Read Manggarai 2 PÉTRUS 2 Bible Online

2 PÉTRUS 2 - Manggarai bible

2 PÉTRUS 2

¹Danong, oné bahi-réha ro’éng de Mori Keraéng manga nabi tangké. Nenggitu kolé te ho’on, oné bahi-réha méu manga guru tangké. Isé ba toing te pandé wéléng agu pandé ampus. Ngot isé te pali hiat Cau Kuasa hitut poli sambé isé. Ali hitu, isé ba ampus latang te weki rud.

²Dodg ata poli lut mosé de guru tangké situt kuasa le belek da’at. Landing le pandé da’at disé, Salang Molor hitu loéry lata.

³Ali goméngd, sanggéd guru tangké situ tombo joak te kawé ontong oné mai méu. Maik latang te pandé disé situ, béhéng’g poli ambin wahéng agu ampus toé ngancéng renggé kolén.

⁴Danong Mori Keraéng toé momang sanggéd malékat situt pandé ndékok, maik péncar isé nggere-wa neraka, osang nendep baté pongo isé le ranté kesep cai leson beté-bicar.

⁵Danong kolé Mori Keraéng toé momang lino ho’o. Du katu waé mbang oné lino data situt lopé-lapét, Hia pandé selamak kaut hi Nuh ata keréba molor hitu agu pitu taus haén.

⁶Danong Mori Keraéng wahéng agu pandé ampus le api béndar Sodom agu Gomora, kudut ciri toming latang te isét lopé-lapét nggere-musin tai.

⁷Du hitu, Hia pandé selamak kaut hi Lot ata molor. Hi Lot hitu sereng kéta ta’ong susan le gauk da’at data siot toé pecing adaks agu lorong kaut belek da’atd kanang.

⁸Hi Lot ho’o ka’éng oné bahi-réha isé agu néténg leso ita agu séngét sanggéd pandé da’at disé, wiga beti kéta nain.

⁹Jari, Mori Keraéng pecing te cépé sanggéd ata nggeluk oné-mai damang agu na’a sanggéd ata da’at kudut wahéngs du leso beté-bicar.

¹⁰Céwén kéta isé siot lorong belek da’at situt pandé rinék wekid agu lengga adak de Mori Keraéng. Guru tangké situ mésé kéta naid agu toé rantang te pandé da’at, wiga toé kéta ngangit te loér sanggéd cao-ca situt mengit.

¹¹Ngot weki rud kaut sanggéd malékat, koném po céwé mberes agu céwé mésé kuasad oné-mai guru tangké situ, toé gorid te loér sanggéd cao-ca mengit situ du soléng wahéng disé oné ranga de Mori Keraéng.

¹²Maik, guru tangké situ cama ného kaka toé manga utekd, dung kaut latang te deko agu te mbelé. Isé loér apa ata toé pecing lisé, wiga ampus weki rud ného kaka milas le pandé da’atd situ.

¹³Lahén pandé da’at disé, tiba wada da’at. Ngot nuk disé minakn pandé héba-hak le leso. Isé situ cama ného rops agu saki, ai leng kéta gomeng agu longkir, pandé ritak laing émé hang ko inung cama agu méus.

¹⁴Émé ita inewai, lepot kéta matad belek te loma; toé kéta hema bod te pandé ndékok. Isé emi nai de sanggéd ata les imbid. Nai disé laséng gomeng agu longkir. Isé situ, toét-toé hena le mawangs!

¹⁵Isé poli legong salang molor, itu tara wéléngd. Isé lut salang di Biléam, anak di Béor, atat danong nanang kéta te tiba lahé latang te sanggéd pandé da’at.

¹⁶Maik hi Biléam tiba langga landing pandé da’atn, ai keledai tékékn rodo kaut ngancéng curup ného manusiay te ré’ing nabi hitu néka bapa-béngot.

¹⁷Guru tangké situ cama ného ulu waé metis, cama ného rewung hiot wéwét le buru warat. Mori Keraéng poli ambi osang tuil kéta latang te isé.

¹⁸Bo kéta lomés ba wekid, kalim po keréba disé penong joak toé manga icin. Keréba disé penong le wajak da’at kudut emi nai data siot hitu koés di teser oné-mai wéléngd.

¹⁹Isé reké te céla latangt ata situ, kalim po weki rud ciri mendi de ruku te pandé ampus. Ai céing ata koda latay, hia ciri mendi data hituy.

²⁰Ata poli imbi Morin agu Ata Sambé dité hi Yésus Kristus, poli oké sanggéd réngkes de lino ho’o. Maik, émé musi main were-watas kolé oné sanggéd réngkes situ, cemoln ga taran mosé disé céwé da’at oné-mai hitut laring cain.

²¹Landing hitu, céwé di’an isé situ toé dé’it pecing po pecing Salang Molor, maik poli hitu holés kolé oné-mai perénta de Mori Keraéng hitut keréba oné isé.

²²Latang te isé patun kéta go’ét ho’o: “Acu hang kolé roa run, ela kéor kolé purang run.”