Read Manggarai 1 PETRUS 5 Bible Online

1 PETRUS 5 - Manggarai bible

1 PETRUS 5

¹Aku toing sanggéd ata tu’a laing oné bahi-réha méu. Aku ho’o dé haé reba data tu’a laing de méu, ata saka-si ta’ong susa di Kristus agu ata kudut tiba lahé oné mengit di Kristus hitut si’ang tai.

²Émba koés sanggéd jimbal de Mori Keraéng situt manga oné méu, néka ali mendo nai, maik ali lélak lorong ngoéng de Mori Keraéng. Néka kolé ali nanang te kawé delék, maik te gori keturu mai wa-mai nain.

³Néka pandé néhot méu ata kuasa latangt te perénta isé situt irip le méus, maik poro ciri ata toming laing le jimbal situ.

⁴Émé caiy Ata Lami Mésé, ngong hi Yésus Kristus, méu te tiba songkok néra ata toé manga cemol mengitn.

⁵Oé sanggés méu ata uwa, nenggitu kolé méu: Lorong koé ata tu’as! Agu sanggés taung méu, jinggop koé ba weki cama taus, ai nenggo’o tulis oné Surak Nggeluk: “Mori Keraéng pangga salang data siot mésé nai, maik momang ata siot jinggop.”

⁶Landing hitu, jinggop koém bolo-mai ranga de Mori Keraéng hitut penong kuasa, kudut émé rapak leson méu tiba mengit oné mai Hia.

⁷Condo taung simpungs oné Hia, ai Hia tinu méuy.

⁸Doing agu jerék koém! Ai jing da’at hitut bali de méu, cama ného acu rani ata lolo kin te cekel méu.

⁹Dungkang hia le mberes imbis, ai pecing le méu, sanggéd taung asé-ka’é ca imbi oné temu tana lino ta’ong susa ného méu.

¹⁰Mori Keraéng pu’ud sanggéd widang poli pilé méu oné hi Kristus te dadé méu nggere-oné mengit Diha hitut tédéng lén. Du méu poli ta’ong cekoén susa, Hia kolé te pandé jepek, ndeng, mberes agu pandé metek méu.

¹¹Hia dé ata manga kuasa te ho’on agu dengkir lén. Amén!

¹²Létang li Silwanus asé-ka’é ca imbi ata junggu, tulis wokok kaut laku surak ho’o latang te méu. Kudut toing agu imbi le méu, te ho’oy widang ata tu’ung-tu’ung oné-mai Mori Keraéngn. Hesé lencek koém oné widang hitu!

¹³Tabé latang te sanggés taung méu, oné-mai asé-ka’é ca imbi ata poli piléd le Mori Keraéng oné tana Babilonia. Tabé kolé oné-mai hi Markus, anak momang daku.

¹⁴Tabé koé cama taus ali momang agu kembung. Hambor libur loréng sanggés taung méu ata nai ca anggit agu tuka ca léléng oné hi Kristus. Amén!