut ita oné ngaji dité,

²agu ligeng de bengkes kudut mosé tédéng lén hitut danong empo-walok poli reké le Mori Keraéng ata toé manga nggopétN.

³Du rapak leson, Mori Keraéng si’ang rekéN oné pedéN hitu. Pedé hitu polig imbin oné aku te wéway le perénta de Mori Keraéng, Ata Sambé dité.

⁴Titus, hau tu’ung-tu’ung anak daku, ai hau agu aku cama-cama imbi oné Mori Yésus. Bengkes daku, nahé Mori Keraéng Ema agu hi Kristus Yésus Raja Ata Sambé dité téing berkak agu hambor-libur oné hau.

⁵Aku poli ledong hau oné Kréta, betuan kudut hau papong apa ata paka wintuk le hau, agu kudut téti ata tu’a laing de weki serani oné néténg béndar.

⁶Ata tu’a situt téti de hau te ciri tu’a laing de weki serani, paka: Ata toé manga celad, cay kali winan, sanggéd anak lut imbi diha, agu toé nonoky néhot mosé toé patun agu toé kitep.

⁷Ai ata wintuk mbaru de Mori Keraéng, atat toé manga celan, toé mésé nai, toé heres, toé langu tuak, toé rabo agu toé gomeng,

⁸maik ngoéng tiba meka toko rontong, ngoéng te pandé ata di’an kanang, nggalas, agil, nggélok nai, ngancéng kuasa weki ru.

⁹Be lé-mai hitun kolé, hia paka cau curup molor lorong toing situt di’ad, wiga hia ngancéng titong atay agu sengang le sanggéd isét lawang hia.

¹⁰Ai dod atat toé kitep moséd, céwén kéta isé situt baod lut agama Yahudis. Ngoéng disé, ata toé Yahudi paka olong sunat po ciri weki serani. Ali curup nggopétd, isé pandé wéléng nuk data.

¹¹Sanggéd ata nenggitu paka jera hema kauts, ai isé pandé biké ka’éng kilo data le toing ata toé manga betuad, kudut pala tiba ontong ata toé patun.

¹²Cengata oné-mai isé ata rékéng ného cengata nabi, manga dé’id taén, “Tama laing méut Kréta ata nggopét, kaka rani, agu bot mboros maik ngondé da’at.”

¹³Saka-si hitu molorn, landing hitu titong kéta tu’ungs isé kudut isé metek kid oné imbid.

¹⁴Ali hitu, isé toé pinga kolés tombo turuk data Yahudi agu wintuk ata pandé de manusia siot tadangd oné-mai molor.

¹⁵Latangt ata nggélok nai, sanggén taung situ nggelukd, maik latang te ata rinek agu ata toé imbi, toé manga can koé ata nggelukd, ai nai-nawa ko ici nai disé rinek taungs.

¹⁶Bo tombod pecing Mori Keraéngs, maik oné-mai pandéd, pali Mori Keraéngs. Isé gutekd, toé lorong agu toé kopd te pandé cao-ca ata di’an.