Read Manggarai 1 YOHANÉS 5 Bible Online

1 YOHANÉS 5 - Manggarai bible

1 YOHANÉS 5

¹Céing kaut ata imbi te Mori Yésus hitu hi Kristus, ata hitu loas oné-mai Mori Keraéngn. Céing ata momang Mori Keraéng, hia kolé momang isét loas oné-mai Mori Keraéngd.

²Nenggo’oy dé pecingn lité, te ité momang sanggéd ata loas oné-mai Mori Keraéng: émé ité momang Mori Keraéng agu lorong sanggéd peréntaN.

³Momang Mori Keraéng, ngong lorong sanggéd peréntaN. Toé mendod sanggéd perénta Diha.

⁴Ai sanggéd ata loas oné-mai Mori Keraéngd, ngancéng pandé koda lino ho’o. Ali imbid, tara ngancéng pandé kodan lité lino ho’o.

⁵Céing ata ngancéng pandé koda lino ho’o? Hanang hiat imbi, te Mori Yésus Anak de Mori Keraéng.

⁶Yésus Kristus poli wa’u oné lino ho’o. Hia cebong le waé agu bowo daraN. Toé hanang le waé, maik le waé agu dara. Nai Nggeluk ata téing saka-si, te sanggéd taung situ molord agu Nai Nggeluk hitu patun te imbi.

⁷Ai manga telud ata téing saka-si (oné Surga: ngong hi Ema, Reweng agu Nai Nggeluk; telu situ léléng cas kali.

⁸Agu manga telud ata téing saka-si oné lino): Nai Nggeluk, waé agu dara, telu situ léléng cas kali.

⁹Tibas lité saka-si de manusia, maik saka-si de Mori Keraéng céwé mberes. Hituy dé saka-si de Mori Keraéng latang te AnakN.

¹⁰Céing ata imbi Anak de Mori Keraéng, paéng liha saka-si hitu oné nain. Maik céing ata toé imbi Mori Keraéng, rékéngn lata hitu te Mori Keraéng ata nggopéty, ai ata hitu toé imbi saka-si de Mori Keraéng latang te AnakN.

¹¹Betuan saka-si hitu: ngong Mori Keraéng poli widang ité mosé tédéng lén, agu AnakN te ciri pu’un mosé tédéng lén hitu.

¹²Céing ata olét kéta haé reba agu hi Anak, hia hitu paéng mosé tédéng lén; maik céing ata toé olét haé reba agu hi Anak, hia hitu toé paéng mosé tédéng lén.

¹³Sanggéd taung situ tulis laku latang te méut imbi Anak de Mori Keraéng, kudut pecing te méu hitu paéng mosé tédéng lén.

¹⁴Metek kéta imbi dité, te Hia sendo ngaji dité émé ité tegi cao-ca lorong ngoéngN.

¹⁵Émé pecing lité te Hia sendo taungs apa kaut tegi dité, pecing kolé lité te cao-ca situt tegi dité polisg tibad.

¹⁶Émé méu ita asé-ka’é ca imbi pandé ndékok ata toé ampus laing, céwé di’an ngaji méu kamping Mori Keraéng. Mori Keraéng te téing mosé latangt hia hitu. Manga ndékok atat ampus laing: Latang te atat pandé ndékok nenggitu, toé taé laku te méu paka ngajim.

¹⁷Ndékok dé sanggéd pandé da’at dité, maik manga ndékok ata toé ampus laing.

¹⁸Pecing lité te néténg atat loas oné-mai Mori Keraéng toé ruda olo pandé ndékok, ai Anak de Mori Keraéng sémbéng hiay agu toé ngancéng cegotn le jing da’at.

¹⁹Pecing lité te ité loas oné-mai Mori Keraéngd, koném po lino ho’o kuasa le jing da’aty.

²⁰Pecing lité te Anak de Mori Keraéng poli cain agu widang nggalas latangt ité, kudut baé lité Mori Keraéng hitut molor. Ali hitu, ité nai ca anggit agu Mori Keraéng agu Yésus Kristus AnakN. Ho’oy Mori Keraéng ata tu’ungn agu ho’oy mosé tédéng lén hitu.

²¹Sanggéd anak daku! Tadang koém oné-mai sanggéd io pina-naéng.