Read Manikion MATIUS 15 Bible Online

MATIUS 15 - Manikion bible

MATIUS 15

¹Doba sug Yesus moongga se Genasared ginaba, kaba, lusud merug aibibra dau leng Parisi dara leng meru ouforoho se Musa men gomnomna, kaba, len louwaden dau Yerusalem aud Yesus. Sug len ledebeij enohob, kaba, len leijidougwo eni, lendagai: Dagiro hang, aban logodeh len leicara bedreg dau maman mamjemouwer meren gomnomna gina? Anai sug len letara, kaba, len lemedu len merisira dau nosa habero.

³Doba Yesus enara bauni len merir ucugb dou len, endagai: Dagiro naugb yen yowun indan logodeh len meroho dag len ledreg dau maman mamjemouwer meren gomnomna gina? Anai yen, kaba, yen yedreg dau Allah men gomnomna terimda naugb yen yaimo areg yenin yauwam an gin touohob.

⁴Anai Allah enara dag gin dou yenohob, endagai: Yen yagauwesa yen meijina dara yen meijim dara deigeigouhw namcir. Dara en en ingma dag gin dou yen touohob, endagai: Gareg dau yen en ouwareij mena dara mem, kaba, len gus leic gomom dou en toua.

⁵Doba yen, kaba, yen yesulou lusud dag gini, yendagai: Gareg dau yen en enara dou mena dara mem dag areg en esedeb naugb ousa lan, doba en es moro dou Allah enohob, kaba, gini dag en emousa lan deitero, doba en arges dau namcirohob. Hang yen yeperwei Allah men gomnomna men meijouhw gin namcir touohob. Dauntoba yen yaimo areg yenin yauwam an gin dous.

⁷Dangga areg Allah en enara se Surad Yesaya eisaugb yen deb sug nosohob, kaba, augwan misen namcir. Anai meijen geicara augwan dag yen yarerei lusud dous.

⁸Hang en enara eisaugb yen dag gini, endagai: Len gini, kaba, len leigdoumesa dan indoho augwougb se len merirs dous. Doba len merdoc mes, kaba, aigus gougwa dau danohob.

⁹Dangga eigouhw naugb len lemesijaresa danlo. Anai len len dou lusud dag areg len lomnomnan dou len gini, kaba, dau dan ingga. Dobnaro. Areg len lomnomnan gini, kaba, dag lusud lenin meren gomnomna dous.

¹⁰Sug Yesus owun leng Parisi dag gragohob, kaba, en eija lusud leinyana len len aud en naugb en esulou len debin gin deit. Hanoba en enara dou len, endagai: Yen youman dan indir an areg dan den dou yen gini deigeigouhw namcir, dauntoba yen yecinaga meijouhw asesa toua.

¹¹Anai areg yen yet se yen meijirs, kaba, emeic gogor dou yen deseino Allah enero. Doba areg gen dau yen meigdoc mes naugb agunya se meijirs, kaba, gin eng eic gogor dou yen deseino Allah dous.

¹²Sug Yesus eic gainyenara dag graga dou lusud bouwohob, kaba, men logodeh len len aud en naugb lenara dou en, lendagai: Areg ban ben dou leng Parisi graga, kaba, eic len merdoc ehin an ban icira namcirohob. Ban bemecinageroei?

¹³Doba Yesus auni len merir ucugb dou len, endagai: Astesda meij gedig dan Indina se bogo en emebero, kaba, cum, en ohoma an mom augwan dau.

¹⁴Dangga yen yemahau dau leng gin merirero, doba yen yamsoho len dous. Anai len leigdoumesa lenin dag len merires esgiraha naugb len leinoisa len meriresmougb gus laugwan. Dobnaro. Len toua merires edag mougwohob. Hang sug len lahwan leng meriresmougb gus, kaba, cum, len laugwan lobsara se cigaha namcir.

¹⁵Doba Petrus eijidougwo Yesus eisaugb gainyenara graga, endagai: Ban ben dou emen dag areg sud hom en et, kaba, emeic gogor dou enero. Doba areg agunya dau en mers inggeic gogor dou en dous, kaba, gini men meijouhw dagiro?

¹⁶Sug Yesus ouman dau gini, kaba, en owun len meroho dag len meru emaiyero namcir. Hanoba en enara dou len, endagai: Yen gin, kaba, yen yaimo dan mohonohob. Doba yen gin meiju edgom dag len gusaba?

¹⁷Dagiro yen yemecinaga dau areg sud hom en et, kaba, emeic gogor dou enero? Anai areg en et gini, kaba, einesa en menuhwa dous. Hanoba en edoran ucugb.

¹⁸Doba areg agunya dau sud hom en mers, kaba, en dau en medoc mes teisis, hang emeic gogor dou en deseino Allah toua.

¹⁹Anai gauwamara naugb areg gecgu dag gohudara, dara mesira ebsa, dara laimom aibibrida, dara geiyohora, dara geseyeiyo len gus an meren geicara gecgu era geigouhw, dara gecic meroho gouhw genes, kaba, augwan gin eng en dau sud hom medoc mes.

