Read Manggarai WIDANG SI’ANG ONÉ HI YOHANÉS 6 Bible Online

WIDANG SI’ANG ONÉ HI YOHANÉS 6 - Manggarai bible

WIDANG SI’ANG ONÉ HI YOHANÉS 6

¹Itug kali itan laku Anak Jimbal hitu nggé’i roku hitut laring cain oné-mai pitud roku situ. Dengé laku ca oné-mai patd kaka situ rewengn cama ného gentur de genggus, “Mai é!”

²Ita laku ga manga ca jarang jampi, atat létin cau ca pana agu widang oné hia ca songkok emas. Itu kali téti-toda ného ata laki mangir kudut haéng ontong.

³Du Anak Jimbal hitu nggé’i roku te suan, dengé laku taé de kaka hitut suan, “Mai é!”

⁴Itu kali ngo nggere-oloy ca jarang bana ata wulu raé ného dila api. Hia hitut létin tiba kuasa kudut pandé mora-meres hambor-libur oné lino, wiga manusia mbelé cama taud. Ali hitu, latangt hia widang ca keléwang mésé.

⁵Du Anak Jimbal hitu nggé’i roku hitut te telun, dengé laku taé de kaka hitut te telun, “Mai é!” Ita laku manga kéta ca jarang bolong agu hiat létin cau ca dacing oné limén.

⁶Dengé laku néhot manga reweng oné bahi-réha kaka pat situ, “Ca bakuk gandum ca dinar kéta pikan. Ca dinar kéta te weli telu bakuk pesi. Landing hitu, néka pandé mbora mina agu anggor hitu.”

⁷Du Anak Jimbal hitu nggé’i roku hitut te patn, dengé laku taé de kaka hitut patn, “Mai é!”

⁸Ita laku ga, manga kolé ca kéta jarang ta’a agu léros wulun. Hiat létin ngasangn hi Mata, tana adakn lut hia kin. Latangt isé, téing pati pat lino te kuasad, kudut mbelé ali keléwang, ali darem, ali dod beti mésé agu ali sanggéd kaka rani oné lino.

⁹Du Anak Jimbal hitu nggé’i roku hitut te liman, ita laku bewa-mai compang sanggéd wakar disét poli mbeléd, landing le keréba reweng de Mori Keraéng lut saka-si disé.

¹⁰Télés kéta reweng disé, “Yo Mori, Itét Cau Kuasa ata nggeluk agu molor, cepisa kéta kolé di, té Ité beté-bicar agu mbelé lawa oné lino, ai isé poli mbelé ami?”

¹¹Néténg isé tiba gici ca juba bakok. Og jerad isé kudut asi maél di cekoén, dengkir rapak dod asé-ka’é ata keturu laing agu asé-ka’é ca imbi disé te mbelé cama ného isé.

¹²Du Anak Jimbal hitu nggé’i roku hitut te enem, noing kéta laku tuan nupung mésé agu ita laku mata leso ciri nendep, cama ného tuil wié mésé agu wulang ciri ndéréng mana daray.

¹³Sanggéd ntala éta awang nawors nggere-cé’é lino, cama ného wua haju ara ata rémé ta’ad nawor taungs du kéngkung le buru warat.

¹⁴Nenggitu kolé awang mora cama ného surak hitut lulungy, agu hésot taungs sanggéd poco agu sanggéd nuca oné-mai osangd.

¹⁵Sanggéd taung raja oné lino, tuang mésé, serdadu pangkat mésé, ata bora, ata cau kuasa, sanggéd mendi ko toé mendi, tepeng taungs oné liang agu oné ngero watu nampar éta poco.

¹⁶Mai curup disé one sanggéd poco agu oné watu nampar situ, “Rencom ga te képé ami, ceha koé ami rantang ita Lihat lonto éta seriga agu oné-mai rabo de Anak Jimbal hitu.

¹⁷Ai caig leson rabo mésé disé. Céing kéta ata ngancéng ta’ongn rabo hitu?