Read Manikion MATIUS 12 Bible Online

MATIUS 12 - Manikion bible

MATIUS 12

¹Sug Yesus enara dou men logodeh dag graga ouwa dou lenohob, kaba, en ec an len se ucina sug tramdad esa se ucina mebera dig nagama nagama. Doba Yesus men logodeh sireber len medam namcir. Dangga hang, len lemoi tramdad mera naugb len let. Doba lona sug len loi tramdad se gini, kaba, leng Yahudi meren Lona Gemeicaresero.

²Dangga merug aibibra dau leng Parisi sug len leiya dau gini, kaba, len merir laised Yesus icira gin namcir, lendagai: Ban beiya aban logodeh. Anai meren geicara se Lona Gemeicarero gin, kaba, edreg dau maman gomnomnohob.

³Doba Yesus aisan medagas dau Daud an men logodeh bauni dou len ucugb, endagai: Sug Daud en sireba sug nosa, kaba, en einesa Allah Men Tuari Dau Hugbei. Hanoba en et roti gedig gembala gesa taij len louwaharo dou Allah. Dara men lusud gedig len laicara en, kaba, len let toua. Hang len ledreg Musa men gomnomna gin namcirohob. Anai roti gin, kaba, naugb sug Daud an men logodeh len lemetero. Doba naugb gembala gesa taij lenin eng let dous. Yen yemecic dau meren geicara gini dag misenbumei? Naro, yen yecic dau augwan gini dag misenohob.

⁴

⁵Dangga toua, astesda sug gembala gesa taij len leicara se Allah Men Tuari se Lona Gemeicaresero, kaba, len ledreg maman gomnomna gin touohob. Doba maman gomnomna emowun len meroho dag len lebesesar touwero. Doba amsoho len an gin namcir. Yen yemecic dau gin touebmei? Naro, yen yecic dau augwan gini dag misen touohob.

⁶Anai sug yen yecinaga dau areg Allah en dougwo yen meijemouwer sug nosa meijouhw augwan asesa touohob, kaba, yen yemen dougwo indan logodeh an meren geicara gin touwero. Doba yen yamsoho len an gini toua terimda. Anai Allah en dougwo len, endagai: Dan demouwan naugb yen yeic aremeta yauwaharo dou dan deitero. Doba dan douwan naugb yen meigdoc erij an lusud dous. Doba yen yemecinaga meijouhw dau gin dag misenbuma. Hang yen meigdoc emerij an indan logodeh gin touwero. Doba yen yowun len meroho an gin toua. Doba inggaida. Anai dan, kaba, dan dedag lusud laugwan Meraguna Mebin danohob. Hang dan dedag mougt mera medam naugb sug dan dogod ara ara deinaugb Lona Gemeicaresero gin toua namcir. Anai dan indoho edreg medam dau Allah Men Tuari en moho an Musa men gomnomna ginohob.

⁷

⁸

⁹Sug Yesus owun leng Parisi dag graga ouwohob, kaba, en ec dau sungga bedeinesa leng Yahudi meren tuari hom.

¹⁰Doba se tuari mes ingga, kaba, sud hom gedig en mesira nagama omom en toua moongga desij len. Dangga leng Yahudi len leijidougwo Yesus dag len lerba mohoisa en, lendagai: Eigouhw naugb sud hom en eic geigouhw dou lusud se Lona Gemeicaresero ginei? Era naroei? Len lerba mohoisa en dangga, dauntoba sug Yesus ousa len merir an gini, kaba, len lowun en moho icira gin namcir.

¹¹Sug Yesus ecinaga len merdoc mes an dangga, kaba, en eic bainyen dau meren domba dou len, endagai: Sug meijen domba obsaresa cinogo mes se Lona Gemeicaresero gin, kaba, yen yamsoho namcirdei? Naro, cum, yen yeigdoumesa meijen domba ingga dau cinogo mes se lona gin toua.

¹²Doba lusud eng mera eisaugb edreg dau domba namcir. Dangga hang, sug dan demeic geigouhw dou lusud se lona gin, kaba, emedreg dau gomnomna gin touwero. Doba esogwa deisa gomnomna gin touohob.

¹³Sug Yesus eic gainyenara dou len dag graga ouwohob, kaba, en enara dou sud hom mesira omom graga, endagai: Ban bou absira. Dangga sug en ou mesira aud Yesusohob, kaba, en mesira eigouhw namcir, aninim dag en mesira nagama toua.

¹⁴Doba sug leng Parisi len leiya dau gin, kaba, len lagunya dau tuari. Hanoba len ledoucimdeb dou lenin naugb len lehilon ucina sug len leic gomom dou Yesus.

