Read Manggarai IBRANI 8 Bible Online

IBRANI 8 - Manggarai bible

IBRANI 8

¹Icid sanggéd taung situt tombo dité weli ga: Ité manga Imam Mésé ata nenggituy, ata lonto oné racap wanang seriga de Mori Keraéng ata Mésé Tu’ung éta Surga.

²Hia ata gori keturu ného Imam Mésé oné osang nggeluk, ngong oné Lo’ang Nggeluk tu’ung ata pandé le Morin agu toé le manusia.

³Ai néténg Imam Mésé poli wérét latang te ba takung hélang agu ba podo nggere-oné Mori Keraéng. Nenggitu kolé Imam Mésé dité, Hia sékékn kéta te manga cao-ca latang te ba podo nggere-oné Mori Keraéng.

⁴Émé Hia manga oné lino ho’oy, Hia toé kéta manga kudut ciri Imam, ai cé’é ho’o poli mangan ata ba takung lorong Adak Taurat.

⁵Isé gori keturu oné ndéi ata ciri kuri agu nénu oné-mai apa ata manga oné Surga. Latang te hitu, poli tombon le Mori Keraéng agu hi Musa, du hia kudut pandé ndéi: “Idep di’a, hau paka pandé taung situ lorong toming Daku oné hau éta poco hitu.”

⁶Maik te ho’on ga Mori Yésus poli tiba keturu ata céwé mésé, ai Hia ciri Létang témba oné-mai reké ata céwé mengitn, ata ligéng le reké ata céwé mengitn kolé.

⁷Ai émé reké hitut laring cain toé manga celan, toé manga kawé kolén reké te suan.

⁸Ai Mori Keraéng poli jér isé le curup ho’o: “Cetu’ungn, te cai leson, Aku te pandé reké weru agu wa’u Israél agu wa’u Yéhuda.

⁹Reké hitu toé cama ného reké Daku oné empo disé, du Aku todang isé te pé’ang oné-mai tana Mesir. Ai isé toé manga junggud agu reké Daku.

¹⁰Ho’oy reké ata pandé Laku agu wa’u Israél du leso nggere-olon. Aku na’a Adak’G oné utek disé, agu tulis oné nai disé. Aku te ciri Mori Keraéng disé agu isé te ciri ro’éng Dakus.

¹¹Agu isé toé ngancéng toing kolé cama ro’éngd, ko cama asé-ka’éd ali taé: Pecing koé Morim! Ai sanggéd taung isé, wan koé-étan tu’a, te pecing Akus.

¹²Ai Aku kudut ampongs sanggét sala disé agu pandé hémong taungs sanggéd ndékok disé.”

¹³Du tombo le Mori Keraéng reké weru hitu, ngong reké manga toé papé laing gi. Apa ata toé papé laing, ngong tiong te ampus gi.