Read Manggarai WIDANG SI’ANG ONÉ HI YOHANÉS 3 Bible Online

WIDANG SI’ANG ONÉ HI YOHANÉS 3 - Manggarai bible

WIDANG SI’ANG ONÉ HI YOHANÉS 3

¹“Tulis koé latang te malékat de weki serani oné Sardis: Ho’oy reweng Diha, ata paéng pitud nai de Mori Keraéng agu pitud ntala situ: Pecing Laku sanggéd gori de méu: Taés méu mosém, kalim po matam!

²To’o ga agu mberes koé apa ata ngai mangad situt tiong kudut matas, ai toé kéta manga ita can Laku gori de méu ata jepekn oné ranga de Mori Keraéng.

³Landing hitu nuk dé titong ata poli tiba agu dengé le méu; lorongs le méu agu teserm ga! Ai émé toé wela matas, Aku kudut mai oné méu ného ata takok, agu ného weter kaut, ai toé pecing le méu du nia leson.

⁴Maik oné Sardis manga pisa taus ata siot hedis kin wéngko wekid; isé kopn te lako cama agu Akus déméng ceca bakokd.

⁵Céing ata ontong, ata hitu te paké le juba bakoky. Aku toé koso ngasang diha oné Buku Data Mosé. Aku kudut tura ngasangn oné ranga de EmaG agu oné ranga de sanggéd malékat Diha.

⁶Céing ata manga tilun, poro séngét apa ata taé le Nai Nggeluk oné sanggéd ata serani.”

⁷“Tulis koé latang te malékat de weki serani oné Filadélfia: Ho’oy pede oné-mai Hiat Nggeluk, Hiat Molor ata cau kunci de Raja Daud. émé céngka Liha toé manga ata ngancéng tadun; émé tadu Liha, toé kolé manga ata ngancéng céngkan.

⁸Pecing Laku sanggéd gori de méu: Lélo ga, Aku poli céngka para latang te méu, ata toé ngancéng tadun le céing kaut. Pecing Laku te méu toé danga mberes, maik méu lorong curup Daku agu toé pali ngasang Daku.

⁹Lélo dé, pisa taus oné-mai ro’éng de jing da’at, ngong isé situt ata caro weki rud ata Yahudi, kalim po toé. Isé situ ata nggopéts. Isé situ te téings Laku oné méu, kudut isé suju olo-mai wa’i de méu agu kudut baé lisé te Aku momang méuk.

¹⁰Méu poli lorong curup Daku kudut gepek te géréng Aku. Wiga ali hitu, Aku kolé te sémbéng méu oné cekeng susa hitut kudut hena temu tana lino. Cekeng susa hitu te damang sanggén ata oné lino.

¹¹Aku ruis te maik! Landing hitu, cau kid apa ata manga oné méu, kudut néka cengatan koé te emi koso-nolak oné-mai ontong de méu.

¹²Céing ata ontong, hia hitu te pandé siri laingy Laku oné Mbaru Nggeluk de Mori Keraéng. Hia hitu te ka’éng tédéng lén oné osang hitu. Ngasang de Mori Keraéng agu ngasang de béndarN, ngong Yérusalém weru ata wa’u éta-mai Surgan, tulis Laku oné weki data hitu. Nenggitu kolé ngasang ata werun Daku te tulis oné hiay.

¹³Céing ata manga tilun, poro séngét apa ata taé le Nai Nggeluk oné sanggéd ata serani.”

¹⁴“Tulis koé latang te malékat de weki serani oné Laodikia: Ho’oy pedé oné-mai hi Amin, Saka-si hitut junggu agu molor, pu’ud sanggéd dédék de Mori Keraéng.

¹⁵Pecing Laku sanggéd gori de méu. Méu toé ces agu toé kolang. Céwé di’an méu paka ces ko kolang!

¹⁶Jari, woko mut kaut méu agu toé ces ko kolangm, Aku te roa kolé méu oné-mai mu’uG.

¹⁷Ai taé de méu: Ami boragm agu toé manga géong’gm. Maik toé pecing le méu te méu do géongs, agu hindi-haés mosés, lénggé, buta agu lacom.

¹⁸Itu tara toings méu Laku, kudut méu weli oné Aku emas gicing, wiga méu ciri boram. Wéli kolé baju bakok oné Aku te pakés, kudut méu néka mbolangm te pandé ritak laing. Weli kolé rewos te luma oné matas, wiga méu ngancéng itam.

¹⁹Céing ata momangn Laku, hia rondong agu boboly Laku. Landing hitu, wingker agu teser koém ga!

²⁰Lélo dé, Aku hesé bolo-mai para agu nontong. Émé manga ata dengé nontong Daku hitu, céngka dé liha para, Aku ngo bonék kudut cumang agu hang cama-cama agu hia.

²¹Céing ata ontong, hia te lonto cama-cama agu Akuy lobo seriga Daku, ného Aku kolé poli ontong’g agu lonto cama-cama agu EmaG lobo seriga Diha.

²²Céing ata manga tilun, poro séngét apa ata taé le Nai Nggeluk oné sanggéd ata serani.”