¹⁵Doba sug Yesus ouman dau areg len lesedeb se merdoc mes naugb enohob, kaba, en asid enin dau len naugb en eihwedig cinogo gus deit. Doba lusud leinyana gougwa, kaba, len toua loucan en dig cinogo ingga. Dangga gareg dau leng loucan en gini areber, kaba, en eic geigouhw dou len laugwan toua.

¹⁶Doba sug en eic geigouhw dou lenohob, kaba, en en dougwo len namcir endagai: Yen yemecic dan indoho an gini bemagaha dou lusud laugwan lemecinaga touwero. En esulou len dougwo dangga, dauntoba esogwesa areg Allah ens dou sud hom gesai en moro nosa, en moho Yesaya, eisaugb en deb sug nosohob, endagai:

¹⁷

¹⁸Yen yauweila sud hom gini deigeigouhw namcir, anai danin eng deigdoumesa en moho dag indan sogougb, dauntoba en eicara naugb dani. Dan indoc gororougb eni. Dara dan dagahugouhw an en toua namcir. Dara dan demesa Mena Gogoufu dou en toua naugb en emesai dan induro dou leng Yahudi dara dou lugmahara laugwan toua. Dauntoba len lecinaga areg dan dogod deinaugb lenohob augwan asesa.

¹⁹Dara en emenara ucucugb an len sug en esai dan induro dou lenero. Dara en emesa mer debin len. Dara sug en ec, kaba, en mer emahaba asa ucina touwero.

²⁰Dara en emeised len dag hu hom se moufero. Dara en emob leng ledag hiraga mouf se len merufu touwero. Doba en esedougwo len terimda lusud laugwan laimo areg Allah ogod deinaugb lenohob augwan asesa touohob.

²¹Dangga hang, lugmahara len toua lemotogoto en touwero. Doba len laugwan lod merna debsa en namcir.

²²Sug Yesus eic geigouhw dou leng gragohob, kaba, lusud lahwan sud hom merna mog mog ogod en mairesmougb dara eic dag en osum dou Yesus naugb en eic geigouhw dou en. Dangga sug Yesus eic geigouhw dou enohob, kaba, en enara, dara en eiya lo asesa ucugb deit.

²³Sug lusud leinyana len leiya dau gini, kaba, len leimiman dau Yesus namcir. Hanoba len leija meruwesa en ucucugb, lendagai: Sud hom gini Daud medebeito gen en aud maman naugb eigdoc maman dau maman gogom augwan ingginei? Era dagiro?

²⁴Doba sug leng Parisi len louman lusud leija meruwesa Yesus dag gini, kaba, len letaha len merir an, lendagai: Sud hom gin, kaba, merna mog mog meren mougt mera medam, moho Belsebul, eic goubesa dou en naugb ginohob. Hang en emocirma len dau lusud toua.

²⁵Doba Yesus en ecinaga dau areg len lauwam an inggohob. Dangga hang, en emenara baised len merir ucugb, endagai: Sug lusud lebemocedoum astesda se mougt mera gouji meren hancob, kaba, cum, meren hancob augwan dag losnesebesero namcir. Dara astesda cinogo sug meren lusud lebemocedoum, kaba, cum, len lougb laisoboro dau cinogo ingga toua. Dara astesda lusud se tu hom sug len lenara doum, kaba, cum, len lagag meren tu daum toua.

²⁶Dangga sug Setan en ocirma enin men logodeh dau lusud merdoc mes, kaba, gini aninim dag en ebemoc dou enin men logodeh gin touohob. Hang enin men goubesa emedeinyum naugb eninei? Naro, enin men goubesa emedeinyum naugb eninero. Anai men logodeh laugwan lougbdedau enohob.

²⁷Yen yowun dan indoho dag dan docirma Setan men logodeh dau lusud merdoc mes ogdoc men goubesa gin dous. Doba sug dan docirma merna mog mog dau lusud ogdoc Belsebul men goubesa dag gin, kaba, dagiro eisaugb yenin meijen lusud gina? Len toua locirma merna mog mog dau lusud ogdoc Belsebul men goubesa ginei? Hang len lenin lemowun yen meijoho dag areg yen yenara eisaugb danohob. Doba augwan gini dag yen yauwam an didi namcirohob. Anai len lecinaga dag len lemocirma merna mog mog dau lusud emogdoc Belsebul men goubesa ginero. Doba ogdoc Allah enin men goubesa gin dous. Dangga hang, sug len locirma merna mog mog dau lusud ogdoc Allah men goubesa gin, kaba, gini ansins dag dan docirma merna mog mog gini dau lusud ogdoc men goubesa gin touohob.

