Read Manggarai TITUS 3 Bible Online

TITUS 3 - Manggarai bible

TITUS 3

¹Langga kid isé, kudut isé lorong pemerénta agu sanggéd ata cau kuasa, lorong agu mengkek te pandé sanggéd gori di’a.

²Néka manga pocu ata, léwang tau, maik nahé isé kali poro joél, agu lumu oné sanggén ata.

³Danong, ité kolé bodok moséd: kembe-lu’ak, wéléng, ciri mendi de sanggéd belek da’at, mosé nanang te pandé da’at kanang, guér, guték, lenci, agu kodo tau.

⁴Maik Mori Keraéng, Mori Sambé dité poli toto momangN agu nai di’aN latang te ité.

⁵Hia poli sambé itén, toé landing le pandé di’a dité, maik landing le weki Run Hia poli momang itéN. Hia sambé ité létang le Nai Nggeluk ata pandé nggélok nai dité, ngong pandé célung taung mosé dité le ba weki ata werun.

⁶Mori Keraéng poli widang bon kaut Nai Nggeluk latang te ité lut hi Yésus Kristus, Mori Sambé dité.

⁷Ali tabing de Mori Yésus, ité poli hambor agu Mori Keraéng, wiga ité haéng mosé tu’ung agu tédéng lén lorong hitut bengkes dité.

⁸Curup daku ho’o molord taung, agu ngoéng daku kudut hau paka mberes kéta téing si’ang, wiga isét poli imbi oné Mori Keraéng, tu’ung-tu’ung kéta seber te pandé gori situt di’ad. Hituy ata di’an agu manga betuan latangt manusia.

⁹Maik néka lut oné gangga tau situt toé manga betuad, ngong latang te turuk empo, agu léwang tau landing wintuk agama. Sanggéd taung situ te pandé rowak agu toé manga betuad.

¹⁰Latang te ata campitn pandé biké oné weki serani, paka toing kaut le hau ca-suangkalin, émé toé pinga liha néka woé-joé kolé agu hia.

¹¹Pecing le hau ata nenggitu ogo te pandé molor, ali hitu isé toé ké’ét te pandé sala. Ali nggitu, isé toto ndékokd bolo-mai ranga de Mori Keraéng.

¹²Émé poli wuatn laku hi Artémas ko hi Tikhikus te cumang hau, gélang koéh mai cé’é aku oné béndar Nikopolis, ai aku poli wérét te ngo ka’éng nituk tédéng cekeng duréng.

¹³Campé di’a koé hi Zénas, ata pecing adak hitu agu hi Apolos oné lako disé, kudut néka manga géongd.

¹⁴Sanggéd weki serani dité oné nuca Keréta, paka laséng koét pandé gori ata di’ad, kudut ngancéng haéng sékék lété bari agu sékék latang te ata bana. Pandé nenggo’o, kudut manga betuan mosé disé.

¹⁵Tabé dami, ngong aku agu sanggéd asé-ka’é serani so’ot manga cama agu akus latang te hau. Tombo kolé le hau tabé dami ho’o latang te sanggéd weki serani oné nuca Keréta. Nahé Morin téing berkak agu widang sanggés taung méu!