Read Manikion MATIUS 10 Bible Online

MATIUS 10 - Manikion bible

MATIUS 10

¹Se lona hom, kaba, Yesus en eija men logodeh merug sisa hobjerai naugb len loucimdeb dara en. Hanoba en eic goubesa dou len naugb len locirma merna mog mog dau lusud. Dara en eic goubesa dou len naugb len leic geigouhw dou lusud gareber, dara lusud gedig len meraga omomtom laugwan toua.

²Doba men logodeh merug sisa hobjerai ingga, kaba, len meroho dag gini: Hom gedig en moho edreg dau len gus laugwan, kaba, en moho dag Simon, doba lusud leija en dag Petrus toua. Hom toua, en moho dag Andreas, eni Petrus maguna. Hom deit, kaba, eni Sebedeus meisi, moho Yakobus. Dara hom deit Yakobus magto, moho Yohanes.

³Dara Pilipus, dara Bartolomeus, dara Tomas, dara Matius gedig en acgeij lusud naugb len lohw cinogo dou leng Roma sug nosa. Hom deit, kaba, eni Alpius meisi, moho Yakobus. Dara hom deit en moho Tadeus.

⁴Dara Simon gedig lusud leija en dag Selot. Anai sug nosa, kaba, en ouwan ocirma lugmahara laugwan dau meren cinogo. Dara sud hom deit toua, en moho dag Yudas dau cinogo Keriod. En eng sud hom gohw Yesus dou leng Yahudi meren mougtir.

⁵Sug Yesus esa merug sisa hobjerai graga aud lusud, kaba, en en dougwo len nosahabi, endagai: Yen yemeitig se ucina gus aud lugmaharero. Dara yen yemeinesa leng Samaria meren cinogo augwan touwero. Doba yen yeinesa leng Israel meren hancob augwan dous naugb yen yesai Allah moro dou len. Anai len ledag domba gaijahasero namcirohob.

⁶

⁷Dangga sug yen yedebeij lenohob, kaba, yen yesai Allah moro dou len, yendagai: Lona naugb sug Allah oiharaga yen ucugb, kaba, ebeij deinyor namcirohob.

⁸Dara sug yen yesai Allah moro dou len, kaba, yen yeic geigouhw dou leng areber laugwan toua. Dara leng lomomohob, kaba, yen yeigdoumesa len leisa ucugb. Dara leng aremos gogoufu et lenohob, kaba, yen yeic geingmos agauwesa ucugb dou len. Dara len gedig merna mog mog eisa len merdoc mesohob, kaba, yen yocirma dau len toua. Dara yen yemacgeij ara ara dau len touwero. Doba yen yeicara dag mogud dou len dous. Anai yen yemeic ara ara yemauma goubesa naugb gini dau dan touwero. Doba dan deic dag mogud dou yen dous.

⁹Dara yen yemeisgoho meijen aregoufu dau emas, dara perag, dara tembaga se meijen hwigbei mos gedig yen yeiji se yen meijihw isisi touwero. Doba yen yeihweda dara yen meijug mogud dous.

¹⁰Dara yen yemoho meijen i naugb yen yemohwiaga lusud an ared se ucina mogumsi touwero. Doba yen yecus dau i deb dous. Anai sug yen yesai Allah moro dag mogud dou lusud, kaba, yen meijoho agas edeinyum naugb len leic ara ara dag mogud ucugb dou yen toua. Hang yen yemoho meijen sansun dara hwigbei mos ingma dara yen touwero. Doba yen yeihwedan areg geb se yen meijus dous. Dara yen yemodo ijouhugwa se ucina mogumsi naugb yen yemos dougwo sug lusud logod yen touwero. Doba yen yec dara yen meisira mogud dous.

¹¹Dangga sug yen yedebeij beimes, era cinogo homohob, kaba, yen yeijidougwo lusud an sud hom areg dau len sungga, kaba, en men geicara eigouhw bedeinyum naugb sug yen yatou desij en. Sug sud hom moongga, kaba, yen yeigtou desij en se men tu terimda edebeij lona sug yen yeihweda se cinogo gus dau eni toua.

¹²Dara sug yen yeinesa en men tuohob, kaba, yen yocuncum dou Allah an lusud se tu mes ingga len laugwan, yendagai: Allah eic gesgigouhwesa dou yeng yeigtou se tu mes gin augwan dougwo augwan namcir.

¹³Dangga sug len lebin yen deigeigouhw namcir, kaba, yen yemedug gesgigouhwesa ucugb dau lenero. Doba ebsugeb naugb len terimda. Doba sug len lemebin yenero, kaba, gesgigouhwesa gedig yen yacgeij Allah an dou len gragohob, kaba, yen yacgeij Allah edug ucugb dau len aud yenin deit.

¹⁴Dara sug tu hom, era sug cinogo hom lemebin yenero, kaba, yen yeihwededau len namcir. Hanoba yen yetir yen meijohora an meren cinogo mor bobsara ucugb dou lenin deb, ansins dag yen yotogoto len deb namcirohob.

