Read Manikion MATIUS 14 Bible Online

MATIUS 14 - Manikion bible

MATIUS 14

¹Sug Yesus esai Allah moro dou lusud, dara eic ganusbus dou len, kaba, leng Galilea meren mougt mera medam, moho Herodes, en ouman dau sug men lusud lagaha merir an men geicara gin augwan dou en toua.

²Dangga hang, en emen dou men meijouhugwer gedig len ledeijan en, endagai: Indeic, sud hom gini, kaba, en Yohanes gogun lusud se duhu sug nosa gedig dan deic gomom dou enohob. Doba iteitogini, kaba, Allah eigdoumesa en dau gomom ucugwohob. Hang en emeic goubesa dou en naugb en emaben ganusbus ucugb deit gini.

³Herodes enara dag gini dou men logodeh, anai sug nosa, kaba, en eihwa en maguna Pilipus mesouwa, moho Herodias, dau enohob. Dangga Yohanes Gogun Lusud Se Duhu edebeij en naugb owun en moho ucucugb icira men geicara gini, endagai: Emeigouhw naugb ban beic Herodias ginero. Anai ban bedis dau Allah men gomnomna namcirohob. Sug Herodes ouman gini, kaba, en emarougb men sadodor naugb len ledagaigeij Yohanes. Dara len lohud en mesira toua. Hanoba len lemouf en se tu gesisug. Dara en ehilon ucina naugb eic gomom dou en toua, doba en ahau dau lusud leinyana. Anai len gin, kaba, len leigdoumesa Yohanes en moho dag en esai Allah moro misen dou lenohob.

⁶Doba se lona hom, kaba, Herodes ougwan ared debin enin men lona sug mem ouwadan ensa. Dangga sug len letara, kaba, Herodias mehida en eihwa deseino len laugwan.

⁷Sug en eihwa dag gin, kaba, Herodes medoc agahugouhw an en namcir. Hanoba en os dou en, endagai: Sug ban bacgeij ara ara dau dan, kaba, dan demeic areg ban bacgeij dau dan ingga asesa dou bans. Sug en os danggohob, kaba, en ouwara debin gin dou en toua.

⁸Dangga Herodias mehida enara ucugb dou Herodes, endagai: Ban ben dou aban sadodor, len lougb Yohanes Gogun Lusud Se Duhu en mougt naugb len lob desa igdebirahabi, len lemodo an dou dan sug dan deigtou gin toua. En en dag gin dou en, anai en aimo dau areg en mem en dou en danggohob.

⁹Sug Herodes ouman dau gin, kaba, en medoc eijesan areg en os dou en. Doba en ouwara debin gin dou enohob. Dara men lusud gedig len letara desij en, kaba, len louman en mer an gin touohob. Dangga hang, en emarougb men sadodor hom naugb en aimo debin areg gidob ingga acgeij dau enohob.

¹⁰Hanoba en arougb en dig tu gesisug naugb en edougb Yohanes en mougt dau toua.

¹¹Dangga sug en edougwohob, kaba, en odo igdebir an naugb edeic dou gidob ingga. Sug en eic igdebir dou gidob ginohob, kaba, en odo igdebir an dou mem deit toua.

¹²Danggohob, kaba, Yohanes men logodeh, len len naugb len ledeic en maga naugb ledec en. Sug len lec dauwohob, kaba, len leihweda naugb ledecic dou Yesus en toua.

¹³Sug Yesus en ouman eisaugb Yohanes dag len logug enohob, kaba, en eihwededau cinogo Nasared naugb en eisa ij dig Tiberias nagama naugb en edeigtou se losneseba dou enin sungga. Doba sug lusud len louman dag Yesus eisa ij beihwedig nagamohob, kaba, len leinyana dau cinogo gus augwan len loci Tiberias mebera ucan en sungga toua.

¹⁴Dangga sug Yesus edebeij dig nagamohob, kaba, en eiya, doba lusud leinyana medam len loci ledeigtou inohob. Hang en medoc eineg medam an len namcir, kaba, en eic geigouhw dou leng gedig areber len laugwan toua.

¹⁵Doba sug deinyor lobohob, kaba, Yesus men logodeh len len aud eni naugb len lenara dou eni, lendagai: Usi gini dag losneseba namcir. Dara ebeij losog touohob. Dangga hang, ban barougb len naugb len leihweda se cinogo geb acec gininda. Dauntoba lenin louma ared naugb len letahabi.

¹⁶Doba Yesus en dougwo len, endagai: Dangga, isnaro. Doba yen eng yemeic ared dou len lemet.