²⁰Hang emeic gogor dou en deseino Allah toua. Doba aimo leng Parisi len merir naugb sug en etara dara en mesira ogor, kaba, gini emeic gogor dou en deseino Allah enero.

²¹Sug Yesus esulou men logodeh dag graga ouwohob, kaba, en eihwededau sungga dig leng Tirus dara Sidon meren hancob deit.

²²Sug en edebeij meren hancob ginohob, kaba, gida hom dau leng Kanaan gatou se cinogo ingga, en en aud Yesus. Hanoba en eiyagarij en, endagai: Daud Medebeito, ban abdoc eineg an danahaba. Anai mena mog mog einesa dan indihida medoc mes naugb ogod en mog eihwesa gebeba namcir.

²³Doba Yesus emauni ara ara dou en touwero, doba en amsoho en mer namcir. Dangga hang, men logodeh len len aud Yesus naugb lenara dou en lendagai: Ban beic geigouhw dou en mehida. Hanoba ban barougb en beihwedanda. Anai en oucucan maman naugb en mer esesa terimdaha.

²⁴Doba Yesus en etaha len merir an, endagai: Dan Indina en arougb dan den aud leng Israel dous. Anai len ledag domba gaijahasero.

²⁵Doba gida graga en en aud Yesus naugb en emecguna dou en. Hanoba en eiyagarij en deit, endagai: Adehsud, ban bousa dan an dan indihidahabi.

²⁶Doba Yesus etaha en mer an ucugb deit, endagai: Emeigouhw naugb dan demeic logodeh meren ared naugb dan demerba dou mihero. Doba eigouhw naugb meren ared ebdougwo lenin dous.

²⁷Doba gida graga, kaba, en toua ouwas Yesus mer an, endagai: Adehsud, areg ban ben gini misen namcir. Doba sug mihi merna len let ared se boromei, kaba, moslos ebrera dou meren mihi naugb len let toua.

²⁸Sug Yesus ouman dag gini, kaba, en ousa deisa en mer, endagai: Daneh, areg ban beiyagarij dan an gini, kaba, dan deicara daimo ban abir an namcir toua. Anai ban bod abina debsa dan dag misenohob. Sug Yesus enara dag gin inegohob, kaba, en mehida eigouhw namcir.

²⁹Sug Yesus ecicugb dau leng Tirus dara Sidon, meren hancobohob, kaba, en oci Galilea mebera terimda en edeisaugb men garougb hom naugb en edeigtou dou enin sungga.

³⁰Dangga lusud leinyana len lahwan leng merohora omom, dara leng meriresmougb, dara leng lagaim, dara leng losum, dara leng areber aingma aingma aud en sungga. Sug len lob len gin desij enohob, kaba, en eic geigouhw dou len laugwan toua.

³¹Sug lusud leinyana sungga len leiya, doba leng losum, kaba, len lenara moho asesa. Dara leng merohora agaim, kaba, len merohora eigouhw deit. Dara leng merohora omom, kaba, len lec merohora dag misen. Dara leng merires, kaba, len leiya lo asesa ucugb deit, kaba, len leimiman dau gin namcir. Hanoba len leigdoumesa leng Israel meren Allah en moho agas an gin toua.

³²Sug Yesus eic geigouhw dou leng areber len laugwan dauwohob, kaba, en eija men logodeh naugb len len aud en. Sug len ledebeij enohob, kaba, en enara dou len, endagai: Dan indoc eineg an lusud leinyana gindaha. Anai len leigtou desij dan se lona homoiyohob. Hang meren ared toua ouwa dau lenohob. Dangga dan demouwan len lemeihwedan merinuhwa mes mogudero. Doba dan douwan naugb len letara nosahabi, dauntoba len ledahauwa se ucina mogumsero.

³³Doba men logodeh len lenara ucucugb an en, lendagai: Maman mameic ared daugiro naugb maman mameic edeinyum dou len leinyana gougwa gini, anai maman maisa se losnesebadaha gina?

³⁴Doba Yesus eijidougwo len an meren ared, endagai: Yen yoho roti mogo hosaiya dara yeng gina? Doba len launi ucugb dou en, lendagai: Roti mogo senggai dous. Dara hosei moto moto maga aibibra toua ing dara gini.

³⁵Dangga Yesus arougb len leinyana ingga, endagai: Yen yecguna yeigtouahabi.

³⁶Sug len leigtouohob, kaba, en os roti mogo senggai graga icira mesira, dara hosei moto moto graga toua. Sug en os augwan icira mesirohob, kaba, en en sijo dou Allah naugwahabi. Hanoba en emekris roti graga dou men logodeh naugb len lemohw an lusud leinyana ingga len lemet toua.

³⁷Dangga len ingga laugwan let beicer namcir. Sug len let beicerohob, kaba, Yesus men logodeh louci mougwa debinim se aigdaga mes senggai batij an namcir.

³⁸Doba sug len lecic dau leng let ared gini, kaba, ligiji mogud eng merug ribu hogu gini, doba len lemecic ligida dara logodeh toua darero.

³⁹Gin dauwohob, kaba, Yesus arougb len laugwan lecicugb dig meren cinogoda. Hanoba eni dara men logodeh, kaba, len leisa ij dig leng Magadan meren hancob deit.