Read Manggarai 2 PÉTRUS 3 Bible Online

2 PÉTRUS 3 - Manggarai bible

2 PÉTRUS 3

¹Asé-ka’én ata momang laku! Ho’o surak te suan ata tulis laku latang te méu. Oné sua surak situ, aku sur méu te nuk kaut apa ata molord.

²Ali hitu, nuk kolés le méu keréba danong situt poli caing le sanggéd nabi nggeluk agu perénta de Morin agu Ata Sambé dité ata poli caingd le sanggéd rasul.

³Ata mésén paka pecing le méu, du leso cemol, tuas ata situt mosé lorong belek da’atd. Isé situ te loér méus.

⁴Taé disé, “Niay Hia hitut poli reké te mai? Ai pu’ung du matad empo dité, sanggéd cao-ca ného du wangka kid pu’ung dédékn lino ho’o.”

⁵Isé kunjung kéta toé gorid te imbi, te pu’ung du wangkan Mori Keraéng dédék awang agu tana ali rewengN. Dédék Liha tana lino oné-mai waé agu ali waé.

⁶Le waé hitu kolé, ngong waé mbang, ampus Liha danong tana lino.

⁷Ali rewengN hitu kolé, tinu agu na’a Liha awang agu tana te ho’on caing leso beté-bicar, du ampusd Liha sanggéd ata da’at oné api.

⁸Asé-ka’é ata momang laku! Ca ho’o néka kéta hemong le méu: Latang te Mori Keraéng, ca leso cama kaut ného ca sebu ntaung, agu ca sebu ntaung cama kaut ného ca leso.

⁹Toé galek rekéN Mori Keraéng, koném po galekn taé data. Ngéngga naiN latang te méu, ai ngoéng Diha néka manga cengatan ata ampus, maik sanggén ata holés kolés agu tesers.

¹⁰Leso de Morin rodo caiy ného ata takoy. Du hitu awang rencoy agu ngorong kéta runingn. Sanggéd ménan éta awang muntung taungs le api, lino agu sanggéd icin mora-meres taungs.

¹¹Jari, émé sanggéd cao-ca ciri rewut nenggitu taungs, méu paka nggeluk agu junggu mosés,

¹²du géréng agu bengkes le méu cain leso de Mori Keraéng. Leso hitu awang agu sanggéd ménan ampus taungs le api.

¹³Maik lorong reké Diha, ité géréng awang agu tana weru, nia manga ata molor agu agil.

¹⁴Landing hitu asé-ka’é ata momang laku, cang agu géréng leso hitu, paka wuli wekis te hambor agu Hia, wiga méu toé manga celas agu toé manga ndékoks du cain Hia tai.

¹⁵Rékéng kaut le méu te ngéngga nai de Mori dité ného sokor latang te méu kudut tiba selamak. Ai hitu ata poli tulis latang te méu li Paulus asé-ka’é momang dité, lorong agu anor hitut tabing oné hia.

¹⁶Nenggitu dé taé diha oné sanggéd surakn. Bo tu’ung, oné sanggéd surakn situ mangas ata toé émong te idep. Hitu ata pandé holé-halés le ata siot toé pecing apa-apad agu ata toé mberes imbid, wiga ciri ampus weki rud. Isé kolé pandé hole-halés surak iwod oné Surak Nggeluk.

¹⁷Méu asé-ka’én ata momang laku! Poli pecing le méu toing so’o bebolon. Landing hitu jerék koém, kudut méu néka wéléng nggere-oné salang data siot toé pecing adaks, agu pa’u oné-mai osang bate hesé cedeks.

¹⁸Ciri tu’a koém ga oné tabing agu imbi hi Yésus Kristus, Mori agu Ata sambé dité. Latang te Hia dé mengit, te ho’on agu tédéng lén.