¹⁵Dangga se Lona Sug Allah Ogod Aremer Aga Lusud, kaba, en emeic gogom debin lusud se cinogo ingga edreg dau gogom gedig en esa debin lusud se cinogo Sodom dara Gomora sug nosohob. Yen youman dan indir an areg dan den dou yen gini deigeigouhw, anai augwan gini asesa dag misen namcir.

¹⁶Sug Yesus esulou men lusud dag graga dauwohob kaba, en esulou len ucan gin deit dag sug len lesai en moro dou lusud kaba, eic dag lusud leinyana leic mog erij medam dou len icira gin toua. Hanoba en enara dou len, endagai: Dan desa yen dag domba se mihiloro merufu naugb yen yesai Allah en moro dou len. Dangga hang, se meijen gauwamara kaba, yen meiju auti aremeijouhw augwan aninim dag hinogo toua. Doba se meijen geicara kaba, yen meigdoc edag beim an lusud dous. Aninim dag bohobei kaba, en medoc mog mog an lusud touwero. Doba en medoc arjaga an lusud toua terimda. Yen youman dan indir an areg dan den dou yen gini deigeigouhw toua. Anai augwan gini kaba, dag misen namcirohob.

¹⁷Dangga yen yebehnehino yenin meigdoc mes dougwo leng merug mog namcir. Anai len, kaba, len lemohw yen dou meren Majelis. Hanoba len lemarougb meren lusud naugb len lemobosbos yen se meren tuari toua.

¹⁸Dara len lemohugouhw yen meisira aud leng meroho agas dara meren mougt mera medamir toua. Anai yen yaimo danohob, doba yen yemahaulo. Anai sug len lohugouhw yen aud meren mougtir, kaba, gini eic cumougt dou yen naugb yen yos yadi Mer Geigouhw eisaugb dan deseino len dara lugmahara laugwan toua.

¹⁹Doba sug len larges yen deb se mougtir graga meisirohob naugb sug len leic gomom dou yen, kaba, yen meigdoc emeijesan areg yen yen dou lenlo. Dara yen yemoudesa dag yen yenara dagiro dou len gin touwero. Anai se lona sug yen yos yad dan indoho deseino len ingga, kaba, Allah en emens areg yen yen dou len toues.

²⁰Hang areg yenara dou len, kaba, yen yemenara dau yenin meigdoc mes dou len touwero. Doba se lona ingga, kaba, Mena Gogoufu dau yen Meijina se bogo, enin eng emarautut gin augwan se yen meigdoc mes naugb yen yemenara moho asesa dou len toues.

²¹Doba leng lohugouhw yen meisira aud mougtir gini, kaba, leni lugmaharero. Doba leni dau yen meijaguner, dara meigdamouwer dau yen meijouhuda hom. Dangga se lona ingga, kaba, maguna en ohw magto dou mougtir. Dara magto en ohw maguna dou len toua. Dara mena en ohw en mehir dou len. Dara merihir len lohoiya merna dara merim merir. Hanoba len lemohw len dou mougtir naugb len logod aremer gomom dou len toues.

²²Dara lusud hom ingma en medoc emeigouhw an yen toua deitero. Doba len laugwan merdoc mog mog an yen namcir naugb len leic mog erij dou yen toua, anai yen yaimo danohob. Doba gareg dau yen en aiyan medocesem naugb en es agadgeij terimda bouwedoc dougwo ginohob, kaba, Allah emeic maireseb huhugb dou en toues.

²³Dangga sug len leic mog erij dou yen se cinogo hom, kaba, yen yougbda dau cinogo ingga naugb yen yesai Allah moro se cinogo gus deit. Doba yen youman dan indir deigeigouhw namcir. Anai sug yen yemesai Allah moro se leng Israel meren hancob augwanbuma, kaba, Lusud Meraguna Mebin dan decicugwen aud yenohob. Augwan gini asesa dag misen namcir.

²⁴Sug Yesus esulou men logodeh dag graga ouwohob, kaba, en eic gainyenara hwai debin dou len deit dau sug lusud leic mog erij dou en nosohob, kaba, emedreg dau len touwero. Hanoba en enara dou len, endagai: Guru men logodeh len meroho emagas dau enero. Dara sogougb en moho emagas dau men mougt touwero.

²⁵Doba eigouhw naugb guru men logodeh len meroho aninim dag eni. Dara edeinyum naugb sogougb en moho aninim dag men mougt toua. Dangga hang, sug len lowun mougt naugb leng se tu mes en moho dag Belsebul, era bougena meren mougt mera medam dag ginohob, kaba, len lemowun leng se men tu len meroho gineroei? Naro, len leic len meroho ecgu edreg dau mougt namcir dou len toua.

