Read Manggarai IBRANI 4 Bible Online

IBRANI 4 - Manggarai bible

IBRANI 4

¹Landing hitu, co’om jerék koét, boto manga cengatan ata oké musi, koném po reké te ngo oné osang asi Diha manga kin.

²Ai keréba di’a hitu poli tombon oné ité, cama ného oné isé. Maik tombo hitu toé manga betuan latang te isé. Ai isé toé ca imbi agu sanggéd ata situt séngétn.

³Landing itét manga imbid, te ngo oné osang asi, ného manga taé Diha: “Wadak Aku oné rabo: Isé toé ngo oné osang asi Dakus.” Mori Keraéng taé nenggitu, koném po polis gori Diha du pu’ung dédékn lino.

⁴Ai latang leso te pitun poli dé’it tombon oné Surak Nggeluk, “Mori Keraéng asi oné leso te pitun, oné-mai sanggéd gori Diha.”

⁵Oné Surak Nggeluk hitu bacang kolé lité, “Isé toé ngancéng ngo oné osang asi Dakus.”

⁶Jari, manga pisa taus ata ngancéng te ngo oné osang asi hitu, maik isét laring cain dengé keréba di’a hitu toé ngo bonés, ai isé toé lorongs.

⁷Landing hitu, Mori Keraéng wérét kolé ca leso bana, ngasangn “leso ho’o.” Béhéng kolé poli hitu, Hia curup lut hi Daud, cama ného curup hio éta: “Leso ho’o, émé dengé le méu reweng Diha, néka ku’akm!”

⁸Ai émé hi Yosua poli dadé isé nggere-oné osang baté asi, toét-toé, Mori Keraéng toé manga curup musi-main latang te ca leso ata bana kolé.

⁹Jari, manga kin améngn ca leso gel, ngong leso te pitun, latang te ro’éng de Mori Keraéng.

¹⁰Ai céing kaut ata poli ngo oné osang asi Diha, hia hitu poli gel oné-mai sanggéd gorin, cama ného Mori Keraéng gel oné-mai sanggéd gori Diha.

¹¹Landing hitu, mait ga ité wuli- weki te ngo oné osang asi hitu, kudut néka koé manga cengatan ata pa’u landing lut toming disét danong ata toé lorong agu toé imbi.

¹²Ai reweng de Mori Keraéng mosé agu mberesn, céwé harat oné-mai kopé harat bali apa kaut. Reweng hitu ceka kéta haéng oné pucu lolo, ngancéng pandé bégas wakar agu nai, ruék agu usek, wiga belard nuk agu niak nai dité.

¹³Toé manga can cao-ca ata ceha bolo-mai ranga Diha. Bolo-mai mata Diha sanggén cao-ca mbolang agu téa taungs. Ité paka téing papong oné Hia.

¹⁴Ité te ho’on ga, manga Imam Mésé agu Mengit ata lagé sanggéd awang éta, ngong Mori Yésus, Anak de Mori Keraéng. Nahé ité metek tu’ung oné tura imbi dité.

¹⁵Imam Mésé dité hitu, toé imam mésé ata toé lut manté leme-léngkus dité. Ngot cama ného itéy, Hia poli damangn, landing Hia toé pa’u oné ndékoky.

¹⁶Landing hitu, mait ga agu rani naid, nggere-oné seriga Diha ata widang tabing, kudut tiba nabit agu tabing latang te campé du rapak leson.