Read Manggarai 1 PETRUS 4 Bible Online

1 PETRUS 4 - Manggarai bible

1 PETRUS 4

¹Ai wekin hi Kristus poli ta’ong susan, itu tara méu kolé paka jerék wekis te ta’ong susa. Céing ata wekin poli ta’ong susa, toé pandé ndékok koléy.

²Landing hitu, mosé de méu nggere-olon oné lino ho’o paka lorong ngoéng de Mori Keraéng.

³Ai naisn ga ba weki de méu cama ného ba weki de wa’u siot toé pecing Mori Keraéng. Méu poli mosé lorong belek da’at, humer, langu, héba-hak, agu io pina-naéng ata poli ré’ingd.

⁴Te ho’on ga, lengets isét toé imbi Mori Keraéng, ai méu toég lorong ba weki da’at disé, ngong langu le minakn sanggéd belek daat. Itu tara pocus méu lisé.

⁵Maik, tai isé paka papong oné Mori Keraéng hitut poli géréng te beté-bicar data mosé agu data mata.

⁶Itup tara Keréba Di’a hitu poli wéron kolé oné sanggéd ata mata, kudut nai-nawa disé ngancéng mosé lorong ngoéng de Mori Keraéng, koném po poli bicard lorong wekid cama ného sanggéd manusia.

⁷Sanggéd cao-ca ruis te cemols ga. Landing hitu madis agu jerék koé ba wekis, kudut ngancéng ngajim.

⁸Maik ata mésén: Paka momang tu’ung haé ata, ai momang hitu ngancéng tadu do ndékok.

⁹Téing dumpek cama tau, néka agu rengus.

¹⁰Keturu di’a-di’a koé cama taus, lorong agu tabing hitut poli tiba oné néténg méu. Ali hitu, méu ngancéng ciri ata nggalas te wintuk widang de Mori Keraéng.

¹¹Céing ata ba keréba, paka ba keréba de Mori Keraéng; céing ata keturu laing, paka keturu lorong mberes hitut widang de Mori Keraéng, kudut oné sanggén cao-ca bongy Mori Keraéng landing hi Yésus Kristus. Latang te Hia dé bong agu kuasa tédéng lén! Amén.

¹²Asé ka’én ata momang laku! Te ho’on ga leng kéta mésén ta’ong susa de méu, ai rémé hena le damangs. Maik néka lenget laing, néhot toé kéta cung damang hitu.

¹³Ngot cembes kali nais, ai méu lut ta’ong susa ného hi Kristus, wiga méu tai ngancéng naka agu nisang nais du si’angn mengit Diha.

¹⁴Mosé di’a méu, émé méu lengga latam landing ngasang di Kristus, ai mengit de Nai Nggeluk manga oné méuy.

¹⁵Néka manga cengata oné-mai méu ata ta’ong susa landing le mbelé ata, le tako, le pandé da’at, ko le laléng oné wintuk data.

¹⁶Maik émé méu ta’ong susa landing le ata serani, néka ritak laing, maik poro bong kali Mori Keraéng ai méu ba ngasang di Kristus.

¹⁷Ho’og leson te pu’ungn beté-bicar, wangka oné-mai itét ro’éng run Mori Keraéng. Éme beté-bicar hitu wangka oné-mai itén, céwén kolé isét toé imbi oné Keréba Di’a de Mori Keraéng.

¹⁸Ai manga poli tulis oné Surak Nggeluk: “Émé isét molor kaut toé émongn te haéng selamak, Apan kolé isét toé imbi agu isét ndékok!”

¹⁹Landing hitu, émé manga ata ta’ong susa landing le ngoéng de Mori Keraéng, hia paka pandé di’a mtaung agu condo wekin oné Mori baté Jari agu Dédék hitut junggu kéta.