Read Manggarai IBRANI 2 Bible Online

IBRANI 2 - Manggarai bible

IBRANI 2

¹Landing hitu, paka mbajik kéta te séngét apa ata poli dengé dité, boto ba le waé wa’at.

²Tombo hitut lut sanggéd malékat jari kin. Néténg ata toé lorong agu lagé sanggéd tombo situ, te tiba wahéng lorong pandén.

³Ité toé ngancéng cépéd émé pandé kéba kaut keréba selamak hitut mésé, ata keréba le Morin laring cain agu nesa kéta oné ité lisét poli dengé Hia.

⁴Mori Keraéng kolé pandé ndeng saka-si disé ali sanggéd tanda lenget, ali dod si’ang kuasa agu widang de Nai Nggeluk ata pati-péars Liha lorong ngoéngN.

⁵Sanggéd malékat toé manga tiba kuasa oné-mai Mori Keraéngd kudut perénta lino weru hitut kudut cai, ho’ot tombo dité.

⁶Ngot manga ata poli téing saka-si oné surak nggeluk ata tulis nenggo’o: “Mori, céing manusia hitu wiga nuk kéta Lité? Céing anak manusia hitu wiga pinga Lité?

⁷Maik Ité poli pandé cerepa-mata kaut Hia céwé radak oné-mai sanggéd malékat agu pandé lonto Hia oné osang ata angos agu hiang kéta.

⁸Poli na’a Lité sanggéd ménan be wa mai wa’i Diha.” Ai sanggéd ménan poli taungs pandé kodad Liha, toé kéta manga can ata retang. Maik te ho’on ga, toé di ita lité koda taungs Liha sanggéd menan situ.

⁹Ata ita dité kali, te Mori Yésus cerepa-mata kauty céwé radak oné-mai sanggéd malékat. Ali susa mésé, Hia te pandé lonto oné osang mengit agu hiang kéta. Landing le tabing de Mori Keraéng, Hia matay latang te sanggén manusia.

¹⁰Ai naun tu’ung Mori Keraéng - Hia ata dédék sanggéd cao-ca lorong ngoéng de Weki Run — pandé jepek Hiat karong salang - agu titong isé nggere-oné selamak lut susa. Ali hitu sanggén manusia kolé tiba mengit agu hiang ného Hia.

¹¹Ai hi Yésus hitut pandé nggeluk agu isé situt ciri nggeluks, sanggén taung mai oné-mai ca Ema. Itup tara Hia toé ritak caro isé ciri asé-ka’éN.

¹²Nenggo’o taé Diha oné Mori Keraéng, “Aku kudut keréba ngasang Dité oné asé-ka’é Daku agu naring Ité oné bahi-réha ata imbi.”

¹³Agu iwon kolé taé Diha, “Aku te condo bengkesg oné Mori Keraéng.” Iwon kolé, “Ata tu’ungn, ho’ok Aku agu sanggéd anak ata poli téing de Mori Keraéng oné Aku.”

¹⁴Ai sanggéd anak situ manusia ata ngancéng mata. Itu tara Hia kolé ciri cama ného isé agu lut cama ného isé. Kudut lut mata Diha, Hia pandé lerak jing da’at hitut manga kuasan latang te mata.

¹⁵Ali hitu, Hia céla kolé isé ata ciri mendis rémé moséd ali rantang te mata.

¹⁶Ai ata tu’ungn, toé malékat-malékat ata pinga Diha, maik waé di Abraham.

¹⁷Itup tara oné sanggén cao-ca, Hia paka cama agu asé-ka’én. Ali hitu, Hia ciri Imam Mésé ata paéng momang agu junggu oné Mori Keraéng kudut pandé hambor ndékok de ro’éng.

¹⁸Ai weki run Hia poli ta’ong susan du hena le damangy, wiga Hia ngancéng campé isé situt lari hena le damangd.