¹⁷Doba men logodeh, len lenara launi Yesus mer ucugb, lendagai: Emen roti mogo sergem, dara hosei maga hwaito inggin dous. Dangga emedeinyum naugb len leinyana gin dagiro?

¹⁸Dangga Yesus arougb len, endagai: Yen yodo dou dan suginahabi.

¹⁹Sug len leic roti dara hosei dou enohob, kaba, Yesus enara dou lusud laugwan naugb len lecguna leigtou se aremon. Sug len laugwan leigtouohob, kaba, en os roti mogo sergem dara hosei maga hwai graga icira en mesira, hanoba en eised mergo augb bogo dauntoba en en sijo dou Allah naugb gin toua. Sug en ocuncum dou Allah dauwohob, kaba, en ekris roti. Hanoba en eic dou men logodeh naugb len lohw an len ingga laugwan toua.

²⁰Dangga sug len laugwan let beicerohob, kaba, Yesus men logodeh len louci mougwu debinim se aigdaga mes sisa hobjerai batij an namcir.

²¹Doba sug len lecic dau leng let ared gini, kaba, len lecic ligiji mogud eng merug ribu sergem gini. Doba len lemecic ligida dara logodeh toua darero.

²²Sug len louci ared mougwu augwan debinimohob, kaba, Yesus arougb men logodeh, endagai: Yen yeisa ij ino dau dan indin dig nagamada. Sug en arougb men logodeh leisa ij dauwohob, kaba, en arougb len leinyana ingga toua leihwededau en dig meren cinogoda.

²³Sug Yesus arougb lusud leinyana graga leihwededau enohob, kaba, en eisaugb se mengarougb hom naugb en edocuncum dou en Mena sungga. Dangga sug lobohob, kaba, Yesus enin dous eng loba osun deb se mengarougb ingga deb.

²⁴Doba ij an men logodeh, kaba, edebsa duhu mediaba. Anai loungmen eisa ucugb dau dig merdoc en. Hang duhu mogo oto ij an len ucucugb deb namcir.

²⁵Dangga deinyor sug bogo obrurugb, kaba, Yesus ec mohora se duhu mod ucan men logodeh dig meridigo.

²⁶Sug len leiya en ec se duhu mod ucan len, kaba, len lahau medam. Hanoba len leiyogoseser, lendagai: Aremoung mena ingga oucucan maman gaden.

²⁷Doba Yesus oho mer debin len, endagai: Yen yemahaulo. Anai aremoung menero, doba dang Yesus eng doucan yen gini. Dangga yen yemomi touwero.

²⁸Sug Yesus oho mer debin len danggohob, kaba, Petrus eija ucugb dou en, endagai: Adehsud, ban ingga dag misen, kaba, ban barougb dan naugb dan dec se duhu mod aud ban sungga toua.

²⁹Dangga Yesus eija en, endagai: Ban bin. Sug Yesus eija en dag ginohob, kaba, Petrus esogwa dau ij, bec se duhu mod aud en toua.

³⁰Doba sug Petrus eiya lougb obsaresa duhu boc mogo medam, kaba, en ahau dau gin namcir. Hanoba en ebiji naugb en oc se duhu. Hang en eiyagarij Yesus, endagai: Adehsud, ban beigdoc danahabi, anai dan doc se duhu dangga.

³¹Sug Yesus ouman Petrus eiyagarij en dag ginohob, kaba, en ou mesira dedemeda naugb eigdoc en dau duhu. Hanoba en enara debin en, endagai: Dagiro naugb ban beija abuwesa dan dag gina? Aban geicara aninim dag sud hom gemod mena debsa dan namcirero.

³²Dangga sug lan laisaugb se ingmesohob, kaba, loungmen mohora edina dau len, dara duhu toua ogor namcir.

³³Sug men logodeh gedig len leigtou se ing mes ingga len leiya dau gini, kaba, len lesijaresa en namcir. Hanoba len lenara, lendagai: Bani gini Allah Meisi misen namcir.

³⁴Sug len ledos dig nagamohob, kaba, len lesogwa deisa dougb, moho Genasared.

³⁵Dangga sug lusud sungga len leiya, doba Yesus en an men logodeh ledebeij lenohob, kaba, len lesa merir dou lusud geb acec dougb ingga len laugwan. Dauntoba len loho leng areber len laugwan aud en toua.

³⁶Sug len lahwan leng areber laugwan aud Yesusohob, kaba, leng areber gini len lacgeij en dara leiyagarij en, lendagai: Ban bouwan, kaba, emen emos sansun icira ban abus dous, kaba, edeinyum naugb emen emaugwan emeigouhwohob. Dangga leng areber ingga, gareg en os sansun mohora icira Yesus mos, kaba, en eigouhw namcirohob.