²⁶Doba yen yemahau dau leng mougtir, gedig len leic gogom dou yen gragero. Anai len loudesa endag sug len lod se simei dau lusud, kaba, len lemecinagero. Doba len lauwam an didi dau lenin dous. Anai se lona hom, kaba, Allah ens dau areg len lod se simei ingga ainyes dou len ucugb deits. Dara len loudesa meren geicara gecgu gedig len leic dou yen ingga, kaba, len lecgoneh dau lusud namcir. Doba len lauwam an gin toua didi. Anai se lona hom, kaba, Allah ens augwan gini eb ainyes dou lusud laugwan toua lecinaga namcir.

²⁷Dangga hang yen yemahau dau lusud misen se cinogo ginlo. Doba yen yeic meijus naugb yen yen dau areg dan den dou yen gini beb ainyes dou lusud laugwan terimda. Dara yen yeic meijus naugb yen yesa meijir an areg dan dec luluf an se yen meijums gin dou lusud laugwan louman toua. Anai len se cinogo gini, kaba, len lemeic gomom dou yen meijinero. Doba len leic gomom dou yen meijaga dous. Doba Allah, kaba, en emeic gomom dou yen meijaga dousero. Doba men goubesa inggebga naugb en eic mor mor dou yen an yen meijaga menau se dum smougb toua. Dangga hang, yen yahau dau en hom dous.

²⁸

²⁹Yen yecinaga dau sug lusud leic ba moho rumem laumara, kaba, len lauma aregoufu mera ouwada namcir dag mogo hom dous. Doba hom dau len, kaba, en emobsara se cinogo sug Allah emouwan ginero.

³⁰Doba eisaugb yen, kaba, en ecinaga yen meijugt modi astesda augwan gin touohob.

³¹Dangga hang, yen yemahau dau lusudero. Anai sug Allah esedougwo ba mogurereito mera ouwada gini dara geigouhw namcir, kaba, en esedougwo yen edreg dau len deit. Anai yen meijina mera eisaugb edreg dau ba rumem laugwan gin namcir.

³²Gareg dau yen en eic mos naugb en os bad dan indoho deseino lusud namcir, kaba, dan toua dos dadi en moho deseino dan Indina se bogo toua.

³³Doba gareg dau yen en ahau naugb en aideido dan indoho deseino lusud, kaba, dan toua daideido en moho deseino dan Indina se bogo toua.

³⁴Dara yen yemoudesa dag dan douwaden dau bogo se cinogo gini naugb dan dousa lusud, dauntoba len leic gesgigouhwesem touwero. Anai dan demeicara daimo dangga an len dag ginero. Doba dan douwaden dau bogo naugb dan deic krawan, dauntoba len lesara anim dous.

³⁵Dangga hang, sud hom gesedougwo men tu, kaba, men moc emen dau len gus dousero. Doba men moc medam inggeb se men tu mes toua. Anai sug dan den naugb dan dekeba len daum dag ginohob, kaba, dan deic meisi medoc susugb dau mena. Dara mehida susugb dau mem. Dara mebeba en medoc susugb dau memba toua.

³⁶

³⁷Hang gareg dau yen en medoc gororougb mena dara mem edreg dau dan namcir, kaba, emedeinyum naugb dan demeigdoumesa en moho dag dan indisi misenero. Dara gareg dau yen en medoc gororougb en meisir dara en mehider edreg dau dan namcir, kaba, emedeinyum naugb dan demeigdoumesa en moho dag dan indisi misen touwero.

³⁸Dara gareg dau yen en emesogwesa dan indohotimei mohw se ucina mog erij aud gomomero. Doba en ahau dau namcir, kaba, emedeinyum naugb dan deigdoumesa en moho dag dan indisi misen touwero. Doba en edag sud hom dau lugmahara naugb dan dous.

³⁹Dangga gareg dau yen en ehilon ucina naugb en ebehnehino enin mena dougwo areg gogom. Dauntoba en maireseb terimda, kaba, cum, en mena ediyebeiya namcir. Doba gareg en eic mog erij naugb en omom icira dan indoho, kaba, en mena emediyebeiya namcirero. Doba dan demeic maireseb menau geb huhugb dou en deits.

⁴⁰Dara gareg en ebin yen, kaba, gini aninim dag en ebin dan touohob. Dara gareg en ebin dan, kaba, gini aninim dag en ebin Allah toua. Anai en eng esa dan aud yen gini.

⁴¹Dara gareg en ebin sud hom, anai en esai Allah moro dou lusud, kaba, en momsi emocgocroro. Doba Allah eic siouwa dou en, aninim dag en eic dou sud hom gesai Allah moro ingga toua. Dara gareg en ebin sud hom gesai Allah moro dara men geicara edag beim an en namcir, kaba, Allah eic siouwa dou en, aninim dag en eic dou sud hom gesai en moro ingga toua.

⁴²Dara gareg dau yen en eic duhu misen dou sud hom dau leng meroho eb tainya namcir, anai en edag indan logodehohob, kaba, men geica gini emocgocroro. Doba se lona daiyamo gacin, kaba, Allah emeic siouwa dou ens. Yen youman dan indir an areg dan den dou yen gini deigeigouhw, anai augwan gini asesa dag misen namcir.