Read Manggarai WIDANG SI’ANG ONÉ HI YOHANÉS 19 Bible Online

WIDANG SI’ANG ONÉ HI YOHANÉS 19 - Manggarai bible

WIDANG SI’ANG ONÉ HI YOHANÉS 19

¹Poli hitu dengé laku raos kéta reweng de lawa do éta Surga, “Aleluya! Selamak, mengit agu kuasa manga oné Mori Keraéng dité.

²Beté-bicar Diha molor agu agiln. Polig liha wahéngn iné-wai mbérong mésé hitu, ata pandé rowak lino ali loman. Mori Keraéng poli wahéngn iné-wai mbérong hitu te léko dara de sanggéd mendiN.”

³Sua laing duangn kolé, taé disé, “Aleluya! Yo, toé celan! Kembus nus de béndar hitu toé manga ké’étn.”

⁴Suampulupat tu’a agu pat kaka situ, io agu suju Mori Keraéng hitut lonto bétan kedéra hitu, mai taéd, “Amén, Aleluya.”

⁵Itu kali dengé reweng oné-mai kedéra hitu, “Naring ga Mori Keraéng dité, oé sanggés méu mendi Diha, méut hiang Hia, wan koé, étan tu’a!”

⁶Poli hitu dengé laku raos de lawa do, cama ného ngorong de waé mbang agu mpirang de genggus mésé, “Aleluya! Ai Mori Keraéng dité, Ata Pu’un kuasa polig ciri Rajan.

⁷Ali hitu, mait ga ité naka agu cembes nai te bong Hia! Ai leso kawing de Anak Jimbal cai gi, agu nacaN polig mengkekn.

⁸Nacan hitu polig sélék ceca lénan hemél ata ndili-ndelap agu bakok mbot!” (Lénan hemél hitu, ngong sanggéd pandé ata molord de weki serani).

⁹Itu kali malékat hitu jera aku, “Tulis ga: Mosé di’a isét siro te hang cama oné ramé kawing de Anak Jimbal.” Mai kolé taén, “Ho’oy keréba ata molorn tu’ung, ai oné-mai weki Run Mori Keraéng.”

¹⁰Itug kali aku suju bolo-mai wa’i, maik mai taén, “Néka pandé nenggitu! Ai aku kolé ca mendi cama-ného hau agu sanggéd asé-ka’é ca imbim, ata cau tu’ung saka-si de Mori Yésus. Suju Mori Keraéng kaut! Ai saka-si de Mori Yésus hitu te téing nggalas atat ba pedé de Mori Keraéng.”

¹¹Itug kali itan laku céngkay para Surga. Manga ca jarang jampi agu Hiat létin, ngasangn: “Ata Junggu agu Molor.” Hia agiln oné beté-bicar agu oné rampas.

¹²MataN cama ného dila apiy, sa’iN tesong do kéta songkok. Oné WekiN manga tulis ngasang ata toé kéta pecing lata betuan, hanang le weki run.

¹³Hia paké juba ata poli lembo oné dara agu ho’oy ngasangN: “Reweng de Mori Keraéng.”

¹⁴Sanggéd serdadu Surga lorong Hias, léti jarang jampis agu paké lénan hemél ata bakok mbot.

¹⁵Oné-mai mu’uN, losa ca keléwang harat latang te béba sanggéd wa’u wiga kodas. Hia te perénta isé ali dongkar beci. Kera anggorN oné watu pénang, ngong cumpeng de Mori Keraéng Ata Pu’un Kuasa.

¹⁶Oné jubaN agu oné pa’aN, manga tulis ngasang ho’o: “Raja de sanggéd raja agu Mori de sanggéd mori.”

¹⁷Itug kali itan laku cengata malékat hesé oné mata lesoy. Malékat hitu kepok agu getas kéta rewengn oné sanggéd kaka lélap éta awang, “Mai ga, impung cé’é ho’om kudut hang cama oné ramé mésé de Mori Keraéng.

¹⁸Mai ga, hang nuru de sanggén raja, nuru de tu’ad sanggéd serdadu, nuru de sanggéd berambang tana, nuru de sanggéd jarang agu ata létid, nuru de sanggén mendi ko toé mendi, agu nuru de sanggéd ata, wan koé, étan tu’a.”

¹⁹Poli hitu, ita laku kaka hitu agu sanggéd raja oné lino lawang agu serdadun, nekeks kudut rampas dungkang Hiat léti jarang agu sanggéd serdaduN.

²⁰Kaka hitu dekoy cama-cama agu nabi tangké situt poli pandé tanda lenget bolo-mai rangan. Tanda lenget situ poli pandé wéléng isét poli tiba tanda oné-mai kaka hitu, agu isét poli suju patungn. Kaka agu nabi tangken peké déméng moséd nggere-oné api agu mburé hitut dila haok kin.

²¹Sanggéd ata lut isé, béba mata taungs le keléwang hitut losa oné-mai mu’u Dihat léti jarang hitu. Sanggéd kaka lélap béjé taungs ali hang nuru disé.