Read Manggarai FILÉMON 1 Bible Online

FILÉMON 1 - Manggarai bible

FILÉMON 1

¹Oné-mai hi Paulus ata bui landing hi Kristus Yésus agu oné-mai hi Timotéus, asé-ka’é ca imbi dité. Latang te hi Filémon, haé-reba ca gori dami ata momang kéta lami,

²nenggitu kolé hi Apfia weta ca imbi dité, hi Arkhipus haé reba ca mping oné gori dité agu latang te sanggéd ata serani oné mbaru de hau.

³Tabing agu hambor-libur oné-mai Mori Keraéng Ema dité agu oné-mai Mori Yésus Kristus, loréng méuy.

⁴Aku wali di’a kamping Mori Keraéng, néténg ngaji daku nuk mtaung hau,

⁵ai dengé laku latang te momang de hau kamping sanggéd weki serani agu latang te imbi de hau kamping Mori Yésus.

⁶Ngaji daku, nahé nai ca anggit ditét ca imbi, te cir pecing mésé latang te sanggéd berkak ata manga oné ité landing le neki ca agu hi Kristus.

⁷Filémon ata momang daku, mohas de hau latang te sanggéd weki serani pandé nisang agu mberes kéta nai daku. Sanggéd weki serani poli téing lémbud le Mori Keraéng lut hau.

⁸Ali mésén momang de hau latang te weki serani, agu ité kolé ca imbi oné hi Kristus, aku ngancéng te perénta hau apa ata paka pandé le hau.

⁹Maik ali momang hau laku, itu tara tegi kaut laku, toé perénta. Tu’a kaku ga, céwén kolé rémé oné buig, landing hi Kristus Yésus.

¹⁰Tegi daku kamping hau, nuk koé le hau hi Onésimus, ai hia cama kéta ného anak de rug ata poli titongn laku oné bui te imbi hi Kristus.

¹¹Bo tu’ung kali danong hia toé manga belarn latang te hau, maik te ho’on ga, belarn kéta latang te hau agu latang te aku.

¹²Hi Onésimus hitut momang laku cama ného anak de rug, te jera koléy laku nggere-oné hau.

¹³Bo tu’ungn aku ngoéng te po’é hiak ka’éng cama agu akuy luing lesing hau, kudut campé aku rémé oné buig landing Keréba Di’a.

¹⁴Maik aku ogok te pandé nenggitu émé toé di éng le hau. Ngoéng daku, kudut pandé di’a hitu de hau, toé ali dedek molé, maik ali téti nai rum.

¹⁵Ai aram anor le Morin tara bécangn hi Onésimus oné-mai haun, wiga ali hitu hau ngancéng tiba kolé hia te ka’éng cama tédéng lén.

¹⁶Teho’on ga, néka rékéng hia ného mendi, maik rékéng hia ného asé-ka’é ca imbi ata momang oné hi Kristus. Hia belarn kéta latang te aku, abén kolé latang te hau. Hia belarn kéta, ot ného mendi de hau ko ného asé-ka’é ca imbi oné ranga de Morin.

¹⁷Émé hau rékéng aku ného asé-ka’é ca imbi, hau paka tiba hia cama ného tiba aku.

¹⁸Émé hia manga dé’it pandé salan ko manga raungn oné hau, sanggéd taung situ pando oné akus.

¹⁹Aku pandé surak ho’o le limé agu tanda ponggo rug, kudut imbi tu’ung le hau: Aku hi Paulus te bajar taungs. Ata di’an aku toé tombo oné hau, te hau manga raungm oné aku.

²⁰Itu tara le ngasang de Morin, campé agu pandé lémbu koé nai daku oné hi Kristus.

²¹Ali imbi laku sundur de hau, itu tara tulisn laku surak ho’o. Ai pecing laku, ngancéng le hau pandén apa ho’ot tegi daku, ngot céwé do ata pandé le hau po oné-mai tegi daku.

²²Mai nitu main, ambi koé le hau lo’ang oné mbarum latang te aku, ai imbi laku sanggéd ngaji de asé-ka’é do sendos le Mori Keraéng kudut aku ngancéng cumang kolék agu méu.

²³Tabé latang te hau oné-mai hi Épafras, haé reba ca bui agu aku landing hi Kristus Yésus,

²⁴agu oné-mai hi Markus, hi Aristarkhus, hi Démas agu hi Lukas, haé-reba ca gori agu aku.

²⁵Berkak de Mori Yésus Kristus loréng méuy!