Read Manggarai JAMES 4 Bible Online

JAMES 4 - Manggarai bible

JAMES 4

¹Mai nia-maid ngai-ngaok agu léwang tau oné bahi-réha méu? Toé weli mai oné-mai belek da’at de méu situt rié taud oné wekis?

²Méu nanang hitu-ho’o, maik toé haéngy, itu kali méu mbelé ata. Méu mping kétam te paéng caoca, maik méu toé haéng salangn, itu kali mangan léwang agu pulang taus. Méu toé manga dumpu apa-apas, ai méu toé ngajim.

³Aram bo ngajis méu, maik toé manga tiba apa-apas ai toé molor ngajis, ai apa ata tegi de méu kudut pandé laos belek da’ats kanang.

⁴Oé méut ata toé junggu! Toé pecing le méu ko, te haé reba agu belek de lino pandé bali agu Mori Keraéng? Jari, céing kaut ata pandé haé reba agu lino ho’o, hia hitu te ciri bali de Mori Keraéng.

⁵Néka nggo’o bet de méu, toé manga campitn curup de Surak Nggeluk, ata taé nenggo’o: “Nai hitut widang de Mori Keraéng oné weki dité, mberes kéta ngoéngn.”

⁶Maik widang hitut téing Diha, céwé mésé oné-mai nanang de nai dité hitu. Landing hitu taé kole le Surak Nggeluk: “Mori Keraéng pangga salang data siot mésé nai, maik momang ata siot jinggop.”

⁷Landing hitu, tengguk ga oné Mori Keraéng agu dungkang jing da’at, wiga jing da’at hitu losi oné-mai ranga de méun!

⁸Ruis-ruis koém agu Mori Keraéng kudut Hia kolé ruis méuy. Oé méu ata ndékok! Pandé nggélok koé limes. Oé méut rambang-bali nais! Pandé nggeluk koé nais.

⁹Teserm ga, le rétang-nenep. Nahé tawas lesing le rétang, nisang nais lesing le wéong nai.

¹⁰Jinggop koé ba wekis oné ranga de Morin, wiga Hia te pandé langkas méu.

¹¹Asé-ka’é daku, néka manga pocu taus méu! Céing ata pocu agu maja asé-ka’é ca imbin, hia mbéis agu maja wintuk de Mori Keraéng. Émé hau maja wintuk de Mori Keraéng, hau dé ga toé ata pandé lorong wintuk de Mori Keraéng, maik ciri adak ata beté-bicar.

¹²Kali po hanang Mori Keraéng kali ata manga hakn te téing wintuk agu te bicar manusia. Hia ata manga kuasaN te pandé selamak agu te pandé ampus manusia. Jari, céing kéta méu, wiga méu ngoéng te maja cama taus?

¹³Oé méut taé nenggo’o, “Leso ho’o ko diang ami ngo oné béndar hitu, agu nituk ami ka’éng ca ntaung te lékong agu kawé séng.”

¹⁴Séngét le méu toing daku: toé baé le méu apa ata jarin diang agu apa betuan mosé de méu. Mosé de méu hitu cama ného wos hitut cekoé kaut itan, poli hitu mora gi.

¹⁵Ata tu’ungn kali, méu paka taé nenggo’o: “Émé sendo le Morin, ami te mosékm te pandé hitu-ho’o.”

¹⁶Maik te ho’on méu mésé-nai agu joak. Da’atd joak de méu situ.

¹⁷Jari, émé manga ata baé co’oy pandé di’a, maik toé pandés liha, hia hena le ndékoky.