Read Manggarai IBRANI 1 Bible Online

IBRANI 1 - Manggarai bible

IBRANI 1

¹Médé Mori Keraéng dongkalin curup agu empo dité, lut sanggéd nabi ali do kéta tarad ban curup hitu.

²Maik du turung cemoln ho’o, Hia curup agu ité lut AnakN, ata poli letin Liha ciri ata mbaté sanggéd cao-ca. Lut Hia Mori Keraéng poli dédék tanan-wa agu awangn éta.

³Hiay néra mengit de Mori Keraéng agu ba tara de Mori Keraéng ata tu’ungn agu tukeng sanggéd so’ot mangad ali curup Diha hitut penong kuasa. Du poli pandé nggélokd ndékok de manusia, Hia lonto oné racap wanang de Mori Mésé, éta osang langkas.

⁴Hia céwé mésé kuasan oné-mai sanggéd malékat, ai ngasangN ata téing le Mori Keraéng céwé mengit oné-mai ngasang de malékat.

⁵Ai Mori Keraéng toé dé’it manga curup nenggo’o oné cengata malékat: “Anak Daku dé Hau! Hau poli ciri Anak Dakum leso ho’o.” Ko toé de’it kolé taé nenggo’o latang te malékat bana “Aku te ciri Ema Diha, agu Hia te ciri anak Dakuy.”

⁶Céwén kolé, du Hia dadé Anak ngason nggere-cé’é lino ho’o, mai taéN: “Sanggéd malékat de Mori Keraéng paka suju Hias.”

⁷Latang te sanggéd malékat, mai taé de Mori Keraéng: “Sanggéd malékat ciri buru warats agu sanggéd ata keturu laing ciri dila apis.”

⁸Maik latang te AnakN nenggo’o taéN, “Seriga Dité yo Mori, tédéng lén kin agu Adak Dité agil agu molor.”

⁹Hau momang agil agu kodo lopé-lapét; ali hitu Mori Keraéng, MoriM hitu, poli palas Hau ali mina, luing tanda lumung céwé mésé oné-mai haé-reba ca nai agu Hau.”

¹⁰TaéN kolé: “Yo Mori, du wangkan Ité poli dédék tanan wa agu awangn éta.

¹¹Sanggéd taung situ te leraks agu ciri boték ného wéngko-wekis, maik Ité manga kid.

¹²Lino ho’o te lepet Lité cama ného juba, agu calings cama ného wengko-weki, maik Ité cama kéta kid, agu mosé Dité dengkir lén.”

¹³Ai Mori Keraéng toé dé’it manga curup nenggo’o oné cengata malékat: “Lonto ga oné racap wanang’G, dengkir pandé Laku sanggéd ata baliM, te ciri lapéng wa’iM.”

¹⁴Sanggéd malékat situ ata keturu de Mori Keraéng éta Surga, agu ata wuat Liha te campé sanggéd ata te tiba mbaté selamaks.