²⁸Doba sug dan democirma merna mog mog emogdoc Belsebul men goubesa ginero. Doba ogdoc Mena Gogoufu men goubesa gin dous, kaba, gini ansins dag men lona naugb sug en oiharaga lusud ucugb edebeij yen touohob. Anai Mena Gogoufu gini en en dau Allah ginohob.

²⁹Dara gini ansins dou yen dag dan dohud Bilis mesira dau yen touohob. Anai yen yemeinesa sud hom mobisamougb men tu naugb yedeida men aremougb augwougb touwero. Doba yen yohud en mesira nosahabi, yen yemeinesa men dimei mes naugb yen yemedeida men aremougb dau tu mes ingga toua.

³⁰Dangga gareg dau yen en medoc aninim dara dan naugb aman amemesma aremougb geb se tu mes inggaro, kaba, en edag indan mocohob. Dara gareg dau yen en emousa dan naugb aman amamouci areg geb se dimei mes debinimero, kaba, gini aninim dag en amsoho aremougb naugb en aisoboro dous.

³¹Dangga yen youman dan indir deigeigouhw. Gareg dau yen en ebesesar einyana dara en eic Allah moho bacecim, kaba, augwan gini emedreg dau sug Allah aigdougwo men sesar ginero. Doba gareg dau yen en esmesman Mena Gogoufu dag men geicara aninim dag Belsebul men geicara gin, kaba, men sesar hom gini edreg dau sug Allah aigdougwohob.

³²Era gareg dau yen en esmesman Lusud Meraguna Mebin dan, kaba, emedreg dau sug Allah aigdougwo men sesar ingga dau en touwero. Doba gareg en esmesman Mena Gogoufu dag men geicara aninim dag Belsebul men geicara, kaba, men sesar gini edreg dau sug Allah aigdougwohob. Dara beb huhugb naugb en namcir toua.

³³Sug Yesus auni dou leng Parisi eisaugb dau areg len lowun en an dag graga dauwohob, kaba, en owun len dag merug mog ucan dou len deit. Hanoba en enara dou len, endagai: Sug sogo era mera geigouhw, kaba, esloulougb dag sogo maga toua eigouhw. Anai sug sogo maga ecgu, kaba, mera toua ecgu. Dangga lusud lecinaga sogo maga geigouhw era gecgu, kaba, len leiya dau men mera dous.

³⁴Dangga toua, areg geb se sud hom medoc mes, kaba, gin dous eng agunya dau en mers deseino lusud. Hang areg agunya dau yeng Parisi meijirs, kaba, emeigouhw touwero, doba ecgu namcir. Anai yen meigdoc mog mog aninim dag hinogo teiteiyohob.

³⁵Dangga sug sud hom en medoc atij an areg gedag beim, kaba, men geicara augwan edag beim toua. Doba sug sud hom medoc atij an mog mog, kaba, men geicara augwan toua dag mog mog namcir.

³⁶Hang yen yauwam an areg yen yen nosahabi. Dauntoba yen yemenara areg gecgu agunya dau yen meijirs dou lusud dedemedero. Anai se Lona Sug Allah Ogod Aremer Aga Lusud, kaba, sud hom yom enin emecic dau areg en en moho hom yom aududi dou Allah ucugb deits. Dara en aimo areg agunya dau sud hom en mers gini naugb en ogod aremer aga en toua.

³⁷Dangga gareg en ens dau areg dag geigouhwohob, kaba, Allah ogod aremer geigouhw naugb eni. Doba gareg en ecic dau gecgu, kaba, Allah ogod aremer gogom ogdoc gin dou yen toua.

³⁸Sug Yesus owun leng Parisi an meren geicara dag gragohob, kaba, merug aibibra dau leng meru ouforoho se Musa men gomnomna, dara merug aibibra dau leng Parisi, kaba, len lacgeij Yesus deit, lendagai: Adehsud, emen emouwan ban bens ganusbus ingma dou emenahabi.

³⁹Doba Yesus en etaha len merir an gini, endagai: Yen youwan dan dens ganusbus dou yen, doba augwougb dous. Anai meijen geicara dag mog mog terimda. Dara yen meigdoc esges Allah deb terimda, aninim dag gida en medoc esges mesuwa toua deb dous. Dangga hang, dan demens ganusbus dou yen touwero. Doba dan dens dau Allah men geicara dag ganusbus dou Yunus sug nosa dou yen. Anai en, kaba, en edag sud hom gedig en esai Allah en moro sug nosohob.

⁴⁰Anai sug Yunus en eigtou se hosei menuhwa mes se lona homoi dara loba homoiyohob, kaba, Allah eigdoumesa en ucugb. Dangga Lusud Meraguna Mebin dan toua demeigtou se cinogo mei se lona homoi dara loba homoiyohob, kaba, Allah emeigdoumesa dan demeisa ucugb aninim dag en toues.

