Read Manggarai WIDANG SI’ANG ONÉ HI YOHANÉS 16 Bible Online

WIDANG SI’ANG ONÉ HI YOHANÉS 16 - Manggarai bible

WIDANG SI’ANG ONÉ HI YOHANÉS 16

¹Itug kali dengén laku reweng ata getas kétay oné-mai Mbaru Nggeluk, curup agu pitu malékat situ, “Ngom ga agu cok icid pitu piala rabo de Mori Keraéng hitu nggere-oné lino.”

²Og ngon Malékat hitut laring cain agu cok liha ici pialan nggere-oné lino. Itug kali tuad wicul ata pandé copél laing oné sanggéd ata situt manga palas de kaka hitu agu isét suju patungn.

³Malékat te suan, cok ici pialan lobo tacik, itug kali waé tacik hitu ciri daray, cama ného dara data mata, agu sanggéd cao-ca situt mosé oné tacik mata kéta taungs.

⁴Malékat te telun, cok ici pialan bétan sanggéd ngalor agu ulu waé, itug kali waé situ ciri dara taungs.

⁵Dengé laku taé de malékat hitut manga kuasan latang te waé, “Agild Ité, Itét manga agu ata poli manga! Ité ata nggeluk, ai Ité poli téing wahéng ho’o.

⁶Patun muing isé te tiba wahéng hitu. Te ho’on, Ité téing isé inung dara. Ai isé poli pandé bowo dara de sanggéd ata serani agu sanggéd nabi.”

⁷Itug kali dengén laku reweng oné-mai compang hitu, “Yo Mori, Mori Keraéng, Ata Pu’un Kuasa, molor agu agil sanggéd beté-bicar Dité.”

⁸Malékat hitut te patn, cok ici pialan oné mata leso. Itug kali mataleso tiba kuasa te tapa ngkewus taung manusia.

⁹Muntung ngkewus kéta taung manusia ali leng bail kolangn api hitu. Itug kali loér-lokétn lisé ngasang de Mori Keraéng hitut manga kuasan latang te sanggéd copél situ. Maik isé toé tesers oné-mai ndékok agu toé bong Mori Keraéng.

¹⁰Malékat hitut te liman, cok ici pialan bétan seriga de kaka hitu. Itug kali tana hitut peréntan ciri nendep, agu manusia pasar kérek ngis ali leng bail betin.

¹¹Isé loér-lokét Mori Keraéng hitut éta Surga, ai le beti agu le wicul. Maik isé toé tara tesers oné-mai sanggéd pandé da’atd.

¹²Malékat hitut te enem, cok ici pialan béta-mai waé mésé Éfrat. Itug kali metin waén, wiga sanggéd raja situt mai awo-mai par ngancéng lagén.

¹³Ita kolé laku telud jing da’at ata ba tara de ngerék, losa oné-mai mu’u de manunggé, mu’u de kaka agu mu’u de nabi tangké.

¹⁴Hitus dé jing da’at ata pandé tanda lenget. Isé ngo cumang sanggéd raja oné temu tana lino, kudut wikit te cama laing rampas oné leso mésé, ngong leso de Mori Keraéng Ata Pu’un kuasa.

¹⁵“Lélo dé, Aku mai ného ata takok. Mosé di’a hia hitut tokong kin agu mengkek kin ceca sélékn, wiga toé ritak te lako déméng lacon.”

¹⁶Itug kali telu jing da’at situ impung sanggéd raja oné ca osang, ngasangn Harmagédon oné curup Ibrani.

¹⁷Poli hitu, malékat te pitun cok ici pialan nggere-éta awang. Itug kali dengé reweng ata getas kéta oné-mai seriga boné Mbaru Nggeluk, “Poli taungs pandéd ga!”

¹⁸Og kali wili-welokn pasat agu mpirang genggus, agu tuan nupung mésé ata toé dé’it manga nenggitun du pu’ung mangan manusia oné lino. Hituy dé nupung ata mésé tu’ung.

¹⁹Béndar mésé hitu renco pati laing telu agu renco kolé sanggéd béndar de wa’u situt toé pecing Mori Keraéng. Béndar Babél kolé toé hémong te pandé copél le Mori Keraéng. Téing Liha piala hitut penong ali anggor rabo méséN.

²⁰Sanggéd nuca mora meres, agu sanggéd poco toég manga ita koléd.

²¹Usang bua ata mendon néténg weras anggatn lima-mpulu kilo, pa’u éta-mai awang rempé sanggén ata. Og kali manusia situ loér Mori Keraéngs, soho mésén kéta copél le usang bua hitu.