Read Manggarai JAMES 3 Bible Online

JAMES 3 - Manggarai bible

JAMES 3

¹Asé-ka’é ata momang daku, néka do bail oné-mai méu ngoéng ciri guru. Pecingp le méu, ali ciri guru, ité te bicart céwé mésé oné-mai ata bana.

²Ai sanggéd ité manga salad oné sanggén cao-ca; céing ata toé manga sala oné curupn, hia hitu ata besik, ata ngancéng wi’uk kolé sanggéd wekin.

³Ité na’a rapa oné mu’u de jarang, wiga hia lorong ngoéng dité, ali hitu ité ngancéng wi’uk wekin.

⁴Lélo kolé sanggéd kepal, koném po méséd agu pandé wulis ali buru warat, maik ngancéng wi’uk kaut le haju kemudi koé, lorong ngoéng dihat caun.

⁵Nenggitu kolé dé lema dité, koném po koén, maik ngancéng pandé angos latang te sanggéd cao-ca ata méséd. Lélo dé, koném po koén api, maik ngancéng pandé muntung poco mésé.

⁶Lema hitu cama ného apiy. Hia dé pu’un da’at te wécak da’at situ oné sanggéd taung weki dité. Le api wa-mai neraka hia pandé muntung taung sanggéd weki dité.

⁷Sanggéd taung kaka mila, kaka lélap, agu sanggéd kaka horos wa tana agu kaka oné tacik ngancéng pandé merups agu poli merupd le manusia.

⁸Maik toé kéta manga cengatan ata ngancéng pandé merup leman. Lema dité hitu cama ného kaka rani ata toé ngancéng petun, hia penong ali rasung te pandé mata laing.

⁹Le lema, ité naring Morin agu Ema dité; le lema hitu kolé, ité mawang haé atad hitut poli dédék lorong tara de Mori Keraéng.

¹⁰Oné-mai mu’u hitu kin, tuad berkak agu mawang. Asé-ka’é daku, néka manga pandé nenggitu.

¹¹Asa léng, oné-mai ca ulu waé, ngancéng cengkali pé’angn waé belé agu waé pa’it ko?

¹²Asé-ka’é daku, ngancéng néng ca pu’u ara cir wua zaitun, ko ca pu’u anggor cir wua aray? Nenggitu kolé mata waé cerak toé ngancéng pé’ang waé belé.

¹³Émé manga ata nggalas agu gauk di’a, hia hitu poro toto oné mosén le pandé di’a ali nggalas agu lembak nai.

¹⁴Émé méu manga beti-nai agu haé ata, ko céwé nuk weki ru, néka mésé-nai landing le nggalas hitu, ai le hitu méu nggopét te dungkang molor.

¹⁵Hitu toé nggalas éta mai, maik nggalas de lino, ngong nggalas de belek da’at agu nggalas de jing da’at.

¹⁶Ai nia manga beti-nai agu ata, ko nuk weki ru, nitu mangan ngai-ngaok agu sanggéd taung pandé da’at.

¹⁷Maik nggalas éta mai, laring cain kéta nggélok taran, poli hitu ngoéng te hambor, lumu, lorong, lembak nai agu sanggéd pandé di’a, toé kambé agu pisik.

¹⁸Agil hitu cir oné-mai hambor-libur, ata wécak lisét momang hambor-libur.