⁴¹Sug Yesus etaha len merir dag gragohob, kaba, en owun len meroho ucan deit, anai en ebedbed dou lenohob. Doba len lemahau an dougwo meren sesarero. Hanoba en enara dou len, endagai: Yen youman deigeigouhw. Se Lona Sug Allah Ogod Aremer Aga Lusud Laugwan, kaba, leng dau cinogo Niniwe len lesa desij yen naugb len lehin meriresa yen namcir. Anai sug Yunus en esai Allah moro dou len sug nosa, kaba, len lemeic merusero. Doba len lesga meren sesar dara len lahau an dougwo namcir. Doba areg dan desai dou yen gin, kaba, mera eisaugb namcir dau areg Yunus en esai dou leng se Niniwe sug nosohob. Doba yen yemesga meijen sesar dara yen yamahau an dougwo touwero. Doba yen yaiyan meigdocesem terimda. Hang len lemehin meriresa yen se lona ingga toues. Yen youman dan indir an areg dan den dou yen gin deigeigouhw. Anai augwan gini asesa dag misen namcir.

⁴²Dauwohob, kaba, Yesus owun len meroho mougwa hom ucan deit. Anai en mou ouforoho naugb en edidib aremeijouhw asesa dou len. Doba len merdoc esbes en namcir. Hanoba en enara dou len, endagai: Yen youman deigeigouhw. Se Lona Sug Allah Ogod Aremer Aga Lusud laugwan, kaba, gida mougt mera gouji hom dau cinogo Sebe en esa desij yen naugb en ehin meresa yen toua. Anai sug en ouman dau Solaiman en mou ouforoho naugb en edidib aremeijouhw augwan asesa dou lusud, kaba, en medoc emesbesero. Doba en en dau aigusi naugb en ouman en mer. Doba areg dan desai dou yen gin, kaba, mera eisaugb namcir dau areg Solaiman en edidib dou lusud sug nosohob. Doba yen yemen aud dan naugb yen youman dau areg dan desai dou yen ginero. Hang en emehin meresa yen se Lona ingga toues.

⁴³Sug Yesus owun len meroho dag gragohob, kaba, en esulou len dag len lemebin en mer se len merdoc mesero, kaba, cum, meren geicara ecgu edreg dau nosa deit. Hang en emens meijouhw dau mena mog mog dag gin dou len, endagai: Sug mena mog mog hom en agunya dau sud hom medoc mesohob, kaba, en ohw acec miseda mougb, dauntoba en ehilon usi naugb sug en atousa.

⁴⁴Doba sug en emesma ingmaro, kaba, en enara dou enin se en medoc mes, endagai: Dan decicugb se indan tu mohon, gedig dan den dau graga ucugb deit. Dangga sug en ecicugwohob, kaba, en eiya tu mohon. Doba sud hom men tu ingga, kaba, ecabeci deb namcir. Dara len led aremougb augwan debinim toua dauwohob. Doba en emeiya lusud ingma emeigtousebma.

⁴⁵Hang en emedehilon mesir merug senggai gedig len merug mog edreg dau en namcir naugb len laugwan leinesa leigtou se sud hom men tu gin deit. Dangga hang, sud hom gini men geicara ecgu edreg medam dau nosa deit. Gini aninim dag yen iteitogin toua. Anai yen meigdoc ematij an dan indirero, doba mes mogud namcir. Hang cum, kaba, meijen geicara gecgu edreg medam dau nosa deit toua.

⁴⁶Sug Yesus enara dou lusud leinyana dag gragaba, kaba, en mem, dara magtor, dara medemeitor len len, kaba, lesa dig medigo. Hanoba len larougb lusud leden dou Yesus dag len louwan lenara dou en.

⁴⁷Dangga sud hom dau len leinyana ingga, kaba, en enara, endagai: Ban bideiya ban abim, dara ban abagtor, dara ban abdemeitor len merugwengga dig medigo. Anai len louwan lenara dou ban.

⁴⁸Doba Yesus auni ucugb dou en, endagai: Dan dens dau dan indim, dara dan indagtor, dara dan indameitor misen dou banahabi.

⁴⁹Sug Yesus auni ucugb dou en danggohob, kaba, en ens men logodeh dou en, endagai: Len gin eng dag dan indim, dara dan indagtor, dara indan indameitor misen.

⁵⁰Anai gareg en eicara baimo areg asesa dan indina se bogo enin medoc mes, kaba, en eng dag dan indagto, dara dan indameito, dara dan indim misen en namcir.