Read Manggarai 1 YOHANÉS 1 Bible Online

1 YOHANÉS 1 - Manggarai bible

1 YOHANÉS 1

¹Reweng hitut téing mosé, polig manga du wangkan. Ami poli dengén le tilugm, poli ita dungkan le matagm, poli saka-si agu poli cau kéta le limé rugm. Hitu ata tulisn lami oné méu.

²Mosé hitu polig nesan, agu polig itan lami. Te ho’on ga, ami téing saka-si agu keréba mosé tédéng lén hitu oné méu. Mosé hitu, manga cama-cama agu hi Ema agu poli si’angn oné ami.

³Ata poli ita agu poli dengé dami, hituy dé ata keréba kolé lami, kudut méu nai-ca anggit agu amim. Tuka ca léléng dami hitu, ngong tuka ca léléng agu hi Ema agu hi Yésus Kristus AnakN.

⁴Tulis lami sanggéd taung so’o latang te méu kudut ciri jepeky nisang nai dami.

⁵Ho’oy keréba ata poli dengén lami oné-mai hi Yésus Kristus te tombo oné méu: Mori Keraéng hitu pu’un gérak agu toé kéta manga nendep oné Hia.

⁶Nggopétn curup agu pandé dité émé curup kanang te ité nai-ca anggit agu Hia, maik oné nendep kin moséd.

⁷Maik émé ité mosé oné gérak cama ného Mori Keraéng ka’éng oné gérak, ité te ulu-pukul agu haé-ata agu sanggéd ndékok dité koso taungs le Dara de Mori Yésus, AnakN.

⁸Émé nggo’o taé dité: ité toé manga ndékokd, ngong ité te adong weki rud, agu Mori Keraéng toé manga oné nai dité.

⁹Émé ité tura ndékokd, ampongs Liha sanggéd ndékok dité agu pandé nggeluk ité oné-mai sanggéd da’at, ai Hia rapak rekeN agu agil anorN.

¹⁰Émé nggo’o taé dité: ité toé dé’it manga pandé ndékokd, rékéngn lité néhot Hia ata nggopéty agu Reweng Diha toé mangay oné ité.