Read Manggarai WIDANG SI’ANG ONÉ HI YOHANÉS 21 Bible Online

WIDANG SI’ANG ONÉ HI YOHANÉS 21 - Manggarai bible

WIDANG SI’ANG ONÉ HI YOHANÉS 21

¹Poli hitu, ita laku awang weru agu lino weru. Awang, lino, agu tacik hitut laring cain toég mangas.

²Ita kolé laku béndar nggeluk, ngong Yérusalém weru, wa’u éta-mai Surgan, oné-mai Mori Keraéng. Béndar nggeluk hitu polig sélékn, cama ného naca ata géréng kopé harat.

³Itug kali dengén laku reweng ata getas kéta oné-mai seriga hitu, “Lélo dé, ndéi de Mori Keraéng manga oné beréha manusia, agu Hia kudut ka’éng cama agu iséY. Isé te ciri ro’éng Diha, agu weki run Hia te loréng isé, agu ciri Mori Keraéng diséy.

⁴Hia te koso lu’u disé, agu toég manga kolé mata, walu, jéjéng ko ngawa-ngaés, ai sanggéd taung situt manga, polis morad ga.”

⁵Mai taé de Mori Keraéng hitut lonto bétan seriga, “Lélo dé, te ho’on Aku pandé sanggéd cao-ca te ciri weru!” Mai kolé taén oné aku, “Tulis ga, ai sanggéd curup so’o molord agu ngancéng imbi laings.”

⁶Ce duangn kolé curupN, “Sanggéd taung, polig jarid. Akuy dé Alfa agu Oméga, Du Wangkan agu Du Cemoln. Ata masa waé, téing bod kaut laku te inung oné-mai ulu waé mosé.

⁷Céing ata ontong, hia te tiba taung sanggéd so’o, agu Aku te ciri Mori Keraéng dihak, hia te ciri anak Dakuy.

⁸Maik sanggéd ata siot kekop, toé imbi, janto, lenci, mbelé ata, mbérong, io pina-naéng agu sabi nggopét, isé te tiba makid oné api agu mburé mésé hitut dila haok kin. Ho’oy dé mata te suan.”

⁹Poli hitu, mai cengata oné-mai pitu malékat ata cau pitud piala, ata penong le pitu copél turung cemol hitu, cumang akuy mai taén, “Mai cé’é ho’o, aku kudut toto oné hau, haé kilo de Anak Jimbal.”

¹⁰Itu kali Mori Keraéng Nai Nggeluk kuasa akuy, agu malékat hitu dadé akuy nggere-éta poco mésé ata langkas kétay. Toi liha oné aku béndar nggeluk Yérusalém weru, hitut wa’u éta-mai Surgan oné-mai Mori Keraéngn.

¹¹Béndar nggeluk hitu penong ali mengit de Mori Keraéng, agu néran cama ného luju hiot manik kéta, ného luju yaspis ata cino mana watu nggireng.

¹²Turéngn de béndar hitu mésé agu langkasn, manga campulusuad lewangn. Néténg lewang situ lami le cengata malékat, agu manga tulis ngasang de campulu sua panga Israél.

¹³Bawo-main, be lé-main, be salé-main agu be lau-main béndar hitu manga gici telud lewang.

¹⁴Turéng de béndar hitu, hesé lobo campulusua watu ligéng ata manga tulis ngasang de campulusua rasul de Anak Jimbal.

¹⁵Malékat hitut curup agu aku, cau ca dongkar wolo oné-mai emasn, latang te wolo béndar hitu, lewangn agu turéngn.

¹⁶Tara de béndar hitu pat bincungy, léwén cama agu ngénggan. Itu kali wolon liha béndar hitu. Si’ang léwén sua sebu pat ratus kilo métér, nenggitu kolé ngénggan agu langkasn.

¹⁷Du poli wolon turéng le malékat hitu, langkasn enempulu métér lorong wolo de manusia.

¹⁸Turéng hitu pandé oné-mai luju yaspis, agu béndar hitu pandé oné-mai emas gicing, cama kaut ného nggireng de sereméngy.

¹⁹Sanggéd ligéng turéng de béndar hitu, ringgi-roék le sanggéd tara de luju. Ligéng laring cain pandé oné-mai luju yaspis, te suan le luju nilam, te telun le luju mirah, te patn le luju zamrud,

²⁰te liman le luju unam, te enem le luju sardis, te pitun le luju ratna cempaka, te alon le luju beril, te ciokn le luju krisolit, te cepulun le luju krisopras, te campulu can le luju lazuardi agu te campulusuan le luju kecubung.

²¹Campulu sua lewang situ, ngong campulusua mutiara: Néténg lewang pandé oné-mai ca mutiara. Sanggéd salang de béndar hitu pandé oné-mai emas gicing, cama ného nggireng de sereméng.

²²Toé manga itan laku Mbaru Nggeluk bonén, ai weki run Mori Keraéng, Mori Pu’un Kuasa, agu Anak Jimbal ciri Mbaru Nggelukn.

²³Béndar hitu toé manga sékék mata leson agu wulang latang te néran, ai mengit de Mori Keraéng pandé néran agu Anak Jimbal hitu luing lampun.

²⁴Sanggéd wa’u te karong le gérak de béndar hitu, agu sanggéd raja oné lino ba borad oné hia.

²⁵Sanggéd lewang de béndar hitu céngka kid tédéng leso, ai toég manga wié.

²⁶Bora agu hiang de sanggéd wa’u te ba oné hias.

²⁷Toé ngancéng ngo boné béndar hitud sanggéd cao-ca ata rinek, ata pandé lenci ko ata nggopét, maik hanang isét manga ngasangd oné Surak Data Mosé de Anak Jimbal hitu.